మయన్మార్‌ అధ్యక్షుడిగా మిన్ ఆంగ్ హ్లయింగ్

మయన్మార్‌లో మరోసారి సైనిక ఆధిపత్యమే ఖరారైంది. 2021లో ప్రజాస్వామ్యయుతంగా ఎన్నికైన ఆంగ్‌ సాన్‌ సూచీ ప్రభుత్వాన్ని కూలదోసి, గత ఐదేళ్లుగా ఇనుప పిడికిలితో పాలన సాగిస్తున్న మిలిటరీ జనరల్ మిన్ ఆంగ్ హ్లయింగ్ (69) శుక్రవారం ఆ దేశ నూతన అధ్యక్షుడిగా ఎన్నికయ్యారు. పార్లమెంటులో జరిగిన ఓటింగ్‌లో ఆయన ఘనవిజయం సాధించినట్లు అధికారికంగా ప్రకటించారు. అయితే ఇది కేవలం ప్రజాస్వామ్య ముసుగులో సాగిన నాటకమేనని అంతర్జాతీయ పరిశీలకులు విమర్శిస్తున్నారు.

పార్లమెంటులో పక్కా వ్యూహం

అధ్యక్ష పదవి కోసం ముగ్గురు అభ్యర్థులు పోటీ పడగా, హ్లయింగ్ విజయం ముందే ఖరారైంది. సైనిక మద్దతు ఉన్న పార్టీల ప్రతినిధులు, సైన్యం నేరుగా నియమించిన సభ్యులే పార్లమెంటులో మెజారిటీగా ఉండటంతో ఆయనకు తిరుగులేకుండా పోయింది. ఉభయ సభల సంయుక్త స్పీకర్ ఆంగ్‌ లిన్ ద్వే వెల్లడించిన వివరాల ప్రకారం.. మొత్తం 584 ఓట్లకు గాను హ్లయింగ్‌కు 429 ఓట్లు వచ్చాయి. మిగిలిన ఇద్దరు అభ్యర్థులు ఉపాధ్యక్షులుగా బాధ్యతలు చేపట్టనున్నారు.

బాధ్యతల మార్పిడి.. పాతవారికే పగ్గాలు

మయన్మార్ రాజ్యాంగం ప్రకారం అధ్యక్షుడు ఒకే సమయంలో సైన్యాధిపతిగా ఉండకూడదు. ఈ నేపథ్యంలో హ్లయింగ్‌ తన కమాండర్-ఇన్-చీఫ్ పదవికి రాజీనామా చేశారు. ఆ శక్తివంతమైన బాధ్యతలను ఆయనకు అత్యంత సన్నిహితుడైన జనరల్ యే విన్ వూ స్వీకరించారు. 2011 నుంచి సైన్యాధిపతిగా ఉన్న హ్లయింగ్‌, 2021 తిరుగుబాటు తర్వాత దేశంపై పూర్తి పట్టు సాధించారు. తాజా ఎన్నికతో ఆయన తన అధికారాన్ని రాజ్యాంగబద్ధంగా మార్చుకున్నట్లయింది.

విపక్షం లేని ఎన్నికలు

గత ఏడాది డిసెంబర్, ఈ ఏడాది జనవరి నెలల్లో మూడు విడతలుగా పార్లమెంటు ఎన్నికలు జరిగాయి. అయితే ఆంగ్‌ సాన్‌ సూచీకి చెందిన 'నేషనల్ లీగ్ ఫర్ డెమోక్రసీ' వంటి ప్రధాన ప్రతిపక్షాలను ఈ ఎన్నికల్లో పోటీ చేయకుండా అడ్డుకున్నారు. నిబంధనలు ఏకపక్షంగా ఉన్నాయని భావించిన కొన్ని పార్టీలు స్వచ్ఛందంగా తప్పుకున్నాయి. దీంతో జనరల్ హ్లయింగ్‌ వర్గానికి మార్గం సుగమమైంది. స్వతంత్ర పరిశీలకులు ఈ ఎన్నికలను 'అశాస్త్రీయం, అప్రజాస్వామికం'గా అభివర్ణించారు.

సూచీ కారాగారంలోనే..

ప్రజాస్వామ్యం కోసం దశాబ్దాలుగా పోరాడుతున్న నోబెల్ విజేత ఆంగ్‌ సాన్‌ సూచీ ఇంకా జైలులోనే మగ్గుతున్నారు. 2021లో ఆమెను అరెస్టు చేసిన సైన్యం, వివిధ అభియోగాలపై సుదీర్ఘ కాలం జైలు శిక్ష విధించింది. దేశంలో ప్రజాస్వామ్యాన్ని పునరుద్ధరించాలని అంతర్జాతీయ సమాజం ఒత్తిడి తెస్తున్నప్పటికీ, సైనిక పాలకులు వాటిని బేఖాతరు చేస్తూ తమ పట్టును మరింత బిగిస్తున్నారు.

మయన్మార్‌ భవితవ్యంపై ఆందోళన

అధ్యక్షుడిగా హ్లయింగ్‌ ఎన్నికవడాన్ని మయన్మార్ ప్రజలు, విపక్షాలు అధికార దాహంగా పేర్కొంటున్నాయి. నామమాత్రపు ప్రజాస్వామ్య ప్రభుత్వం అని పిలుచుకున్నప్పటికీ, నిర్ణయాధికారాలన్నీ మళ్లీ సైన్యం చేతుల్లోనే ఉండనున్నాయి. గత ఐదేళ్లుగా పౌర హక్కులను కాలరాస్తున్న సైన్యం, రాబోయే రోజుల్లో ఎలాంటి కఠిన నిర్ణయాలు తీసుకుంటుందోనని ప్రజలు భయాందోళనలు వ్యక్తం చేస్తున్నారు.