యాసంగి సీజన్లో ఎరువుల కొరత రాకుండా చూడాలి: మంత్రి తుమ్మల
యాసంగి సాగు సీజన్లో రాష్ట్ర రైతులకు ఎరువుల కొరత తలెత్తకుండా కేంద్ర ప్రభుత్వం తక్షణ చర్యలు తీసుకోవాలని తెలంగాణ వ్యవసాయ శాఖ మంత్రి తుమ్మల నాగేశ్వరరావు డిమాండ్ చేశారు. ఈ సందర్భంగా ఆయన కేంద్ర ఎరువుల శాఖకు లేఖ రాసి, రాష్ట్రానికి కేటాయించిన యూరియా సరఫరాపై స్పష్టమైన మార్గదర్శకాలు ఇవ్వాలని కోరారు.
మంత్రి తుమ్మల వివరించిన ప్రకారం, యాసంగి సీజన్ మొత్తానికి కేంద్రం తెలంగాణకు 10.40 లక్షల టన్నుల యూరియాను కేటాయించింది. ఇందులో మొదటి మూడు నెలలకు కనీసం 6 లక్షల టన్నులను తక్షణమే సరఫరా చేయాలని ఆయన విజ్ఞప్తి చేశారు. ప్రస్తుతం రాష్ట్రంలోని జిల్లాల్లో సాగు పనులు ప్రారంభమవుతుండటంతో రైతులు పెద్ద ఎత్తున ఎరువుల కోసం ఎదురుచూస్తున్నారని చెప్పారు.
రాష్ట్ర ప్రభుత్వం రైతుల అవసరాలను దృష్టిలో ఉంచుకుని యాసంగి పంటల సాగు సాఫీగా సాగేందుకు అన్ని ఏర్పాట్లు చేస్తోంది. అయితే కేంద్రం నుంచి సరఫరా ఆలస్యమైతే, రైతులు ఇబ్బందులు పడే అవకాశం ఉంది. అందువల్ల సమయానుకూలంగా ఎరువులు అందేలా చర్యలు తీసుకోవాలని మంత్రి తెలిపారు.రాష్ట్రంలో మొత్తం 25 లక్షల ఎకరాల్లో యాసంగి పంటలు సాగు చేసేందుకు ప్రణాళిక సిద్ధమైంది. ఈ సందర్భంలో అవసరమైన యూరియా, డీఎపీ, ఎన్పీకే వంటి ఎరువులు అందుబాటులో ఉండాలని ఆయన తెలిపారు.
ఖరీఫ్, వానకాల సీజన్లో ఎరువుల కొరత రాష్ట్ర రైతులకు తీవ్రమైన ఇబ్బందులు గురి చేసింది. జిల్లాల్లో సాగు ప్రారంభమైన నేపథ్యంలో యూరియా సరఫరా ఆలస్యమవడం వల్ల రైతులు మార్కెట్లలో అధిక ధరలకు ఎరువులు కొనుగోలు చేయాల్సి వచ్చింది.ప్రభుత్వ రిటైల్ కేంద్రాల్లో యూరియా లభ్యత తక్కువగా ఉండటంతో, రైతులు ప్రైవేట్ వ్యాపారుల వద్ద బస్తా ధర కంటే 100నుంచి150 ఎక్కువ చెల్లిస్తున్నారు. యూరియా లేక పంటల పెరుగుదల మందగించడం, మొక్కల పసుపు రంగు మారడం వంటి సమస్యలు తలెత్తుతున్నాయి.రైతులు సమయానికి ఎరువులు అందకపోతే దిగుబడులు తగ్గే ప్రమాదం ఉంటుందని ఆయన సూచించారు.
అలాగే రైతులు అధిక ధరలకు ఎరువులు కొనుగోలు చేయకుండా చూడటానికి, జిల్లా స్థాయిలో ప్రత్యేక పర్యవేక్షణ బృందాలను ఏర్పాటు చేయాలని అధికారులను ఆదేశించినట్లు తెలిపారు. రాష్ట్ర ప్రభుత్వం రైతుల సంక్షేమం కోసం కట్టుబడి ఉందని, కేంద్రం సహకారంతో యాసంగి సీజన్ను విజయవంతంగా పూర్తి చేస్తామన్నారు.