యడ్యూరప్ప పొక్సో కేసు విచారణపై సుప్రీంకోర్టు స్టే

కర్ణాటక మాజీ ముఖ్యమంత్రి బి.ఎస్. యడ్యూరప్పపై పాక్సో చట్టం కింద నమోదైన లైంగిక వేధింపుల కేసులో జరుగుతున్న విచారణను సుప్రీంకోర్టు మంగళవారం నిలిపేసింది. ప్రధాన న్యాయమూర్తి సూర్యకాంత్‌, న్యాయమూర్తి జయమాల్య బాగ్చీ సభ్యులుగా ఉన్న ధర్మాసనం ఈ మేరకు మధ్యంతర ఉత్తర్వులు జారీ చేసింది. కేసును రద్దు చేయాలంటూ కర్ణాటక హైకోర్టులో యడ్యూరప్ప దాఖలు చేసిన పిటిషన్‌ను తిరస్కరించిన నేపథ్యంలో ఆయనే సుప్రీంకోర్టును ఆశ్రయించారు.

దీంతో నోటీసు జారీ చేయండి. ఇంతకాలం విచారణ కొనసాగించరాదు అని సీజేఐ సూర్య కాంత్ అన్నారు. కేసును మళ్లీ హైకోర్టుకు పంపించే అవకాశం ఉందని ప్రాథమికంగా పరిశీలించేందుకే నోటీసు జారీ చేస్తున్నట్టు ధర్మాసనం తెలిపింది. యడ్యూరప్ప తరపు సీనియర్ న్యాయవాది సిద్ధార్థ్ లూథ్రా వాదనలు వినిపిస్తూ హైకోర్టు కీలక ఆధారాలను పట్టించుకోలేదని ఏమీ జరగలేదని సూచించే పలు ప్రకటనలను కూడా పరిగణనలోకి తీసుకోలేదని వాదించారు. ప్రాసిక్యూషన్ కొన్ని ప్రకటనలను దాచిపెట్టింది. హైకోర్టు వాస్తవాలను విస్మరించింది. ఆయన నాలుగుసార్లు ముఖ్యమంత్రిగా పనిచేశారని లూథ్రా అన్నారు.

ఈ కేసు 2024 మార్చి 14న నమోదైంది. ఓ మహిళ (ఇప్పటికే మృతిచెందింది) తన 17ఏళ్ల కుమార్తెను సహాయం కోసం యడ్యూరప్ప ఇంటికి తీసుకెళ్లిన సమయంలో ఆయన ఆమెను లైంగికంగా వేధించారని ఆరోపించారు. అనంతరం విషయం కప్పిపుచ్చేందుకు డబ్బు ఇవ్వడానికి యత్నించాడని కూడా ఫిర్యాదులో పేర్కొన్నారు.

ఈ నేపథ్యంలో పాక్సో చట్టం సహా సంబంధించిన సెక్షన్ల కింద పోలీసులు ఎఫ్ఐఆర్‌ నమోదు చేశారు. అనంతరం 2024 జూలై 4న ట్రయల్‌ కోర్టు యడ్యూరప్పతో పాటు మరో ముగ్గురిపై ఆధారాలు నశింపజేసే ప్రయత్నం, కేసును దాచిపెట్టే యత్నం ఆరోపణలతో నేర పరిణామాలను పరిగణలోకి తీసుకుంది. అయితే ఆ ఉత్తర్వు అస్పష్టంగా ఉందంటూ కర్ణాటక హైకోర్టు రద్దు చేసి, ట్రయల్‌ కోర్టు మళ్లీ పరిశీలించాలని ఆదేశించింది. దీంతో ఫిబ్రవరి 28, 2025న ఫాస్ట్‌ట్రాక్‌ స్పెషల్‌ కోర్టు కొత్తగా సమన్లు జారీ చేసి, మార్చి 15న హాజరు కావాలని కోరింది. ఈ నేపథ్యంలో కేసు రాజకీయ ప్రేరణతో కూడుకున్నదని, ఆరోపణల్లో ఏకరీతిలేదని వాదిస్తూ యడ్యూరప్ప హైకోర్టును మరోసారి ఆశ్రయించారు. అయితే గత నెలలో హైకోర్టు కేసును రద్దు చేయడానికి నిరాకరించడంతో ఆయన సుప్రీంకోర్టుకు వెళ్లారు.