మెక్సికో భామ ఫాతిమా బోష్కు 'మిస్ యూనివర్స్ 2025' కిరీటం
ఈ సంవత్సరం మిస్ యూనివర్స్ (విశ్వ సుందరి) 2025 కిరీటాన్ని మెక్సికో దేశానికి చెందిన అందాల భామ ఫాతిమా బోష్ గెలుచుకున్నారు. థాయ్లాండ్లోని నోంథబురిలో జరిగిన ఈ 74వ మిస్ యూనివర్స్ పోటీల గ్రాండ్ ఫినాలేలో ఆమె తన అందం, ప్రతిభతో అందరినీ వెనక్కి నెట్టి విజేతగా నిలిచారు. గత ఏడాది విజేత, డెన్మార్క్కు చెందిన విక్టోరియా కెజార్ హెల్విగ్ చేతుల మీదుగా ఫాతిమా కిరీటాన్ని అందుకున్నారు. విజేతగా ప్రకటించగానే ఫాతిమా ఆనందంతో ఉప్పొంగిపోయారు. ఫాతిమా వయసు 25 సంవత్సరాలు. ఆమె ఫ్యాషన్ డిజైనింగ్లో గ్రాడ్యుయేషన్ పూర్తి చేశారు. చిన్నతనంలో ఎదుర్కొన్న ఆరోగ్య సమస్యలను అధిగమించి, ఈ అంతర్జాతీయ వేదికపై నిలబడటం గొప్ప విషయం అని ఆమె తెలిపారు.
ఫైనల్ రౌండ్లో మహిళల భద్రత, సమాన అవకాశాలు అనే అంశంపై న్యాయనిర్ణేతలు అడిగిన ప్రశ్నకు ఫాతిమా ఇచ్చిన సమాధానం ఆమెకు విజయాన్ని అందించింది. నేటికీ మహిళలు ఎన్నో అడ్డంకులు ఎదుర్కొంటున్నారని, అయితే ఇప్పుడు యువతులు ధైర్యంగా తమ భావాలను వ్యక్తం చేస్తున్నారని ఆమె చెప్పారు. తాను ఈ కిరీటం ద్వారా మహిళలకు మరింత సురక్షితమైన వాతావరణాన్ని సృష్టించడానికి కృషి చేస్తానని హామీ ఇచ్చారు. ఈ పోటీల్లో థాయ్లాండ్కు చెందిన ప్రవీణార్ సింగ్ 1వ రన్నరప్గా, వెనిజులాకు చెందిన స్టెఫానీ అబాలి 2వ రన్నరప్గా నిలిచారు. ఈ పోటీల్లో మన దేశానికి చెందిన బ్యాడ్మింటన్ స్టార్ సైనా నెహ్వాల్ కూడా న్యాయ నిర్ణేతల్లో ఒకరిగా వ్యవహరించడం విశేషం.
ఈ పోటీల్లో భారత్ తరపున రాజస్థాన్కు చెందిన మణిక విశ్వకర్మ పాల్గొన్నారు. మణిక గట్టి పోటీ ఇచ్చి టాప్ 30 వరకు చేరుకున్నప్పటికీ, టాప్ 12కు అర్హత సాధించలేకపోయారు. దీంతో ఈ ఏడాది భారత్కు విశ్వ సుందరి కిరీటం చేజారింది. ఇక కిరీటం గెలుచుకున్న ఫాతిమా బోష్కు ప్రైజ్ మనీగా సుమారు 2,50,000 డాలర్లు (దాదాపు రూ. 2.21 కోట్లు) దక్కే అవకాశం ఉంది. దీంతో పాటు ఆమెకు ఏడాది పాటు న్యూయార్క్లో ఉచిత నివాసం, ప్రపంచవ్యాప్తంగా ప్రయాణించే అవకాశం, పలు ఎండార్స్మెంట్ల ద్వారా భారీ ఆదాయం లభిస్తుంది.