మేడ్చల్ మున్సిపల్ ఎన్నికల ప్రచారంలో జోరు పెంచిన ఎమ్మెల్యే మల్లారెడ్డి
మున్సిపల్ ఎన్నికల వేళ మేడ్చల్ నియోజకవర్గంలో రాజకీయ సమీకరణాలు వేగంగా మారుతున్నాయి. అలియాబాద్ మున్సిపాలిటీలో కాంగ్రెస్ పార్టీకి గట్టి ఎదురుదెబ్బ తగిలింది. ఆ పార్టీకి చెందిన ముఖ్య నాయకులు బండి లక్ష్మి, బండి రామ్ రెడ్డి, బండి శ్రీకర్ రెడ్డిలతో పాటు సుమారు 20 మంది కార్యకర్తలు కాంగ్రెస్ను వీడి బీఆర్ఎస్ లో చేరారు.
మాజీ మంత్రి, స్థానిక ఎమ్మెల్యే మల్లారెడ్డి సమక్షంలో ఈ చేరికలు జరిగాయి. పార్టీలోకి వచ్చిన వారికి ఆయన గులాబీ కండువాలు కప్పి సాదరంగా ఆహ్వానించారు. బీఆర్ఎస్ ప్రభుత్వ అభివృద్ధి పనులకు ఆకర్షితులై వీరంతా పార్టీలో చేరినట్లు మల్లారెడ్డి ఈ సందర్భంగా పేర్కొన్నారు.
అలియాబాద్లో హోరెత్తిన ప్రచారం
చేరికల అనంతరం అలియాబాద్ మున్సిపాలిటీ పరిధిలో బీఆర్ఎస్ ఎన్నికల ప్రచారం ముమ్మరంగా సాగింది. ఎమ్మెల్యే మల్లారెడ్డి స్వయంగా రోడ్ షోలో పాల్గొని ప్రజలను ఉద్దేశించి మాట్లాడారు. బీఆర్ఎస్ బలపరిచిన అభ్యర్థులను అత్యధిక మెజారిటీతో గెలిపించాలని ఆయన ఓటర్లను అభ్యర్థించారు.
మున్సిపాలిటీ ఎన్నికల వ్యూహంలో భాగంగా గ్రామంలో కార్నర్ మీటింగ్ నిర్వహించారు. వార్డుల వారీగా సమస్యలను అడిగి తెలుసుకుంటూ, బీఆర్ఎస్ చేసిన అభివృద్ధిని వివరిస్తూ మల్లారెడ్డి ప్రచారాన్ని కొనసాగించారు. నియోజకవర్గ అభివృద్ధి బీఆర్ఎస్తోనే సాధ్యమని, ప్రజలంతా కారు గుర్తుకే ఓటు వేయాలని ఆయన పిలుపునిచ్చారు. ఈ భారీ చేరికలతో అలియాబాద్లో బీఆర్ఎస్ శ్రేణుల్లో కొత్త ఉత్సాహం నెలకొంది.