మెక్సికోలో భారీ భూకంపం.. తీవ్రత 6.5గా నమోదు

మెక్సికో దేశంలో శుక్రవారం భారీ భూకంపం సంభవించింది. రిక్టర్ స్కేలుపై దీని తీవ్రత 6.5గా నమోదైంది. దేశంలోని దక్షిణ, మధ్య ప్రాంతాల్లో భూమి బలంగా కంపించడంతో ప్రజలు తీవ్ర భయాందోళనకు గురయ్యారు. భూకంప హెచ్చరిక సైరన్లు మోగగానే ప్రజలు, పర్యాటకులు ఇళ్లలో నుంచి, హోటళ్ల నుంచి బయటకు పరుగులు తీశారు.

ప్రెసిడెంట్ ప్రెస్ మీట్ మధ్యలోనే అలారం

కొత్త సంవత్సరం సందర్భంగా మెక్సికో అధ్యక్షురాలు క్లాడియా షైన్‌బామ్ తన మొదటి విలేకరుల సమావేశంలో మాట్లాడుతుండగా ఈ భూకంపం సంభవించింది. సైరన్లు మోగడంతో ఆమె తన ప్రసంగాన్ని మధ్యలోనే ఆపివేశారు. పరిస్థితి సద్దుమణిగిన తర్వాత ఆమె తిరిగి మాట్లాడుతూ.. ఈ ఘటనలో ఎవరికీ ఎటువంటి ప్రమాదం జరగలేదని, ప్రాణనష్టం లేదని గెర్రెరో రాష్ట్ర గవర్నర్‌తో మాట్లాడి ధృవీకరించుకున్నట్లు తెలిపారు.

ఎక్కడ జరిగింది?

మెక్సికో నేషనల్ సిస్మోలాజికల్ ఏజెన్సీ ప్రకారం, దక్షిణ రాష్ట్రమైన గెర్రెరోలోని సాన్ మార్కోస్ పట్టణానికి సమీపంలో భూకంప కేంద్రం ఉంది. ఇది ప్రముఖ పర్యాటక ప్రాంతమైన అకాపుల్కోకు దగ్గరగా ఉంటుంది. భూమి లోపల సుమారు 21.7 మైళ్ల లోతులో కదలికలు సంభవించాయని శాస్త్రవేత్తలు తెలిపారు.

పరిస్థితి ఎలా ఉంది?

భూకంపం ధాటికి అకాపుల్కో పరిసర ప్రాంతాల్లోని రహదారులపై కొన్ని చోట్ల కొండచరియలు విరిగిపడ్డాయి. బలమైన శబ్దంతో భూమి కంపించిందని, కుక్కలు భయంతో అరిచాయని స్థానికులు చెబుతున్నారు. అకాపుల్కోకు ఆగ్నేయ దిశలో ఉన్న కొన్ని ప్రాంతాల్లో సమాచార వ్యవస్థ దెబ్బతినడంతో అక్కడి వారితో సంబంధాలు తెగిపోయినట్లు సమాచారం.