మునిసిపల్ ఎన్నికల నగారా: రంగం సిద్ధం చేసిన రాష్ట్ర ఎన్నికల సంఘం

తెలంగాణ రాష్ట్రంలో పట్టణ పోరుకు కౌంట్‌డౌన్ మొదలైంది. రాష్ట్రంలోని 117 మునిసిపాలిటీలు 7 మునిసిపల్ కార్పొరేషన్ల రెండవ సాధారణ ఎన్నికల నిర్వహణకు రాష్ట్ర ఎన్నికల సంఘం కసరత్తు వేగవంతం చేసింది.

ఈ నేపథ్యంలో రాష్ట్ర ఎన్నికల కమిషనర్ రాణి కుముదిని, జిల్లా కలెక్టర్లు, మునిసిపల్ కమిషనర్లతో ఉన్నత స్థాయి వీడియో కాన్ఫరెన్స్ నిర్వహించారు. ఎన్నికల సన్నద్ధతపై అధికారులకు కీలక ఆదేశాలు జారీ చేశారు.

ఓటర్ల జాబితా షెడ్యూల్ ఇదే:

తెలంగాణ మునిసిపాలిటీ చట్టం, 2019 (సెక్షన్ 195-A) ప్రకారం ఓటర్ల జాబితా తయారీకి గడువును నిర్ణయించారు

• జనవరి 12, 2026 న వార్డుల వారీగా తుది ఓటర్ల జాబితా ప్రచురణ.

• జనవరి 13, 2026 న పోలింగ్ స్టేషన్ల ముసాయిదా జాబితా విడుదల, 'టీ-పోల్' సాఫ్ట్‌వేర్‌లో అప్‌లోడ్.

• జనవరి 16, 2026న ఫోటోలతో కూడిన తుది ఓటర్ల జాబితా పోలింగ్ కేంద్రాల వారీగా పూర్తిస్థాయిలో వెల్లడి.

ఎన్నికల నిర్వహణలో ఎటువంటి లోపాలు తలెత్తకుండా అధికారులకు కమిషనర్ స్పష్టమైన సూచనలు ఇచ్చారు. రిటర్నింగ్ అధికారులు, సహాయ రిటర్నింగ్ అధికారులు, నిఘా కోసం ఫ్లయింగ్ స్క్వాడ్ టీమ్స్, స్టాటిక్ సర్వైలెన్స్ టీమ్స్ లను తక్షణమే నియమించాలని పోలింగ్ సిబ్బంది నియామకంపై ఆదేశాలు జారీ చేశారు. పోలింగ్‌కు అవసరమయ్యే బ్యాలెట్ బాక్సులను సిద్ధం చేసుకోవాలని, ఎన్నికల విధుల్లో పాల్గొనే ఉద్యోగుల వివరాలన్నింటినీ టీ-పోల్ పోర్టల్‌లో అప్‌డేట్ చేయాలని ఆదేశించారు.

నల్లగొండ మునిసిపాలిటీకి 'కార్పొరేషన్' హోదా:

ఇటీవల అసెంబ్లీ సమావేశాల్లో నల్లగొండ మునిసిపాలిటీని కార్పొరేషన్ హోదాకు పెంచుతూ సవరణ బిల్లును ఆమోదించారు. దీంతో పాటు కొత్తగా ఏర్పడిన మరికొన్ని కార్పొరేషన్లకు కూడా ఇదే విడతలో ఎన్నికలు నిర్వహించనున్నారు. దీనితో ఎన్నికల గణాంకాల ప్రకారం, మొత్తం మునిసిపాలిటీలు 116 + ఉండగా మునిసిపల్ కార్పొరేషన్లు 7 ఉన్నాయి.

ముఖ్య గమనిక

జనవరి 12న తుది ఓటర్ల జాబితా విడుదల కానుంది. ఓటర్లు తమ పేర్లను తనిఖీ చేసుకోవడానికి సంబంధిత మునిసిపల్ కార్యాలయం లేదా ఆన్‌లైన్ పోర్టల్‌ను సంప్రదించవచ్చు.