యూనిట్కు రూ.4 విద్యుత్ లక్ష్యంగా ఏపీ ప్రభుత్వం సంస్కరణలు
రాష్ట్రంలో విద్యుత్ రంగాన్ని మరింత సమర్థవంతంగా మార్చి ప్రజలపై భారం తగ్గించే దిశగా ఏపిప్రభుత్వం కీలక చర్యలు చేపడుతోంది. ఈ క్రమంలో ఎన్ చంద్రబాబు నాయుడు సచివాలయంలో విద్యుత్ శాఖపై సమీక్ష నిర్వహించి పలు కీలక ఆదేశాలు జారీ చేశారు. ముఖ్యంగా విద్యుత్ కొనుగోలు ధరను యూనిట్కు రూ.4కు తగ్గించే లక్ష్యంతో అధికారులు కృషి చేయాలని స్పష్టం చేశారు.
ప్రస్తుతం విద్యుత్ కొనుగోలు వ్యయాన్ని తగ్గించేందుకు చేపడుతున్న చర్యలను అధికారులు సీఎంకు వివరించారు. 2028-29 నాటికి యూనిట్ విద్యుత్ కొనుగోలు ధరను రూ.4.10 వరకు తీసుకురావాలని ప్రణాళికలు రూపొందించినట్లు తెలిపారు. అయితే దీనిని మరింత తగ్గించి రూ.4కు తీసుకురావాలని సీఎం ఆదేశించారు. వివిధ సంస్కరణల ద్వారా యూనిట్కు రూ.1.32 వరకు భారం తగ్గించవచ్చని అధికారులు అంచనా వేశారు.
విద్యుత్ సంస్థల ఆర్థిక స్థితిని బలోపేతం చేయడంపై సీఎం ప్రత్యేక దృష్టి సారించారు. వినియోగదారులపై ఛార్జీలు పెంచకుండా సంస్థల రుణాలను తీర్చేందుకు కార్యాచరణ ప్రణాళిక రూపొందించాలని సూచించారు. సమర్థ నిర్వహణ వల్ల 2025-26 ఆర్థిక సంవత్సరంలోనే సుమారు రూ.339 కోట్ల ఆదా సాధించినట్లు అధికారులు వెల్లడించగా, ఇదే విధానాన్ని మరింత విస్తరించాలని సీఎం సూచించారు.
గ్రీన్ ఎనర్జీ వైపు ప్రపంచవ్యాప్తంగా మార్పులు చోటుచేసుకుంటున్న నేపథ్యంలో రాష్ట్రం కూడా ఆ దిశగా ముందడుగు వేయాలని సీఎం పేర్కొన్నారు. సౌర విద్యుత్ ఉత్పత్తి, విండ్ ఎనర్జీ, పంప్డ్ స్టోరేజ్ ప్రాజెక్టులు, బ్యాటరీ ఎనర్జీ స్టోరేజ్ వ్యవస్థలను సమన్వయం చేయాలని ఆదేశించారు. ముఖ్యంగా పీఎం సూర్యఘర్ యోజన పథకాన్ని ప్రజలకు మరింత చేరువ చేయాలని, అలాగే పీ ఎం కుసుమ్ స్కీమ్ ద్వారా రైతులకు సౌర పంపు సెట్ల వినియోగంపై అవగాహన కల్పించాలని సూచించారు.
రాష్ట్రంలో సోలార్ రూఫ్టాప్ వ్యవస్థలను విస్తృతంగా ప్రోత్సహించాలన్న సీఎం, ఆంధ్రప్రదేశ్ను దేశంలోనే సౌర విద్యుత్ ఉత్పత్తిలో అగ్రస్థానంలో నిలపాలని లక్ష్యంగా పెట్టుకున్నామన్నారు. ఇప్పటికే గ్రీన్ ఎనర్జీ రంగంలో రాష్ట్రం ముందంజలో ఉందని, ఇదే కారణంగా ప్రముఖ కంపెనీలు, ముఖ్యంగా గూగుల్ వంటి సంస్థలు డేటా సెంటర్లను ఏర్పాటు చేస్తున్నాయని తెలిపారు.
ఇక విద్యుత్ రంగంలో ఆవిష్కరణలకు ప్రోత్సాహం ఇవ్వడానికి ప్రత్యేక చర్యలు చేపట్టాలని సీఎం సూచించారు. స్టార్టప్లకు మద్దతుగా ప్రత్యేక ఇంక్యుబేషన్ ఫండ్ ఏర్పాటు చేయాలని, అవసరమైన మార్జిన్ మనీ అందించేందుకు విద్యుత్ సంస్థలు ముందుకు రావాలని చెప్పారు. టెక్నాలజీ ఆధారిత అభివృద్ధి కోసం ఎనర్జీ యూనివర్శిటీ ఏర్పాటు చేయాలని, అలాగే సెంటర్ ఆఫ్ ఎక్సలెన్స్ ఫర్ ఎనర్జీ ట్రాన్సిషన్ను బలోపేతం చేయాలని ఆదేశించారు.
ఇతర రాష్ట్రాలతో పోలిస్తే విద్యుత్ రంగంలో ఆంధ్రప్రదేశ్ ముందుందని సీఎం పేర్కొంటూ, రాష్ట్ర విద్యుత్ సంస్థలు భవిష్యత్తులో కన్సల్టెన్సీ సేవలు అందించే స్థాయికి ఎదగాలని సూచించారు. విద్యుత్ సంస్కరణల ద్వారా ప్రజలకు మేలు చేసే దిశగా ప్రభుత్వం రిస్క్ తీసుకుని ముందడుగు వేసిందని గుర్తుచేశారు.
మొత్తంగా, విద్యుత్ కొనుగోలు వ్యయం తగ్గింపు, గ్రీన్ ఎనర్జీ విస్తరణ, సంస్థల ఆర్థిక స్థిరీకరణ, ఆవిష్కరణలకు ప్రోత్సాహం వంటి అంశాలపై ప్రభుత్వం సమగ్ర ప్రణాళికతో ముందుకు సాగుతున్నట్లు ఈ సమీక్ష స్పష్టంచేసింది. ప్రజలపై అదనపు భారం లేకుండా విద్యుత్ రంగాన్ని బలోపేతం చేయడమే ప్రభుత్వ ప్రధాన లక్ష్యంగా ఉందని సీఎం స్పష్టం చేశారు.