మార్చిలో రూ.2 లక్షల కోట్లు దాటిన జీఎస్టీ వసూళ్లు

దేశీయంగా వస్తు సేవల పన్ను (జీఎస్టీ) వసూళ్లు సరికొత్త రికార్డుల దిశగా దూసుకుపోతున్నాయి. 2026 మార్చి నెలలో జీఎస్టీ ఆదాయం గత ఏడాదితో పోలిస్తే 9 శాతం వృద్ధి చెంది రూ.2 లక్షల కోట్ల మార్కును దాటింది. 2025-2026 ఆర్థిక సంవత్సరంలో నమోదైన వసూళ్లలో ఇవి మూడవ అత్యధిక నెలవారీ వసూళ్లు కావడం విశేషం. గతేడాది మార్చిలో రూ.1.83 లక్షల కోట్లు వసూలు కాగా, ఈసారి దిగుమతులు, దేశీయ కొనుగోళ్లు పుంజుకోవడంతో ఆదాయం భారీగా పెరిగింది. ప్రభుత్వం బుధవారం వెల్లడించిన గణాంకాల ప్రకారం.. దేశీయ ఆదాయం 5.9 శాతం పెరిగి రూ.1.46 లక్షల కోట్లుగా నమోదు కాగా, దిగుమతుల ద్వారా వచ్చే ఆదాయం ఏకంగా 17.8 శాతం వృద్ధితో రూ. 53,861 కోట్లకు చేరింది.

పన్ను కోతల తర్వాత పుంజుకున్న ఆదాయం

గతేడాది సెప్టెంబర్ నుంచి సుమారు 375 వస్తువులపై జీఎస్టీ రేట్లను తగ్గించి, పన్ను స్లాబులను సరళీకరించినప్పటికీ వసూళ్లపై పెద్దగా ప్రభావం పడలేదు. పన్ను కోతల అమలు తర్వాత నవంబర్‌లో వసూళ్లు రూ.1.70 లక్షల కోట్లకు తగ్గినప్పటికీ, ఆ తర్వాతి నెలల నుండి క్రమంగా పెరుగుతూ వచ్చాయి. డిసెంబర్‌లో రూ.1.74 లక్షల కోట్లు, జనవరిలో రూ.1.93 లక్షల కోట్లు, ఫిబ్రవరిలో రూ.1.83 లక్షల కోట్లు వసూలయ్యాయి. 2025-26 పూర్తి ఆర్థిక సంవత్సరానికి గానూ మొత్తం జీఎస్టీ వసూళ్లు 8.3 శాతం వృద్ధితో రూ.22.27 లక్షల కోట్లుగా నమోదయ్యాయి. 2025 ఏప్రిల్‌లో నమోదైన రూ.2.36 లక్షల కోట్లు ఇప్పటివరకు ఆల్-టైమ్ రికార్డుగా ఉండగా, మే నెలలో రూ.2.01 లక్షల కోట్లు వసూలయ్యాయి.

రాష్ట్రాల వారీగా వసూళ్లు

జీఎస్టీ వసూళ్లలో మహారాష్ట్ర, కర్ణాటక, తెలంగాణ వంటి రాష్ట్రాలు తమ పటిష్టమైన వృద్ధిని కొనసాగిస్తుండగా.. హర్యానా, ఆంధ్రప్రదేశ్, మధ్యప్రదేశ్ రాష్ట్రాల్లో వృద్ధి రేటు కాస్త నెమ్మదించింది. రీఫండ్‌లను సర్దుబాటు చేసిన తర్వాత మార్చి నెల నికర జీఎస్టీ ఆదాయం రూ.1.78 లక్షల కోట్లుగా ఉంది. వినియోగం బలంగా ఉండటమే ఈ వృద్ధికి కారణమని డెలాయిట్ ఇండియా ప్రతినిధి ఎం.ఎస్. మణి అభిప్రాయపడ్డారు. ముఖ్యంగా దిగుమతులు పెరగడం జీఎస్టీతో పాటు కస్టమ్స్ డ్యూటీ వసూళ్లకు కూడా కలిసి వచ్చిందని పేర్కొన్నారు. అయితే, భౌగోళిక రాజకీయ ఉద్రిక్తతలు, ప్రపంచవ్యాప్త ద్రవ్యోల్బణ పరిస్థితుల వల్ల రానున్న రోజుల్లో వినియోగం తగ్గే అవకాశం ఉందని, ఏప్రిల్‌లో వసూళ్లు కొంత అప్రమత్తంగా ఉండవచ్చని ఈవై ఇండియా నిపుణులు విశ్లేషించారు. మొత్తానికి జీఎస్టీ వసూళ్లు దేశ ఆర్థిక స్థిరత్వాన్ని, జీడీపీ వృద్ధిని ప్రతిబింబిస్తున్నాయని విశ్లేషకులు భావిస్తున్నారు.