ముంబై జట్టులో చేరిన రోహిత్ శర్మ.. ఐపీఎల్ ప్రాక్టీస్ షురూ

భారత స్టార్ బ్యాటర్, 'హిట్‌మ్యాన్' రోహిత్ శర్మ ఐపీఎల్ 2026 సీజన్ కోసం తన సన్నద్ధతను వేగవంతం చేశారు. ఐదుసార్లు ఛాంపియన్ ముంబై ఇండియన్స్ జట్టుతో చేరిన ఆయన, అప్పుడే మైదానంలో చెమటోడ్చడం ప్రారంభించారు. ముంబై ఇండియన్స్ శిక్షణ జెర్సీని ధరించి, తనదైన శైలిలో భారీ షాట్లతో నెట్స్‌లో విరుచుకుపడుతున్న వీడియోను రోహిత్ తన ఇన్‌స్టాగ్రామ్‌లో పంచుకున్నారు. 38 ఏళ్ల వయసులోనూ అదే పదునుతో రోహిత్ బ్యాటింగ్ చేస్తుండటం చూసి అభిమానులు ఖుషీ అవుతున్నారు. సోమవారం నుంచే ముంబై జట్టు అధికారికంగా తమ ప్రి-సీజన్ శిక్షణను ప్రారంభించగా, రోహిత్ చేరికతో శిబిరంలో మరింత ఉత్సాహం నెలకొంది.

ముంబై చరిత్రలో చెరగని ముద్ర

ఐపీఎల్ చరిత్రలో అత్యంత విజయవంతమైన ఆటగాళ్లలో రోహిత్ ఒకరు. ఇప్పటివరకు ఆయన ఆరు ఐపీఎల్ టైటిళ్లను తన ఖాతాలో వేసుకున్నారు. డెక్కన్ చార్జర్స్‌తో ఒకసారి, ముంబై ఇండియన్స్‌కు సారథిగా ఐదుసార్లు (2013, 2015, 2017, 2019, 2020) ట్రోఫీని అందించారు. 2011లో ముంబై గూటికి చేరిన రోహిత్, 2013లో పగ్గాలు చేపట్టిన తొలి ఏడాదే జట్టుకు తొలి టైటిల్ అందించారు. దాదాపు 11 ఏళ్ల పాటు విజయవంతంగా జట్టును నడిపించిన రోహిత్, 2024లో కెప్టెన్సీ బాధ్యతల నుంచి తప్పుకున్న విషయం తెలిసిందే. లీగ్‌లో 6000 పరుగుల మార్కును దాటిన నలుగురు బ్యాటర్లలో ఒకరైన రోహిత్, ఈసారి ఆటగాడిగా జట్టుకు మరో టైటిల్ అందించాలని పట్టుదలతో ఉన్నారు.

జయవర్ధనే పర్యవేక్షణలో కఠిన శిక్షణ

ముంబై ఇండియన్స్ ప్రధాన కోచ్ మహేల జయవర్ధనే నేతృత్వంలో ఈ శిక్షణ శిబిరం సాగుతోంది. బౌలింగ్ కోచ్‌లు లసిత్ మలింగ, పారస్ మాంబ్రే, ఫీల్డింగ్ కోచ్ కార్ల్ హాప్కిన్‌సన్ పర్యవేక్షణలో ఆటగాళ్లు సాధన చేస్తున్నారు. ఫిజియోథెరపీ, స్ట్రెంత్ అండ్ కండిషనింగ్ బృందాలు కూడా అందుబాటులో ఉండి ఆటగాళ్ల ఫిట్‌నెస్‌ను పర్యవేక్షిస్తున్నాయి. "మొదటి రోజు శిక్షణ ఎప్పుడూ ప్రత్యేకం. ఆటగాళ్లలో కొత్త ఉత్సాహం కనిపిస్తోంది. పాత, కొత్త ఆటగాళ్ల కలయికతో జట్టు పటిష్టంగా ఉంది" అని హెడ్ కోచ్ జయవర్ధనే పేర్కొన్నారు. రాబోయే కొద్ది రోజుల్లో మిగిలిన ఆటగాళ్లంతా జట్టుతో చేరనున్నారు.

ఈసారి వేలంలో ముంబై జట్టు సమతుల్యంగా కనిపిస్తోంది. హార్దిక్ పాండ్య సారథ్యంలోని ఈ జట్టులో సూర్యకుమార్ యాదవ్, జస్ప్రీత్ బుమ్రా, తిలక్ వర్మ వంటి విధ్వంసకర ఆటగాళ్లు ఉన్నారు. విదేశీ ఆటగాళ్ల కోటాలో క్వింటన్ డికాక్, ట్రెంట్ బౌల్ట్, విల్ జాక్స్, మిచెల్ సాంట్నర్, షెర్ఫేన్ రూథర్‌ఫోర్డ్ వంటి హేమాహేమీలు బరిలోకి దిగనున్నారు. దీపక్ చాహర్, శార్దూల్ ఠాకూర్, మయాంక్ మార్కండే వంటి అనుభవజ్ఞులైన భారతీయ బౌలర్ల చేరికతో ముంబై ఈసారి అత్యంత పటిష్టమైన జట్టుగా కనిపిస్తోంది.