ముగిసిన పార్లమెంట్ శీతాకాల సమావేశాలు

పార్లమెంట్ శీతాకాల సమావేశాలు శుక్రవారం ముగిశాయి. మొత్తం 15 రోజుల పాటు పార్లమెంట్ ఉభయ సభలు పనిచేశాయి. గత కొన్ని సంవత్సరాలతో పోలిస్తే ఈసారి సభల్లో ఆందోళనలు తక్కువగా, చర్చలు ఎక్కువగా జరగడం విశేషం. రాజ్యసభలో ఏకంగా 121 శాతం, లోక్‌సభలో 111 శాతం ఉత్పాదకత నమోదైంది. అంటే, సభ్యులు తమకు కేటాయించిన సమయం కంటే ఎక్కువ సేపు సభలో కూర్చుని దేశానికి సంబంధించిన కీలక సమస్యలపై చర్చించారన్నమాట.

రాజ్యసభ పనితీరుపై ఛైర్మన్ ప్రశంసలు

రాజ్యసభ 269వ సమావేశాల ముగింపు సందర్భంగా చైర్మన్, ఉపరాష్ట్రపతి సీపీ రాధాకృష్ణన్ సభ్యులను ఉద్దేశించి ప్రసంగించారు. తాను ఉపరాష్ట్రపతిగా బాధ్యతలు స్వీకరించిన తర్వాత మొదటిసారి ఈ సమావేశాలకు అధ్యక్షత వహించడం చాలా సంతోషంగా ఉందని, ఇది తనకు ఎంతో ప్రత్యేకమని ఆయన పేర్కొన్నారు. ప్రధానమంత్రి, మంత్రులు, బీజేపీ జాతీయ అధ్యక్షుడు జేపీ నడ్డా, ప్రతిపక్ష నాయకుడు మల్లికార్జున ఖర్గే సహా అన్ని పార్టీల సభ్యులు తనకు అందించిన అభినందనలకు కృతజ్ఞతలు తెలిపారు. ఈ శీతాకాల సమావేశాలు సజావుగా సాగడానికి ఎంపీలందరూ పూర్తిస్థాయిలో సహకరించారని ఆయన మెచ్చుకున్నారు. ముఖ్యంగా, దేశ సమస్యల కోసం ఐదుసార్లు సభ్యులు భోజన విరామాన్ని కూడా వదులుకున్నారని, రాత్రి వరకు సభలో ఉండి చర్చల్లో పాల్గొనడం గొప్ప విషయమని ఆయన కొనియాడారు.

జీరో అవర్‌లో రికార్డు స్థాయిలో అంశాలు

ఈ సమావేశాల్లో అత్యవసర ప్రజా సమస్యలను చర్చించే 'జీరో అవర్'లో సభ్యులు రికార్డు స్థాయిలో స్పందించారని రాజ్యసభ చైర్మన్ తెలిపారు. రోజుకు సగటున 84 విజ్ఞప్తులు (నోటీసులు) రాగా, ఇది గతంతో పోలిస్తే 31 శాతం ఎక్కువని ఆయన పేర్కొన్నారు. అలాగే ప్రతిరోజూ కనీసం 15 ముఖ్యమైన అంశాలపై సభ్యులు చర్చలు జరిపారని, గత సెషన్లతో పోలిస్తే ఇది 50 శాతం అదనమని చెప్పారు. ఈ సందర్భంగా ఆయన మాట్లాడుతూ.. "దేశ ప్రజలు మనల్ని ప్రజాస్వామ్యాన్ని కాపాడే సంరక్షకులుగా భావిస్తారు, అందుకే వారి నమ్మకాన్ని నిలబెట్టుకుంటూ మనం ఇలాగే బాధ్యతగా పనిచేయాలి" అని సభ్యులకు పిలుపునిచ్చారు.

ఈ సమావేశాల్లో జరిగిన చర్చల నాణ్యతను చైర్మన్ ప్రత్యేకంగా ప్రశంసించారు. ముఖ్యంగా మన జాతీయ గేయం 'వందేమాతరం' 150 ఏళ్లు పూర్తి చేసుకున్న సందర్భంగా రెండు రోజుల పాటు ప్రత్యేక చర్చ జరిగిందని, ఇందులో 82 మంది సభ్యులు పాల్గొని గొప్పగా మాట్లాడారని ఆయన తెలిపారు. అలాగే, దేశ ఎన్నికల విధానంలో తీసుకురావాల్సిన మార్పుల (ఎన్నికల సంస్కరణలు) గురించి మూడు రోజుల పాటు సుదీర్ఘంగా చర్చించారని, ఇందులో 57 మంది సభ్యులు తమ విలువైన సలహాలను, అభిప్రాయాలను పంచుకున్నారని ఆయన వివరించారు.

ఈ శీతాకాల సమావేశాల్లో రాజ్యసభ పనితీరుపై చైర్మన్ కీలక వివరాలు వెల్లడించారు. మొత్తం 92 గంటల పాటు సభ జరగగా, నిర్ణీత సమయం కంటే ఎక్కువ సేపు పనిచేయడం వల్ల 121 శాతం ఉత్పాదకత నమోదైందని ఆయన తెలిపారు. ఈ సమయంలో దేశానికి ఎంతో ముఖ్యమైన 8 బిల్లులను సభ ఆమోదించింది. ఇందులో నీటి కాలుష్యాన్ని అరికట్టేందుకు ఉద్దేశించిన చట్టంలో మార్పులు చేస్తూ తీసుకొచ్చిన తీర్మానం కూడా ఉంది. ప్రజా సమస్యలపై సభ్యులు ఎంతో చురుగ్గా స్పందించారని.. మంత్రి నేరుగా సమాధానం చెప్పే 'స్టార్' ప్రశ్నలు 58, అత్యవసర అంశాలకు సంబంధించిన 'జీరో అవర్' చర్చలు 208, మరియు మరో 87 ప్రత్యేక అంశాలపై సభలో చర్చ జరిగిందని ఆయన వివరించారు. ప్రభుత్వం ప్రవేశపెట్టినవే కాకుండా, సభ్యులు వ్యక్తిగతంగా తెచ్చిన 'ప్రైవేట్ మెంబర్ బిల్లుల'కు కూడా ఈసారి మంచి స్పందన లభించిందని ఆయన సంతోషం వ్యక్తం చేశారు.

అయితే కొంతమంది ప్రతిపక్ష సభ్యులు నినాదాలు చేయడం, ప్లకార్డులు చూపడం, సభ మధ్యలో పత్రాలు విసరడం వంటి అనుచిత ప్రవర్తనను ఛైర్మన్ తీవ్రంగా ఖండించారు. భవిష్యత్తులో పార్లమెంటరీ గౌరవాన్ని కాపాడాలని సభ్యులను కోరారు. సమావేశాల ముగింపులో క్రిస్మస్, నూతన సంవత్సరం, లోహ్రీ, మకర సంక్రాంతి, పొంగల్, మాఘ్ బిహు వంటి పండుగల సందర్భంగా సభ్యులకు, వారి కుటుంబ సభ్యులకు చైర్మన్ శుభాకాంక్షలు తెలిపారు.

లోక్‌సభ సమావేశాలు

లోక్‌సభ స్పీకర్ ఓం బిర్లా 18వ లోక్‌సభ శీతాకాల సమావేశాల ముగింపును ప్రకటించారు. మొత్తం 15 రోజుల పాటు సాగిన ఈ సమావేశాల్లో సభ్యులందరూ ఎంతో ఉత్సాహంగా పాల్గొని ప్రజా సమస్యలపై చర్చించారని ఆయన తెలిపారు. ఈసారి లోక్‌సభ నిర్ణీత సమయం కంటే ఎక్కువ సేపు పని చేసి 111 శాతం ఉత్పాదకతను సాధించిందని, ఇది మన ప్రజాస్వామ్యాన్ని మరింత బలోపేతం చేసే దిశగా సభ్యులు చేసిన కృషికి నిదర్శనమని స్పీకర్ కొనియాడారు. రాజ్యసభలో లాగే లోక్‌సభలో కూడా 'వందేమాతరం' 150 ఏళ్ల వేడుకలు, ఎన్నికల సంస్కరణల వంటి ముఖ్యమైన అంశాలపై సభ్యులు లోతుగా చర్చించారు. ప్రజల ఇబ్బందులను ప్రభుత్వం దృష్టికి తీసుకురావడంలో ఎంపీలు విజయవంతమయ్యారని ఓం బిర్లా ఈ సందర్భంగా వారిని అభినందించారు.

ఏం చర్చించారు? ఏయే బిల్లులు ఆమోదించారు?

ఈ శీతాకాల సమావేశాల్లో ప్రభుత్వం మొత్తం 59 బిల్లులను సభలో ప్రవేశపెట్టగా, ఉభయ సభలు సుదీర్ఘ చర్చల అనంతరం 8 ముఖ్యమైన బిల్లులకు ఆమోదం తెలిపాయి. వీటిలో ప్రధానంగా బీమా రంగంలో విదేశీ పెట్టుబడుల పరిమితిని ఏకంగా 100 శాతానికి పెంచుతూ తీసుకున్న నిర్ణయం ఆర్థిక రంగంలో పెద్ద మార్పుగా కనిపిస్తోంది. అలాగే, దేశ ఇంధన అవసరాల కోసం పౌర అణు శక్తి రంగంలోకి ప్రైవేటు సంస్థల భాగస్వామ్యాన్ని అనుమతించేలా చట్టాన్ని సవరించారు. గ్రామీణ ఉపాధి విషయంలో ఒక కీలక మార్పు చేస్తూ, ఇప్పటివరకు అమలులో ఉన్న మహాత్మా గాంధీ జాతీయ గ్రామీణ ఉపాధి హామీ పథకం స్థానంలో 'వీబీ జీ రామ్ జీ' బిల్లును తీసుకువచ్చారు. వీటితో పాటుగా ఎన్నికల సంస్కరణలపై మూడు రోజుల పాటు, వందేమాతరం గేయం 150 ఏళ్లు పూర్తి చేసుకున్న సందర్భంగా రెండు రోజుల పాటు సభ్యులు వాడీవేడీగా చర్చలు జరిపారు.