భువనగిరిలో వరి, పత్తి కొనుగోళ్లపై అధికారులతో సమీక్ష
భువనగిరి జిల్లా కలెక్టరేట్ కార్యాలయంలో వరి ధాన్యం సేకరణ, పత్తి కొనుగోలు జిల్లాలోని రైతుల సమస్యల పరిష్కారంపై జిల్లా కలెక్టర్ హనుమంత రావు అధ్యక్షతన ఒక సమగ్ర సమీక్షా సమావేశం నిర్వహించబడింది.ఈ సమావేశానికి జిల్లా కలెక్టర్తో పాటు మంత్రి కోమటిరెడ్డి వెంకట్ రెడ్డి హాజరయ్యారు.
ఈ సమీక్ష సందర్భంగా, వ్యవసాయ, మార్కెటింగ్, సివిల్ సప్లైస్, సహకార రెవెన్యూ శాఖల అధికారులతో విస్తృతంగా చర్చలు జరిపారు. రైతులు తమ ధాన్యాన్ని విక్రయించే క్రమంలో ఎలాంటి ఇబ్బందులు ఎదుర్కోకుండా ఉండేందుకు గాను, ధాన్యం సేకరణ కేంద్రాలు సజావుగా, సమర్థవంతంగా పనిచేయడానికి అవసరమైన అన్ని ఏర్పాట్లు తక్షణమే పూర్తి చేయాలని మంత్రి అధికారులను ఆదేశించారు. ముఖ్యంగా, కేంద్రాల వద్ద గోనె సంచులు, తేమ కొలిచే యంత్రాలు రవాణా సౌకర్యాల కొరత లేకుండా చూడాలని మంత్రి పేర్కొన్నారు.
వర్ష నష్ట పరిహారం, కనీస మద్దతు ధర
పత్తి కొనుగోలు ప్రక్రియను వేగవంతం చేయాలని మంత్రి సూచించారు. వర్షాల కారణంగా నష్టపోయిన రైతులకు తక్షణ సహాయం అందించే ప్రక్రియను పర్యవేక్షించాలని జిల్లా కలెక్టర్ కు సూచించారు. ప్రతి గింజకు న్యాయమైన ధర కల్పించడం ప్రభుత్వానికి అత్యంత ప్రాధాన్యత అంశమని ఆయన తెలియజేశారు. దళారుల ప్రమేయం లేకుండా, ప్రభుత్వం నిర్ణయించిన మద్దతు ధర రైతులకు అందేలా మార్కెటింగ్ అధికారులు చర్యలు తీసుకోవాలని ఆదేశించారు.
రైతు కష్టం వృథా కాకుండా ప్రతి గింజను ప్రభుత్వం సకాలంలో కొనుగోలు చేస్తుంది. రైతు సంక్షేమమే ప్రభుత్వ ప్రధాన లక్ష్యం అని పునరుద్ఘాటించారు. రైతులకు సంబంధించిన ఫిర్యాదులను తక్షణమే పరిష్కరించడానికి ప్రత్యేక యంత్రాంగాన్ని ఏర్పాటు చేయాలని అధికారులను ఆదేశించారు. ఈ సమీక్షా సమావేశం ద్వారా ధాన్యం కొనుగోలు రైతు సంక్షేమంపై జిల్లా యంత్రాంగం యొక్క చిత్తశుద్ధిగా పని చేయాలని మంత్రి కోరారు.