మెస్సీ ఈవెంట్ వివాదం: రూ.50 కోట్ల పరువు నష్టం దావా వేసిన గంగూలీ
భారత క్రికెట్ మాజీ కెప్టెన్ సౌరవ్ గంగూలీ ఒక ఫుట్బాల్ ఫ్యాన్ క్లబ్ నిర్వాహకుడిపై రూ. 50 కోట్ల పరువు నష్టం దావా వేశారు. ఇటీవల ఫుట్బాల్ స్టార్ మెస్సీ కోల్కతా పర్యటనలో జరిగిన గందరగోళానికి, గంగూలీకి ఎటువంటి సంబంధం లేకపోయినా.. కావాలనే ఆయన పేరును ఆ వివాదంలోకి లాగారు. తనపై అబద్ధపు ఆరోపణలు చేస్తూ, తన గౌరవానికి భంగం కలిగించేలా మాట్లాడినందుకు ఆగ్రహం వ్యక్తం చేస్తూ గంగూలీ ఈ కఠిన నిర్ణయం తీసుకున్నారు.
అసలు ఏం జరిగింది?
అర్జెంటీనా ఫుట్బాల్ దిగ్గజం లియోనెల్ మెస్సీ ఇటీవల కోల్కతా పర్యటనకు వచ్చినప్పుడు స్టేడియంలో పెద్ద ఎత్తున గొడవలు జరగడం, మెస్సీ మధ్యలోనే వెళ్లిపోవడం తెలిసిందే. ఈ పర్యటనను నిర్వహించిన శతద్రు దత్తాను పోలీసులు ఇప్పటికే అరెస్ట్ చేశారు. అయితే 'అర్జెంటీనా ఫుట్బాల్ ఫ్యాన్ క్లబ్' ప్రతినిధి ఉత్తమ్ సాహా ఒక ఇంటర్వ్యూలో మాట్లాడుతూ.. మెస్సీ పర్యటన వెనుక అసలు వ్యక్తి సౌరవ్ గంగూలీ అని, అరెస్ట్ అయిన శతద్రు దత్తా కేవలం పేరుకే ఉన్నాడని ఆరోపించారు.
గంగూలీ స్పందన
తనపై వచ్చిన ఈ ఆరోపణలను గంగూలీ తీవ్రంగా ఖండించారు. ఎటువంటి ఆధారాలు లేకుండా నోటికొచ్చినట్లు మాట్లాడుతున్నారని మండిపడుతూ, ఉత్తమ్ సాహాకు రూ.50 కోట్ల పరువు నష్టం నోటీసులు పంపారు. గురువారం కోల్కతా సైబర్ సెల్ పోలీసులకు గంగూలీ ఈమెయిల్ ద్వారా ఫిర్యాదు చేశారు. తన ఇమేజ్ను దెబ్బతీసేందుకు కావాలనే ఇలాంటి అబద్ధపు ప్రచారాలు చేస్తున్నారని ఆయన పేర్కొన్నారు. దశాబ్దాల కాలంగా క్రీడాకారుడిగా, అడ్మినిస్ట్రేటర్గా తను సంపాదించుకున్న గౌరవాన్ని ఈ వ్యాఖ్యలు దెబ్బతీశాయని, దీనివల్ల మానసిక ప్రశాంతత కోల్పోయానని గంగూలీ ఆవేదన వ్యక్తం చేశారు.
ఆ రోజు ఏం జరగాల్సింది?
నిజానికి డిసెంబర్ 13న సాల్ట్ లేక్ స్టేడియంలో జరిగిన కార్యక్రమంలో ముఖ్యమంత్రి మమతా బెనర్జీతో కలిసి గంగూలీ కూడా పాల్గొనాల్సి ఉంది. మెస్సీని సన్మానించే వేదికపై గంగూలీ కూడా అక్కడే ఉండాల్సింది. కానీ, స్టేడియంలో ఒక్కసారిగా ప్రేక్షకులు రెచ్చిపోయి గొడవ చేయడంతో ఆ కార్యక్రమం అర్ధాంతరంగా రద్దయ్యింది. ఆ గందరగోళానికి గంగూలీకి ఎలాంటి సంబంధం లేకపోయినా, కావాలనే కొందరు ఆయన పేరును ఈ వివాదంలోకి లాగుతున్నారని గంగూలీ లాయర్లు చెబుతున్నారు. ప్రస్తుతం గంగూలీ ఇచ్చిన ఫిర్యాదుపై కోల్కతా పోలీసులు లోతుగా దర్యాప్తు చేస్తున్నారు.