మాస్కో వైపు 28 ఉక్రెయిన్ డ్రోన్లు.. కూల్చేసిన రష్యా

రష్యా-ఉక్రెయిన్ యుద్ధం తీవ్ర రూపం దాల్చుతోంది. రష్యా రాజధాని మాస్కోను లక్ష్యంగా చేసుకుని ఆదివారం ఉదయం దూసుకొచ్చిన 28 ఉక్రెయిన్ డ్రోన్లను తమ గగనతల రక్షణ వ్యవస్థలు విజయవంతంగా కూల్చివేసినట్లు మాస్కో మేయర్ సెర్గీ సోబ్యానిన్ వెల్లడించారు. వరుసగా రెండో రోజు కూడా ఉక్రెయిన్ భారీ స్థాయిలో డ్రోన్లతో విరుచుకుపడటం గమనార్హం. శనివారం కూడా 16 డ్రోన్లను అడ్డుకున్నట్లు రష్యా ప్రకటించింది. అయితే ఈ తాజా దాడుల్లో జరిగిన ఆస్తి, ప్రాణ నష్టంపై మేయర్ ఎటువంటి వివరాలు వెల్లడించలేదు.

స్తంభించిన విమాన సర్వీసులు

డ్రోన్ దాడుల హెచ్చరికల నేపథ్యంలో మాస్కోలోని ప్రధాన విమానాశ్రయాల కార్యకలాపాలకు తీవ్ర అంతరాయం కలిగింది. భద్రతా కారణాల దృష్ట్యా మాస్కోకు నైరుతి, వాయువ్య దిశల్లో ఉన్న వ్నుకోవో, షెరెమెట్యెవో అంతర్జాతీయ విమానాశ్రయాలను తాత్కాలికంగా మూసివేస్తున్నట్లు రష్యా పౌర విమానయాన సంస్థ 'రోసావియాట్సియా' ప్రకటించింది. శనివారం కూడా వ్నుకోవో, డోమోడెడోవో, జుకోవ్‌స్కీ విమానాశ్రయాలు గంటల తరబడి మూతపడటంతో ప్రయాణికులు తీవ్ర ఇబ్బందులు ఎదుర్కొన్నారు.

అన్ని వైపుల నుంచి దాడుల ఉధృతి

రష్యా రక్షణ మంత్రిత్వ శాఖ వెల్లడించిన వివరాల ప్రకారం.. ఉక్రెయిన్ తన డ్రోన్ దాడులను కేవలం మాస్కోకే పరిమితం చేయకుండా ఇతర ప్రాంతాలకు కూడా విస్తరించింది. శనివారం ఒక్క రోజే వివిధ ప్రాంతాల్లో ఏకంగా 280 ఉక్రెయిన్ డ్రోన్లను రష్యా దళాలు అడ్డుకున్నాయి. బ్రయాన్స్క్, కలుగా, బెల్గోరోడ్, ట్వెర్, స్మోలెన్స్క్, కుర్స్క్, క్రాస్నోడార్ ప్రాంతాలతో పాటు మాస్కో పరిసరాల్లోనూ ఈ భారీ కూల్చివేతలు జరిగాయి. శనివారం ఉదయం 11 నుంచి రాత్రి 9 గంటల మధ్య అత్యధిక స్థాయిలో డ్రోన్లు రష్యా గగనతలంలోకి దూసుకొచ్చినట్లు రక్షణ శాఖ పేర్కొంది.

ముందస్తు జాగ్రత్తగా ఇంటర్నెట్ కట్

ఉక్రెయిన్ డ్రోన్లు తమ లక్ష్యాలను కచ్చితంగా గుర్తించకుండా అడ్డుకోవడానికి రష్యా ప్రభుత్వం కఠిన చర్యలు చేపట్టింది. మాస్కో నగరం, దాని పరిసర ప్రాంతాల్లో ఎంపిక చేసిన చోట్ల మొబైల్ ఇంటర్నెట్ సేవలను ముందస్తు జాగ్రత్తగా నిలిపివేసింది. ప్రజలు ఇంటర్నెట్ అవసరం లేని (ఆఫ్‌లైన్) మొబైల్ అప్లికేషన్లను మాత్రమే వాడుకోవాలని అధికారులు సూచించారు. యుద్ధం మొదలైన తర్వాత మాస్కోపై ఈ స్థాయిలో వరుస దాడులు జరగడం రష్యా భద్రతా వర్గాలను అప్రమత్తం చేసింది.