రేవంత్ గుస్సా.. బాబు కూల్

జీఎస్టీ సంస్కరణలపై తెలుగు రాష్ట్రాల ముఖ్యమంత్రులు రేవంత్ రెడ్డి, చంద్రబాబు భిన్న స్వరాలు వినిపించారు. జీఎస్టీ సంస్కరణలతో తమ రాష్ట్ర ఆదాయం గణనీయంగా తగ్గిపోతున్నదంటూ రేవంత్ రెడ్డి అసహనం వ్యక్తం చేశారు. కానీ చంద్రబాబు నాయుడు మాత్రం జీఎస్టీ సంస్కరణలు ఎంతో బాగున్నాయని.. తమ రాష్ట్ర ప్రజలకు రూ.8 వేల కోట్లు ఆదా కాబోతున్నదని చంద్రబాబు చెప్పుకొచ్చారు. రెండు తెలుగు రాష్ట్రాల ముఖ్యమంత్రులు భిన్నమైన ప్రకటనలు చేయడంతో ప్రజలు కొంత ఆశ్చర్యానికి గురయ్యారు. అయితే చంద్రబాబు నాయుడు ఎన్డీయే ప్రభుత్వంలో భాగస్వామిగా ఉండటం.. రేవంత్ రెడ్డి కాంగ్రెస్ పాలిత రాష్ట్రానికి ముఖ్యమంత్రిగా ఉండటంతో ఈ రకంగా భిన్నమైన ప్రకటనలు వచ్చాయి. రేవంత్ తమ రాష్ట్రానికి జీఎస్టీ సంస్కరణల వల్ల ఆదాయం తగ్గిందని చెప్పారు. మరి అప్పుడు ఏపీ ప్రభుత్వానికి కూడా ఆదాయం తగ్గుతుంది కదా.. అన్న అభిప్రాయాలు వ్యక్తమవుతున్నాయి. చంద్రబాబు చెప్పినట్టుగా ఏపీ ప్రజలకు రూ.8 వేల కోట్లు ఆదా అయితే తెలంగాణ ప్రజలకు కూడా ఎంతో కొంత ఆదాయం ఆదా కావాలి కదా అన్న చర్చ సాగుతోంది.

జీఎస్టీపై రేవంత్ విమర్శలు

జీఎస్టీ సంస్కరణలతో తెలంగాణ రాష్ట్ర ఆదాయం మీద ప్రభావం పడుతుందని ఈ నష్టాన్ని కేంద్రమే భర్తీ చేయాలని రేవంత్ రెడ్డి డిమాండ్ చేశారు. "జీఎస్టీ సంస్కరణలు రాష్ట్ర బడ్జెట్‌ను తీవ్రంగా ప్రభావితం చేస్తాయి. కేంద్రం మరో 5 ఏళ్లు భర్తీ చేయాలి" అని ఆయన అన్నారు. ఇటీవల సింగరేణి కార్మికులకు బోనస్ ప్రకటిస్తూ కూడా ఈ విమర్శలు చేశారు. రేవంత్ దృష్టిలో, రాష్ట్ర స్వయం ప్రతిపత్తిని జీఎస్టీ సంస్కరణలు దెబ్బతీస్తాయంటూ రేవంత్ పేర్కొన్నారు. కేంద్ర-రాష్ట్ర సంబంధాల్లో అసమతుల్యతను సృష్టిస్తాయి.

పేదలకు వరం అన్న చంద్రబాబు

మరోవైపు, ఏపీ సీఎం చంద్రబాబు నాయుడు జీఎస్టీ 2.0ను "పేదలకు వరం" అని అభివర్ణించారు. ఈ సంస్కరణలతో ప్రజలకు ఏటా రూ.8,000 కోట్లు ఆదా అవుతుందని.. కొనుగోలు శక్తి పెరుగుతుందని పేర్కొన్నారు. వ్యవసాయ ఉపకరణాలు, ఎలక్ట్రానిక్ వస్తువులపై జీఎస్టీ తగ్గింపు రైతులు, మధ్యతరగతికి ప్రయోజనకరమని చెప్పారు. ఆంధ్ర అసెంబ్లీలో ఈ సంస్కరణలకు మద్దతుగా తీర్మానం పాస్ చేసి, ప్రధాని మోదీని ప్రశంసించారు. రాష్ట్రానికి రూ.8,000 కోట్లు నష్టమైనప్పటికీ, దీర్ఘకాలిక ఆర్థిక వృద్ధికి ఇది సహాయకరమని ఆయన అభిప్రాయపడ్డారు.

భిన్నమైన రాజకీయ దృక్పథాలు

రేవంత్ కాంగ్రెస్ నాయకుడిగా కేంద్ర బీజేపీ ప్రభుత్వాన్ని విమర్శిస్తూ, రాష్ట్ర ఆదాయ నష్టాన్ని గురించి స్పందించారు. ఇది తెలంగాణ ప్రజలలో కేంద్రానికి వ్యతిరేక భావనలు పెంచే అవకాశం ఉంది. మరోవైపు, చంద్రబాబు టీడీపీ-బీజేపీ మిత్రపక్షంగా విధానాన్ని సమర్థిస్తూ, ప్రజల ఆదాయ పెరుగుదలపై దృష్టి సారించారు. ఇది ఆయన రాజకీయ వ్యూహంలో భాగంగా కనిపిస్తుంది. ఆర్థిక కోణంలో విశ్లేషిస్తే, జీఎస్టీ సంస్కరణలు రాష్ట్రాలకు ఆదాయ నష్టం కలిగించినప్పటికీ, వినియోగదారులకు ధరల తగ్గింపు ద్వారా ప్రయోజనం చేకూరుతుంది. తెలంగాణలో రూ.7,000 కోట్లు నష్టం రాష్ట్ర బడ్జెట్‌పై ఒత్తిడి పెంచుతుంది. మరోవైపు ఆంధ్రలో రూ.8,000 కోట్లు ఆదా ప్రజల కొనుగోలు శక్తిని పెంచి, ఆర్థిక చైతన్యం తెస్తుంది. దీర్ఘకాలంలో ఈ మార్పులు దేశ ఆర్థిక వ్యవస్థను బలోపేతం చేస్తాయా లేక రాష్ట్రాల మధ్య అసమానతలను పెంచుతాయా అనేది వేచి చూడాలి.

రాజకీయం, ఆర్థికం, సామాజికం

రేవంత్ విమర్శలు కాంగ్రెస్-బీజేపీ మధ్య రాజకీయ ఘర్షణను ప్రతిబింబిస్తాయి. చంద్రబాబు సమర్థన మిత్రపక్ష ధోరణిని చూపుతుంది. ఇది రానున్న ఎన్నికల్లో ప్రభావం చూపవచ్చు. రాష్ట్రాలు ఆదాయం కోల్పోతున్నప్పటికీ, జాతీయ స్థాయిలో వినియోగం పెరిగి ఆర్థిక వృద్ధి సాధ్యమవుతుంది. కానీ, భర్తీ లేకుండా రాష్ట్రాలపై భారం పడుతుంది. పేదలు, రైతులకు ధరల తగ్గింపు ప్రయోజనకరం. కానీ, రాష్ట్ర ప్రభుత్వ ఆదాయం తగ్గితే ఆ ప్రభావం సంక్షేమ పథకాల మీద పడొచ్చు. తద్వారా ప్రజలకు కొంతమేర నష్టం కలగొచ్చు. మరోవైపు బీజేయేతర ప్రభుత్వాలు జీఎస్టీ సంస్కరణలను తీవ్రంగా విమర్శిస్తున్నాయి. ఈ సంస్కరణలు ఫెడరల్ స్ఫూర్తికి విరుద్ధమని చెబుతున్నాయి. మొత్తంగా, జీఎస్టీ సంస్కరణలు దేశ ఆర్థిక సంస్కరణల్లో ముఖ్యమైన అడుగు అయినప్పటికీ, కొన్ని రాష్ట్రాలు ఈ సంస్కరణలను పొగుడుతుంటే కొన్ని రాష్ట్రాలు వ్యతిరేకిస్తుండటం గమనార్హం. ఒక్కసారిగా రాష్ట్రాలకు ఆదాయం తగ్గిపోతే ఇబ్బందికర పరిస్థితులు తలెత్తే అవకాశం ఉంది. మరి ఈ సవాళ్లను కేంద్రం ఎలా అధిగమిస్తుందో వేచి చూడాలి.