యూకేలో భారతీయ యువతిపై జాతి వివక్షతో అత్యాచారం.. నిందితుడి అరెస్ట్
బ్రిటన్లోని వాల్సాల్లో ఉన్న పార్క్ హాల్ ప్రాంతంలో దారుణమైన సంఘటన చోటు చేసుకుంది. భారతీయ మూలాలున్న ఒక యువతిపై "జాతి వివక్షతో కూడిన" దారుణమైన అత్యాచారం జరిగింది. ఈ సంఘటనతో స్థానిక కమ్యూనిటీ తీవ్ర దిగ్భ్రాంతికి లోనైంది. శనివారం సాయంత్రం జరిగిన ఈ దాడికి సంబంధించి అనుమానితుడైన 32 ఏళ్ల వ్యక్తిని అత్యాచారం ఆరోపణలపై వెస్ట్ మిడ్లాండ్స్ పోలీసులు అరెస్టు చేసి, విచారణ కొనసాగిస్తున్నారు.
వాల్సాల్ పట్టణం లండన్కు సుమారు 220 కిలోమీటర్ల దూరంలో వెస్ట్ మిడ్లాండ్స్ ప్రాంతంలో ఉంది. గత రెండు నెలల వ్యవధిలో ఇదే తరహాలో భారతీయ మహిళలపై జరిగిన రెండో దారుణమైన దాడి కావడంతో, యూకేలోని భారతీయ ముఖ్యంగా సిక్కు కమ్యూనిటీలో తీవ్ర భయాందోళనలు నెలకొన్నాయి.
ఘటన వివరాలు
సిక్ ఫెడరేషన్ యూకే అనే సంస్థ వెల్లడించిన వివరాల ప్రకారం, దుండగుడు బాధితురాలు నివసిస్తున్న ఇంటి తలుపులు బద్దలు కొట్టి లోపలికి ప్రవేశించి ఈ ఘాతుకానికి పాల్పడ్డాడు. అత్యాచారం జరిగిన తర్వాత, తీవ్ర మనస్తాపానికి గురైన బాధితురాలు వీధి మధ్యలో కూర్చుని ఉండగా, స్థానికులు పోలీసులకు సమాచారం అందించారు. వెంటనే స్పందించిన పోలీసులు యువతిని ఆసుపత్రికి తరలించారు.
పోలీసుల దర్యాప్తు, నిందితుడి గుర్తింపు
దర్యాప్తు అధికారి డిటెక్టివ్ సూపరింటెండెంట్ రోనన్ టైరర్ ఈ దాడిని "అత్యంత దారుణమైనది"గా అభివర్ణించారు. జాతి వివక్ష కోణం నుంచి దర్యాప్తు జరుగుతోందని ఆయన తెలిపారు. పోలీసులు సీసీటీవీ దృశ్యాల ఆధారంగా నిందితుడిని 32 ఏళ్ల వయసున్న శ్వేతజాతీయుడిగా గుర్తించారు. అతడు పొట్టి జుట్టుతో, నలుపు రంగు దుస్తులు ధరించి ఉన్నట్లు ఫుటేజ్లో ఉంది.
వాల్సాల్లో జరిగిన ఈ దారుణ ఘటన.. గత నెలలో (సెప్టెంబర్) ఓల్డ్బరీ ప్రాంతంలో ఒక సిక్కు మహిళపై జరిగిన లైంగిక దాడిని గుర్తు చేసింది. ఆ దాడిలో నిందితులు బాధితురాలిని "మీ దేశానికి వెళ్లిపో" అని బెదిరించినట్లు ఆరోపణలు ఉన్నాయి. అయితే ఈ దర్యాప్తులో పోలీసులు కొందరిని అరెస్టు చేసి, ఆ తర్వాత బెయిల్పై విడుదల చేయడం గమనార్హం.
రాజకీయ నాయకుల ఖండన
యూకే హోం సెక్రటరీ షబానా మహమూద్ ఈ ఘటనపై సోషల్ మీడియాలో స్పందించారు. "వాల్సాల్లో జాతి వివక్షతో కూడిన అత్యాచారం భయంకరమైన నేరం. స్థానిక సిక్కు కమ్యూనిటీలో నెలకొన్న భయాన్ని నేను అర్థం చేసుకోగలను. ప్రభావితమైన ప్రతి ఒక్కరికీ మద్దతు ఇవ్వడానికి పోలీసులు కృషి చేస్తున్నారు," అని ఆమె తెలిపారు.
స్థానిక కౌన్సిలర్, కమ్యూనిటీ నాయకుడు కౌన్సిలర్ రామ్ కె.మెహమి మాట్లాడుతూ "61 సంవత్సరాలుగా ఇక్కడ నివసిస్తున్నాను. ఇలాంటి సంఘటన ఎప్పుడూ వినలేదు. వెస్ట్ మిడ్లాండ్స్లో ఇది రెండో జాతి వివక్షతో కూడిన దాడి కావడంతో స్థానిక కమ్యూనిటీ తీవ్ర ఆందోళన చెందుతోంది" అని అన్నారు.
బ్రిటిష్ సిక్కు లేబర్ ఎంపీలు ప్రీత్ కౌర్ గిల్, తన్మంజీత్ సింగ్ ధేసి కూడా సోషల్ మీడియా వేదికగా ఈ ఘటనపై తీవ్ర దిగ్భ్రాంతి వ్యక్తం చేశారు. "మన ప్రాంతంలో మహిళలపై జరుగుతున్న హింస, దానికి ద్వేషం, జాతి వివక్షత వంటివి తోడవడం కలవరపెడుతోంది. బాధితురాలికి న్యాయం జరగాలి," అని ప్రీత్ కౌర్ గిల్ ట్వీట్ చేశారు.
వాల్సాల్ పోలీస్ చీఫ్ సూపరింటెండెంట్ ఫిల్ డోల్బీ మాట్లాడుతూ, "ఈ దాడి సమాజాల్లో భయాందోళనలను కలిగిస్తుందని మాకు తెలుసు. రాబోయే రోజుల్లో ఆ ప్రాంతంలో పోలీసుల పహారా పెంచుతాం" అని హామీ ఇచ్చారు.