యుద్ధ పరిస్ధితులకు అనుగుణంగా భారత రక్షణ దళాలు సిద్ధం: సీడీఎస్ జనరల్ చౌహాన్

యుద్ధం, యుద్ధ విధానాలు కీలక మార్పుల దశలో ఉన్నాయని, ఈ మారుతున్న పరిస్ధితులకు అనుగుణంగా భారత రక్షణ దళాలు తమను తాము సర్దుబాటు చేసుకుంటూ, అవసరమైన సంస్కరణలను అమలు చేస్తూ ఎప్పటికప్పుడు సిద్ధంగా, ఉండేందుకు కట్టుబడి ఉన్నాయని చీఫ్ ఆఫ్ డిఫెన్స్ స్టాఫ్ (సీడీఎస్) జనరల్ అనిల్ చౌహాన్ పేర్కొన్నారు.

హైదరాబాద్ సమీపంలోని డుండిగల్‌లోని ఎయిర్ ఫోర్స్ అకాడమీలో 216వ కోర్సు కంబైన్డ్ గ్రాడ్యుయేషన్ పరేడ్ (సీజీపీ)ను ఉద్దేశించి శనివారం ప్రసంగించిన ఆయన, భారత్‌ బలానికి పునాది బలమైన సంస్థలు, ప్రజాస్వామ్య స్థిరత్వం, అలాగే సాయుధ దళాల అచంచలమైన వృత్తిపరమైన నిబద్ధతేనని అన్నారు.

ప్రస్తుతానికి ఆపరేషన్‌ల తీవ్రత కొంత తగ్గినప్పటికీ ‘ఆపరేషన్ సింధూర్’ కొనసాగుతూనే ఉందని ఆయన స్పష్టం చేశారు. “మీరు (నూతన అధికారులు) ఒక కొత్త సాధారణ పరిస్థితిలో ఎయిర్ ఫోర్స్‌లో చేరుతున్నారు. ఇది 24 గంటలు, ఏడాది పొడవునా అధిక స్థాయి ఆపరేషనల్ సిద్ధతతో నిర్వచించబడిన కాలం. ఆపరేషన్‌ల తీవ్రత తగ్గినట్లుగా అనిపించినా, ఆపరేషన్ సింధూర్ మాత్రం కొనసాగుతోంది అని జనరల్ చౌహాన్ తెలిపారు.

నూతనంగా శిక్షణ పూర్తిచేసుకున్న అధికారులు భారత సాయుధ దళాలు లోతైన మార్పుల దశలో ఉన్న సమయంలో భారత వైమానిక దళంలోకి అడుగుపెడుతున్నారని ఆయన చెప్పారు. సమగ్ర నిర్మాణాలు, సంయుక్త ఆపరేషన్‌లు, అలాగే రక్షణ రంగంలో ‘ఆత్మనిర్భర్ భారత్’ లక్ష్యం దేశ సైనిక శక్తి భవిష్యత్తును ఆకారమిస్తున్నాయని పేర్కొన్నారు.

జై హింద్ అనే నినాదంలోని తొలి పదమైన ‘జై’ మీ ప్రయాణానికి మార్గదర్శకంగా ఉండాలని ఆయన వివరించారు. ఇందులో ‘జె’ అంటే జాయింట్‌నెస్ – ఒకే దేశంగా, ఒకే దళంగా పోరాడటం ‘ఏ’ అంటే ఆత్మనిర్భర్ భారత్ – భారత్ కోసం మాత్రమే కాదు, ప్రపంచానికి కూడా నమ్మకమైన స్వదేశీ వేదికలు, వ్యవస్థలు తయారు చేయడం; ‘ఐ’ అంటే ఇన్నోవేషన్, ముందుగా ఆలోచించి, ముందుండే ధైర్యం కలిగి ఉండడం అని ఆయన అర్థం చెప్పారు.

పాత యుద్ధ రంగాల్లో పోరాటాలు ఎప్పటికీ కఠినంగానే ఉంటాయని, అయితే కొత్త రంగాల్లో యుద్ధాలు తెలివితేటలు, ఆవిష్కరణలు, చురుకైన నిర్ణయాలతో సాగుతాయని జనరల్ చౌహాన్ అన్నారు. కొత్త సరిహద్దులను అధిగమించే శక్తి కలిగిన దళాలే భవిష్యత్ యుద్ధాల్లో విజయం సాధిస్తాయని ఆయన స్పష్టం చేశారు.