మిజోరాన్ని భయపెడుతున్న టీబీ

మిజోరం రాష్ట్రాన్ని క్షయవ్యాధి భయపెడుతోంది. ప్రతి ఏడాది మరణాలు పెరుగుతూ ఆందోళన కలిగిస్తోంది. 2025 సంవత్సరంలో మిజోరం రాష్ట్రంలో క్షయవ్యాధి (టీబీ) కారణంగా మొత్తం 145 మంది మరణించారు. ఇది గత ఆరు సంవత్సరాల్లో నమోదైన అత్యధిక సంఖ్యగా అధికారిక గణాంకాలు వెల్లడించాయి.

నేషనల్ హెల్త్ మిషన్‌ పరిధిలో అమలవుతున్న జాతీయ క్షయ నిర్మూలన కార్యక్రమం ప్రకారం, 2025లో రాష్ట్రంలో 2,275 మంది టీబీ బారిన పడ్డారు. వీరిలో 911 మంది మహిళలు ఉన్నారు. ఇది 2024లో నమోదైన 2,291 కేసులతో పోలిస్తే స్వల్పంగా తక్కువ. కొత్తగా గుర్తించిన కేసుల్లో 1,900 కేసులు ప్రభుత్వ ఆసుపత్రుల్లో, మిగిలిన 375 కేసులు ప్రైవేటు వైద్య కేంద్రాల్లో వెలుగు చూశాయి. రాష్ట్రంలో 2020 నుంచి టీబీ మరణాలు నిరంతరం పెరుగుతున్నాయి. 2020: 31 మంది, 2021: 46, 2022: 87, 2023: 119, 2024:136, 2025: 145 మంది మరణించారు. 2025లో నమోదైన కొత్త కేసుల్లో 146 మందికి మల్టీ డ్రగ్ రెసిస్టెంట్ టీబీ (ఎండీఆర్-టీబీ)గా నిర్ధారణ కాగా, 267 మంది టీబీ–హెచ్‌ఐవీ/ఎయిడ్స్ రెండింటితో బాధపడుతున్నట్లు గణాంకాలు సూచిస్తున్నాయి.

జిల్లాల వారీగా చూస్తే, ఐజాల్ జిల్లాలో అత్యధికంగా 1,569 కేసులు నమోదయ్యాయి. ఆ తరువాత లుంగ్‌లే (155), కొలాసిబ్ (138) జిల్లాలు ఉన్నాయి. సెర్చిప్ జిల్లాలో అత్యల్పంగా 52 కేసులు మాత్రమే నమోదయ్యాయి. కొత్త రోగుల్లో 141 మంది 14 ఏళ్లలోపు పిల్లలు కాగా, మొత్తం రోగుల్లో 84 శాతం మంది విజయవంతంగా చికిత్స పొందారు. ఇదిలా ఉండగా, ప్రధాన మంత్రి టీబీ ముక్త్ భారత్ అభియాన్ కింద ఉన్న ‘నిక్షయ్’ ఆన్‌లైన్ ప్లాట్‌ఫామ్ ద్వారా టీబీ రోగులను దత్తత తీసుకోవడానికి లేదా వారికి ఆర్థిక సహాయం అందించడానికి 100 మందికి పైగా నమోదు చేసుకున్నారు అని అధికారులు తెలిపారు. ఈ కార్యక్రమం ద్వారా సమాజ భాగస్వామ్యాన్ని పెంచి, చికిత్స ఫలితాలను మెరుగుపరచడం, అలాగే కార్పొరేట్ సామాజిక బాధ్యత (సీఎస్ఆర్) కార్యకలాపాలను వినియోగించడం లక్ష్యంగా పెట్టుకున్నట్లు వారు పేర్కొన్నారు.

దేశవ్యాప్తంగా టీబీ (క్షయవ్యాధి) మరణాలను పరిశీలిస్తే మిజోరం రాష్ట్రంలో అత్యధిక మరణాల రేటు నమోదైంది. అయితే మొత్తం మరణాల సంఖ్య పరంగా చూస్తే ఉత్తరప్రదేశ్, మహారాష్ట్ర, బిహార్, మధ్యప్రదేశ్, రాజస్థాన్, తమిళనాడు వంటి పెద్ద రాష్ట్రాల్లో టీబీ మరణాలు వేల సంఖ్యలో నమోదవుతున్నాయి. జనాభాతో పోల్చినప్పుడు (డెత్ రేట్ పరంగా) మిజోరం పరిస్థితి మాత్రం తీవ్ర ఆందోళన కలిగించేలా ఉందని వారు హెచ్చరిస్తున్నారు. మిజోరం జనాభా సుమారు 12 లక్షలు మాత్రమే కాగా, 2025లో 145 మంది టీబీ కారణంగా మరణించారు. ఇది ప్రతి లక్ష జనాభాకు వచ్చే టీబీ మరణాల రేటు చాలా ఎక్కువగా ఉందని సూచిస్తోంది.

ఈ కోణంలో పరిశీలిస్తే, మిజోరం వంటి చిన్న రాష్ట్రాలు, జనాభా పరంగా పెద్ద రాష్ట్రాల కంటే అధిక డెత్ రేటును నమోదు చేస్తున్నట్లు తెలుస్తోంది. ఇది కేవలం కేసుల సంఖ్య కంటే, ఆరోగ్య వ్యవస్థ సామర్థ్యం, చికిత్స చేరువ, మల్టీ డ్రగ్ రెసిస్టెంట్ టీబీ, హెచ్‌ఐవీ–టీబీ సహవ్యాధి వంటి అంశాలపై మరింత దృష్టి పెట్టాల్సిన అవసరాన్ని సూచిస్తోంది.