రేవంత్ ఇంటి ఎదుట అంగన్వాడీల నిరసన

కొడంగల్లోని ముఖ్యమంత్రి రేవంత్ రెడ్డి ఇంటి ఎదుట అంగన్వాడీ కార్యకర్తలు నిరసన తెలిపారు. ప్రీ ప్రైమరీ విద్యావిధానం వద్దంటూ ఆందోళన తెలిపారు. విద్యా వ్యవస్థలో పెను మార్పులు తీసుకురావాలని సంకల్పించిన విషయం తెలిసిందే. 2025-26 విద్యా సంవత్సరం నుంచి ప్రభుత్వ పాఠశాలల్లో ప్రీ-ప్రైమరీ విద్యను ప్రవేశపెట్టాలని సర్కార్ భావిస్తోంది. ప్రైవేటు, కార్పొరేట్ స్కూళ్లకు ధీటుగా నర్సరీ, ఎల్కేజీ, యూకేజీ తరగతులను ప్రభుత్వ బడుల్లోనూ ఏర్పాటు చేయాలని కసరత్తు జరుగుతోంది. ఇప్పటికే 210 పాఠశాలల్లో ఈ వ్యవస్థను ప్రారంభించాలని ఆదేశాలు జారీ అయ్యాయి. అయితే, ఈ నిర్ణయంతో అంగన్వాడీ వ్యవస్థ నిర్వీర్యమవుతుందని ఆందోళన వ్యక్తమవుతోంది. దీంతో అంగన్వాడీ కార్యకర్తలు ఆందోళనకు దిగారు. ప్రభుత్వం తీసుకున్న తాజా నిర్ణయంతో తమ కేంద్రాలు మూతపడతాయని, ఉద్యోగాలు పోతాయని వారు పేర్కొన్నారు. పోలీసులు వారిని అదుపులోకి తీసుకుని స్టేషన్కు తరలించారు.

అంగన్వాడీల సమస్యలు ఏమిటి?

ప్రభుత్వం తీసుకొచ్చిన కొత్త విద్యా విధానం తీసుకొచ్చి ప్రైవేటు స్కూళ్లతో పోటీపడేలా ప్రభుత్వ బడులను బలోపేతం చేస్తాయని ప్రభుత్వం చెబుతున్నప్పటికీ, అంగన్వాడీలపై ప్రభావం ఉంటుందని తెలుస్తోంది. ప్రస్తుతం అంగన్వాడీల్లో 3-6 సంవత్సరాల పిల్లలకు ప్రీ-స్కూల్ విద్య, పోషకాహారం, ఆరోగ్య సేవలు అందుతున్నాయి. ప్రభుత్వ పాఠశాలల్లో ప్రీ-ప్రైమరీ తరగతులు ప్రవేశపెట్టడంతో ఈ కేంద్రాలకు వచ్చే పిల్లల సంఖ్య తగ్గవచ్చు. దీంతో అంగన్వాడీలు నిర్వీర్యమవుతాయని, గ్రామీణ ప్రాంతాల్లో పిల్లల పోషణ, ఆరోగ్య సేవలు దెబ్బతినవచ్చని నిపుణులు హెచ్చరిస్తున్నారు. ముఖ్యంగా గ్రామీణ, పేద కుటుంబాల పిల్లలు అంగన్వాడీలపై ఆధారపడుతున్నారు. ఈ మార్పులతో వారికి సరైన సేవలు అందకపోవచ్చు. అలాగే, అంగన్వాడీ కార్యకర్తల ఉద్యోగాలు, వేతనాలపై అనిశ్చితి నెలకొంది.

ప్రభుత్వం దీన్ని ఎలా ఎదుర్కోబోతున్నది?

ముఖ్యమంత్రి రేవంత్ రెడ్డి అంగన్వాడీలను జాతీయ మోడల్గా తీర్చిదిద్దాలని ఆదేశాలిచ్చారు. ఖాళీగా ఉన్న ప్రభుత్వ పాఠశాలల్లో అంగన్వాడీ కేంద్రాలను విలీనం చేసి, ప్రీ-ప్రైమరీ హబ్లుగా మార్చాలని ప్రణాళికలు సిద్ధమవుతున్నాయి. 21 జిల్లాల్లో పైలట్ ప్రాజెక్టుగా 34 పాఠశాలలను గుర్తించారు. దీంతో అంగన్వాడీలను మూసివేయకుండా, పాఠశాలలతో కలిపి బలోపేతం చేయాలని ప్రభుత్వం భావిస్తోంది. అలాగే, అంగన్వాడీల్లో 3వ తరగతి వరకు విద్యను విస్తరించాలని ప్రతిపాదనలు ఉన్నాయి. ఇందుకోసం సాంకేతికత, మౌలిక వసతులు మెరుగుపరచాలని సూచించారు. జాతీయ విద్యా విధానం (NEP 2020)కు అనుగుణంగా ఈ మార్పులు తీసుకురావాలని లక్ష్యం.

అంగన్వాడీ వ్యవస్థను విలీనం చేస్తే పరిస్థితి ఏమిటి?

ప్రభుత్వం అంగన్వాడీలను పూర్తిగా రద్దు చేయకుండా, పాఠశాలలతో కో-లొకేట్ చేయాలని కేంద్రం మార్గదర్శకాలు జారీ చేసింది. దీంతో పిల్లలకు మెరుగైన విద్య, పోషకాహార సేవలు అందుబాటులోకి వస్తాయి. గ్రామీణ ప్రాంతాల్లో ఖాళీ భవనాలను వినియోగించుకుని, అంగన్వాడీలను ప్రీ-ప్రైమరీ సెంటర్లుగా మారుస్తారు. ఇది విజయవంతమైతే, పిల్లల సంఖ్య పెరిగి, విద్యా నాణ్యత మెరుగుపడుతుంది. అయితే, సరైన శిక్షణ లేకుండా విలీనం చేస్తే, సేవలు దెబ్బతినే అవకాశం ఉంది. ప్రస్తుతం అంగన్వాడీల్లో పనిచేస్తున్న ఉద్యోగులు, సిబ్బంది పరిస్థితి ఏమిటన్న ప్రశ్నలు ఉత్పన్నం అవుతున్నాయి. ప్రభుత్వం అంగన్వాడీ కార్యకర్తలను, హెల్పర్లను కొత్త వ్యవస్థలోనే కొనసాగించాలని భావిస్తోంది. వారికి పాఠశాలల్లో ప్రీ-ప్రైమరీ టీచర్లుగా శిక్షణ ఇచ్చి, విలీనం చేయవచ్చు. ఇప్పటికే వేతనాలు పెంచాలని, పదవీ విరమణ ప్రయోజనాలు కల్పించాలని డిమాండ్లు ఉన్నాయి. కొత్త సంస్కరణల్లో వారి ఉద్యోగ భద్రతను కాపాడుతూ, మెరుగైన వేతనాలు, సౌకర్యాలు కల్పించాలని ప్రభుత్వం చర్యలు తీసుకుంటుంది. అయితే, ఆందోళనకర్తలతో చర్చలు జరిపి, వారి ఆందోళనలు తీర్చాల్సిన అవసరం ఉంది. ఈ మార్పులు తెలంగాణ విద్యా వ్యవస్థను మరింత బలోపేతం చేస్తాయా? లేక అంగన్వాడీలను బలహీనపరుస్తాయా? అనేది కాలమే నిర్ణయిస్తుంది. ఫొటో రైటప్: కొడంగల్లోని ముఖ్యమంత్రి రేవంత్ రెడ్డి ఇంటి ఎదుట ఆందోళన తెలుపుతున్న అంగన్వాడీ కార్యకర్తలు