మహిళలకు పైసలు లేవు.. అనవసరాలకు కోట్లున్నాయి?

తెలంగాణలో అధికార, ప్రతిపక్ష పార్టీల మధ్య మాటల యుద్ధం రోజురోజుకు తీవ్రమవుతోంది. ఒకవైపు కాంగ్రెస్ ప్రభుత్వం ఇచ్చిన హామీల అమలుపై దృష్టి పెడితే, మరోవైపు ప్రతిపక్ష బీఆర్ఎస్ పార్టీ ప్రభుత్వ నిర్ణయాలపై తీవ్ర విమర్శలు చేస్తోంది. ముఖ్యంగా మహిళా సాధికారత కోసం ప్రకటించిన రూ.2,500 నెలవారీ భృతి హామీపై బీఆర్ఎస్ ప్రభుత్వాన్ని గట్టిగా ప్రశ్నిస్తోంది. ప్రజల అత్యవసర అవసరాలకు డబ్బులు లేకపోయినా అనవసరమైన, ప్రాధాన్యత లేని పనులకు మాత్రం కోట్ల రూపాయలు ఖర్చు చేస్తున్నారని ఆరోపిస్తోంది.

మహిళా సాధికారతకు డబ్బులెక్కడ?

కాంగ్రెస్ ప్రభుత్వం ఎన్నికల సమయంలో మహిళలకు ప్రతి నెలా రూ.2,500 ఆర్థిక సహాయం అందిస్తామని వాగ్దానం చేసింది. కానీ అధికారంలోకి వచ్చి ఇన్ని రోజులు గడిచినా ఆ హామీ అమలు కాలేదని బీఆర్ఎస్ ఆరోపిస్తోంది. మహిళల ఆర్థిక సాధికారతకు ఇది కీలకమైన పథకమని, కానీ ప్రభుత్వం మాత్రం నిధుల కొరతను సాకుగా చూపుతోందని విమర్శిస్తోంది. అదే సమయంలో ప్రభుత్వం ఖర్చు చేస్తున్న కొన్ని అనవసరమైన పనులను ఉదహరిస్తూ, నిధులు ఎక్కడ పోతున్నాయని ప్రశ్నిస్తోంది.

ఒలింపిక్స్ కోసం భారీ వ్యయం

తెలంగాణలో ఒలింపిక్స్ క్రీడలను నిర్వహించడానికి ఏకంగా రూ..3.50 లక్షల కోట్లు ఖర్చు చేస్తామని ప్రభుత్వం ప్రకటించడంపై బీఆర్ఎస్ తీవ్ర అభ్యంతరం వ్యక్తం చేసింది. నిత్యం కష్టపడే మహిళలకు నెలకు రూ. 2,500 ఇవ్వడానికి డబ్బులు లేకపోయినా, ఈ భారీ కార్యక్రమానికి మాత్రం నిధులు సిద్ధంగా ఉన్నాయా అని ప్రశ్నింస్తోంది. అదే విధంగా మూసీ నది సుందరీకరణ కోసం ప్రభుత్వం రూ. 1.5 లక్షల కోట్లు ఖర్చు చేయనున్నట్లు ప్రకటించింది. ఈ ప్రాజెక్టుపై కూడా బీఆర్ఎస్ అనుమానాలు వ్యక్తం చేస్తోంది. ప్రజా ప్రయోజనాలు తక్కువగా ఉండే ఇలాంటి ప్రాజెక్టులకు ఇంత భారీ మొత్తంలో నిధులు ఎలా కేటాయిస్తున్నారని ప్రశ్నిస్తోంది.

అందాలకు కోట్లు

రాష్ట్రంలో కొత్తగా 'ఫోర్త్ సిటీ' నిర్మించడానికి రూ.50 వేల కోట్లు కేటాయించడంపై కూడా బీఆర్ఎస్ ఆగ్రహం వ్యక్తం చేసింది. ఇప్పటికే ఉన్న నగరాలలో మౌలిక వసతులు మెరుగుపరచకుండా, ఇలాంటి అవాస్తవిక ప్రాజెక్టులకు నిధులు కేటాయించడం సమంజసం కాదని పేర్కొంది. రాష్ట్రంలోని వివిధ ప్రభుత్వ సంస్థల పేర్లు మార్చడానికి రెండువేల కోట్లు ఖర్చు చేయడంపై కూడా బీఆర్ఎస్ విమర్శనాస్త్రాలు సంధించింది. పేర్లు మార్చడం వల్ల ప్రజలకు ఒరిగేదేమీ లేదని, ఈ నిధులు మహిళల సంక్షేమానికి ఉపయోగించవచ్చని సూచించింది. మంత్రులు , నాయకులు హెలికాప్టర్లలో పర్యటించడానికి ఏకంగా రూ. 250 కోట్లు ఖర్చు చేస్తున్నారని బీఆర్ఎస్ ఆరోపించింది. ప్రభుత్వంలో ఉన్నవారి విలాసాలకు కోట్ల రూపాయలు ఖర్చు పెడుతున్నప్పుడు, సాధారణ మహిళలకు ఆర్థిక సహాయం అందించడానికి మాత్రం నిధులు లేవని ఎందుకు చెబుతున్నారని ప్రశ్నించింది. హైదరాబాద్‌లో బీచ్‌లను నిర్మించడానికి రూ. 225 కోట్లు, మిస్ వరల్డ్ అందాల పోటీలకు రూ.200 కోట్లు ఖర్చు చేయడంపై కూడా బీఆర్ఎస్ మండిపడింది. ఇవి ప్రజల కనీస అవసరాలు కాదని, ప్రభుత్వం ప్రజల ప్రాధాన్యతలను విస్మరించి, అనవసరమైన వాటిపై దృష్టి పెడుతోందని ఆరోపించింది.

దోపిడీకి డబ్బులుంటాయా?

బీఆర్ఎస్ పార్టీ చేసిన ఈ ఆరోపణలు తెలంగాణలో తీవ్ర చర్చకు దారి తీశాయి. 'కాంగ్రెసోళ్ల దోపిడీకి డబ్బులుంటాయి కానీ, మహిళలకు నెలవారీ సహాయం ఇవ్వడానికి మాత్రం పైసలు లేవు అంటూ బీఆర్ఎస్ తీవ్ర ఆగ్రహం వ్యక్తం చేసింది. ఈ ఆరోపణలు, ప్రతి ఆరోపణలు రాబోయే రోజుల్లో తెలంగాణ రాజకీయాలను మరింత వేడెక్కించే అవకాశం ఉంది. ప్రభుత్వం ఈ ఆరోపణలపై ఎలా స్పందిస్తుందో, మహిళల రూ2,500 హామీని ఎప్పుడు అమలు చేస్తుందో చూడాలి. ఈ రాజకీయ పోరులో ఎవరి వాదనలు ప్రజలకు నమ్మదగినవిగా ఉంటాయో కాలమే నిర్ణయిస్తుంది.