యువత ఓటు చోరీని సహించరు

భారతదేశ యువత ఓటు చోరీని ఎట్టి పరిస్థితుల్లోనూ అంగీకరించబోరని, త్వరలో బీజేపీపై తిరుగుబాటు తప్పదని కాంగ్రెస్ అగ్రనేత రాహుల్ గాంధీ పేర్కొన్నారు. ప్రధాని నరేంద్రమోడీ దేశంలోని సమస్యలను పక్కన పెట్టి పీఆర్ టీమ్‌తోనే ఎక్కువ సమయం గడుపుతున్నారని విమర్శించారు. ఆయన దృష్టి మొత్తం బిలియనీర్ల మీదే ఉందని పేర్కొన్నారు. వాళ్ల బాగు కోసమే పనిచేస్తున్నారని పేర్కొన్నారు. కేంద్ర ప్రభుత్వం ప్రజల సంక్షేమాన్ని పట్టించుకోకుండా, కొన్ని సంస్థలను తన గుప్పిట్లో పెట్టుకున్నదని పేర్కొన్నారు. "భారత్‌లో యువతకు అతిపెద్ద సమస్య నిరుద్యోగం. ప్రజల విశ్వాసంతో ఎన్నికల్లో గెలిచి అధికారంలోకి వచ్చిన ప్రభుత్వం ముందుగా యువతకు ఉద్యోగాలు, అవకాశాలు కల్పించాలి. కానీ బీజేపీ ఎన్నికల్లో నిజాయితీగా గెలవడం లేదు - వోట్లు దొంగిలించి, సంస్థలను బందీలుగా చేసుకుని అధికారంలో ఉంటోంది" అని కాంగ్రెస్ నేత ఎక్స్‌లో పోస్ట్ చేశారు.

‘బీజేపీ సంస్థలను ఆక్రమించుకోవడం వల్ల దేశంలో ఉద్యోగాలు తగ్గుతున్నాయి, నియామక ప్రక్రియలు ఆగిపోతున్నది. యువత భవిష్యత్తు అంధకారంలోకి వెళ్లిపోతున్నది’ అంటూ రాహుల్ విమర్శించారు. మోడీ సెలబ్రిటీలతో పొగిడించుకుంటున్నారని విమర్శించారు. బిలియనీర్ల లాభాలపై దృష్టి పెడుతున్నారంటూ ఆరోపించారు. యువత ఆశలను బద్దలు చేసి, వారిని నిరాశపరచడం బీజేపీకి అలవాటుగా మారిందని చెప్పారు. దేశ యువత "ఉద్యోగాల దోపిడీని గానీ, వోటు దొంగతనాన్ని గానీ సహించదు" అని తెలిపారు. ఇప్పుడు పరిస్థితి మారుతోంది. భారత యువతకు అసలు పోరాటం ఉద్యోగాల కోసం మాత్రమే కాదు, వోటు దొంగతనానికి వ్యతిరేకంగా కూడా. దేశంలో సజావుగా ఎన్నికలు జరగకపోతే కచ్చితంగా ఇటువంటి సమస్యలే వస్తాయన్నారు. "మేం ఒక హైడ్రోజన్ బాంబ్‌ను విడుదల చేయబోతున్నాం. మా ఆరోపణలకు పక్కాగా ఆధారాలు ఉన్నాయి. ఆధారాలు లేకుండా నేను ఏమీ మాట్లాడటం లేదు, మేం 100 శాతం ఆధారాలతో విషయాలను బయటపెడతాం" అని రాహుల్ గాంధీ పేర్కొన్నారు.

నిరుద్యోగ సమస్య నిజమేనా?

కాంగ్రెస్ నాయకుడు రాహుల్ గాంధీ ఎక్కడికి వెళ్లినా ఓట్ల చోరీ అంశాన్ని ప్రధానంగా చర్చకు తెస్తున్నారు. అయితే ఆయన తాజాగా దేశంలో నిరుద్యోగ సమస్య ఉందని ప్రస్తావించారు. యువత ముందు ఉన్న అతిపెద్ద సమస్య నిరుద్యోగమే అని పేర్కొన్నారు. దేశంలో నిరుద్యోగ సమస్య ఎంత తీవ్రంగా ఉంది? ఎన్‌డీఏ పాలనలో నిరుద్యోగం ఎంత పెరిగింది? ఉద్యోగాల సృష్టి ఎలా జరిగింది? ప్రభుత్వ, ప్రైవేటు రంగాల్లో ఉద్యోగాల పరిస్థితి ఏమిటి? ఇలాంటి అంశాలను పరిశీలిద్దాం.

సీఎమ్‌ఐఈ (సెంటర్ ఫర్ మానిటరింగ్ ఇండియన్ ఎకానమీ) డేటా ప్రకారం, 2025 సెప్టెంబర్‌లో నిరుద్యోగ రేటు 7.0 శాతం. ఆగస్టు 2025లో 5.1 శాతం అని తెలుస్తోంది . జూలై 2025లో 6.8 శాతం అని సీఎమ్‌ఐఈ తెలిపింది. అంతర్జాతీయ కార్మిక సంస్థ (ఐఎల్‌ఓ) ప్రకారం, 3.4 నుంచి 3.6 శాతం మధ్య ఉంది. ప్రపంచ బ్యాంకు, ఐఎమ్‌ఎఫ్ అంచనాల ప్రకారం 2025లో 4.9 శాతం. యువతలో నిరుద్యోగం మరింత ఎక్కువగా ఉంది, మే 2025లో 14.9 శాతం.

ఎన్‌డీఏ పాలనలో (2014 నుంచి 2025 వరకు) నిరుద్యోగం ఎంత పెరిగింది? 2017లో 6 శాతం ఉండగా, ఇప్పుడు 3.2 శాతం అని ప్రభుత్వం చెబుతోంది. కానీ కోవిడ్ సమయంలో గరిష్ఠంగా పెరిగి, ఇప్పుడు 5-7 శాతం మధ్య ఉంది. 2014లో 4.2 శాతం ఉండగా, 2023లో 4.17 శాతం, 2024లో 4.20 శాతం అని మాక్రోట్రెండ్స్ చెబుతోంది. మూడ్ ఆఫ్ ది నేషన్ సర్వే ప్రకారం, ఎన్‌డీఏ పాలనలో నిరుద్యోగం అతిపెద్ద వైఫల్యం అని 27.1 శాతం మంది అంటున్నారు.

ఉద్యోగ కల్పన ఎలా జరిగింది? 2014లో 47.15 కోట్ల మందికి ఉద్యోగాలు ఉండగా, 2024లో 64.33 కోట్లకు పెరిగాయి. 17.19 కోట్ల ఉద్యోగాలు సృష్టించామని ప్రభుత్వం చెబుతోంది. గత ఏడాది (2023-24)లోనే 4.6 కోట్ల ఉద్యోగాలు వచ్చాయి. 2004-2014 మధ్య 2.9 కోట్లు మాత్రమే సృష్టించారని, ఇప్పుడు 17 కోట్లు అని బీజేపీ చెబుతోంది. కానీ విమర్శకులు ఇవి నాణ్యత లేని ఉద్యోగాలు అని అంటున్నారు. నాన్-ఫామ్ ఉద్యోగాలు ఏడాదికి 7.5 మిలియన్ల నుంచి తగ్గాయి.

ప్రభుత్వ, ప్రైవేటు రంగాల్లో ఉద్యోగాల పరిస్థితి ఏమిటి? ఉద్యోగాలు వ్యవసాయం, పరిశ్రమలు, సేవల రంగాల్లో పెరుగుతున్నాయి. ప్రైవేటు రంగం బలంగా పెరుగుతోంది, కానీ ద్రవ్యోల్బణం, ఉద్యోగ సమస్యలు ఉన్నాయి. లేబర్ ఫోర్స్ పార్టిసిపేషన్ రేటు 54.9 శాతం. పబ్లిక్, ఆర్గనైజ్డ్ ప్రైవేటు రంగాల్లో ఉద్యోగ రేటు 47.20 శాతం. భవిష్యత్తులో ఈవీలు వంటి రంగాల్లో 10 మిలియన్ల డైరెక్ట్ ఉద్యోగాలు వస్తాయని అంచనా. మొత్తంగా చూస్తే, ప్రభుత్వం ఉద్యోగాలు పెరిగాయని చెబుతుంటే, విపక్షాలు యువత నిరుద్యోగం తీవ్రంగా ఉందని అంటున్నాయి. డేటా ఆధారంగా నిరుద్యోగం తగ్గుతున్నట్టు కనిపిస్తున్నా, నాణ్యమైన ఉద్యోగాలు మరిన్ని సృష్టించాల్సిన అవసరం ఉంది.