యూపీ సోన్భద్రలో విషాదం: క్వారీ కూలి ఒకరు మృతి
ఉత్తర్ప్రదేశ్లోని సోన్భద్ర జిల్లాలో పెను ప్రమాదం సంభవించింది. స్టోన్ క్వారీ కూలిపోయిన ప్రమాదంలో ఆదివారం ఉదయం శిథిలాల కింద నుంచి 30 ఏళ్ల కార్మికుడి మృతదేహాన్ని వెలికితీశారు. మరికొంత మంది శిథిలాల కింద చిక్కుకునే ఉన్నారని పోలీసులు తెలిపారు. మృతుడిని అదే జిల్లాలోని పనారి గ్రామానికి చెందిన రాజు సింగ్గా పోలీసులు గుర్తించారు. శనివారం సాయంత్రం బిల్లీ మార్కుండి మైనింగ్ ప్రాంతంలో ప్రమాదం జరిగిన వెంటనే ఘటనా స్థలాన్ని సందర్శించిన యూపీ మంత్రి, స్థానిక ఎమ్మెల్యే సంజీవ్ కుమార్ గోండ్ మాట్లాడుతూ, శిథిలాల కింద సుమారు 12 మంది కార్మికులు చిక్కుకుని ఉండొచ్చని అనుమానం వ్యక్తం చేశారు.
శనివారం సాయంత్రం 4.30 గంటల ప్రాంతంలో కృష్ణ మైనింగ్ వర్క్స్ నడుపుతున్న క్వారీలో ప్రమాదం జరిగినట్లు సమాచారం అందిందని సోన్భద్ర ఎస్పీ అభిషేక్ వర్మ తెలిపారు. శిథిలాలలో భారీ రాళ్లు ఉన్నందున తొలగింపుకు సమయం పడుతోందని వారణాసి జోన్ ఏడీజీ పీయూష్ మోర్డియా తెలిపారు. నేషనల్ డిజాస్టర్ రెస్పాన్స్ ఫోర్స్, స్టేట్ డిజాస్టర్ రెస్పాన్స్ ఫోర్స్, పోలీసు బృందాలు రెస్క్యూ ఆపరేషన్లను నిర్వహిస్తున్నాయని ఆయన ఎక్స్ లో పోస్ట్ చేశారు.
ఈ ఘటనపై పోలీసులు కేసు నమోదు చేశారు. శిథిలాల కింద తన ఇద్దరు సోదరులు చిక్కుకున్నారని చెప్పిన పర్సోయ్ టోలా నివాసి ఛోటు యాదవ్ ఫిర్యాదు మేరకు, కృష్ణ మైనింగ్ వర్క్స్ యజమాని మరియు అతని వ్యాపార భాగస్వాములైన మధుసూదన్ సింగ్ మరియు దిలీప్ కేశరిలపై కేసు నమోదు చేశారు. అయితే, నిందితులను ఇంకా అరెస్టు చేయలేదు.
సమాజ్వాదీ పార్టీకి చెందిన రాబర్ట్స్గంజ్ ఎంపీ ఛోటేలాల్ ఖర్వార్, ఈ గనిని స్థానిక పోలీసులతో కుమ్మక్కై మాఫియా అక్రమంగా నిర్వహిస్తోందని ఆరోపించారు. ఈ ప్రాంతంలో నెలనెలా ఇలాంటి ప్రమాదాలు జరుగుతున్నాయని, దీని వెనుక ఎస్ఐ, ఎస్పీ, డీఎం, మైనింగ్ అధికారి హస్తం ఉందని ఆయన తీవ్ర ఆరోపణలు చేశారు. మృతుడి కుటుంబానికి రూ.50 లక్షల పరిహారం, కుటుంబంలో ఒకరికి ప్రభుత్వ ఉద్యోగం ఇవ్వాలని ఎంపీ ఖర్వార్ డిమాండ్ చేశారు.