మేడారం మహాజాతర... ట్రాఫిక్ విషయంలో మాత్రమే స్వల్ప ఇబ్బంది: మంత్రి సీతక్క

ఆసియాలోనే అతిపెద్ద గిరిజన జాతరగా పేరొందిన మేడారం సమ్మక్క-సారలమ్మ మహాజాతర అత్యంత వైభవంగా ముగిసింది. ఈ సందర్భంగా రాష్ట్ర పంచాయతీరాజ్ శాఖ మంత్రి సీతక్క జాతర నిర్వహణపై హర్షం వ్యక్తం చేస్తూ, సహకరించిన ప్రతి ఒక్కరికీ ధన్యవాదాలు తెలిపారు.

జాతర విజయవంతం కావడం వెనుక ప్రభుత్వం, అధికారుల చిత్తశుద్ధి ఉందని మంత్రి పేర్కొన్నారు. భక్తిభావంతో రాత్రింబవళ్లు కష్టపడి పని చేసిన ప్రతి అధికారిని, సిబ్బందిని ఆమె పేరుపేరునా అభినందించారు. శ‌నివారం వరకు అమ్మవార్ల దర్శనాలు ఎంతో సజావుగా సాగాయి. ట్రాఫిక్ విషయంలో ఎదురైన స్వల్ప ఇబ్బందులను మినహాయిస్తే, భక్తులకు ఎక్కడా అసౌకర్యం కలగకుండా అన్ని ఏర్పాట్లు చేశాం అని ఆమె వివరించారు.

ప్రయాణంలో గానీ, దర్శన సమయాల్లో గానీ కొన్ని చిన్నచిన్న ఇబ్బందులు తలెత్తినప్పటికీ, భక్తులు ఎంతో ఓపికతో, విశాల హృదయంతో ప్రభుత్వానికి సహకరించారని మంత్రి కొనియాడారు. వనదేవతల మహిమ ఈ రోజు దేశవ్యాప్తంగా, ఇతర రాష్ట్రాలకు కూడా విస్తృతంగా వ్యాపించింది. ఇది మన రాష్ట్రానికే గర్వకారణం అని ఆమె వ్యాఖ్యానించారు.

ముందున్న లక్ష్యం: శాశ్వత అభివృద్ధి

జాతర ముగిసినప్పటికీ, మేడారంలో చేపట్టాల్సిన మిగిలిన అభివృద్ధి పనులను త్వరలోనే పూర్తి చేస్తామని మంత్రి హామీ ఇచ్చారు. భవిష్యత్తులో భక్తులకు ఇంకా మెరుగైన సౌకర్యాలు కల్పించేలా ప్రణాళికలు సిద్ధం చేస్తున్నట్లు తెలిపారు. ఈ మహాజాతరను నిస్వార్థంగా విజయవంతం చేసిన ప్రతి ఒక్కరికీ ఆమె హృదయపూర్వక కృతజ్ఞతలు తెలియజేశారు.