భారత విమానాలకు పాక్ గగనతల నిషేధం పొడిగింపు
భారత్, పాకిస్థాన్ దేశాల మధ్య నెలకొన్న ఉద్రిక్తతల నేపథ్యంలో భారత విమానాలపై విధిస్తున్న గగనతల నిషేధాన్ని పాకిస్థాన్ బుధవారం మరో నెల రోజుల పాటు పొడిగించింది. ఈ మేరకు పాకిస్థాన్ ఎయిర్పోర్ట్ అథారిటీ కొత్తగా 'నోటీస్ టు ఎయిర్మెన్' జారీ చేసింది. గతంలో విధించిన నిషేధ గడువు మార్చి 23తో ముగియనున్న తరుణంలో, దానిని ఏప్రిల్ 24 వరకు పొడిగిస్తూ పాక్ అధికారులు ఈ నిర్ణయం తీసుకున్నారు.
అన్ని రకాల విమానాలపై ఆంక్షలు
ఈ నూతన ఉత్తర్వుల ప్రకారం.. భారతదేశంలో నమోదైన ఏ విమానం కూడా పాక్ గగనతలాన్ని ఉపయోగించడానికి వీల్లేదు. భారత విమానయాన సంస్థలకు చెందిన విమానాలతో పాటు, భారత్ లీజుకు తీసుకున్న లేదా నిర్వహిస్తున్న విమానాలకు కూడా ఈ నిబంధనలు వర్తిస్తాయని పాక్ స్పష్టం చేసింది. కేవలం పౌర విమానాలే కాకుండా, భారత సైనిక విమానాల రాకపోకలపై కూడా ఈ నిషేధం కొనసాగుతుందని పాకిస్థాన్ ఎయిర్పోర్ట్ అథారిటీ వెల్లడించింది.
క రాచీ, లాహోర్ మార్గాల దిగ్బంధం
పాకిస్థాన్ గగనతలంలోని కరాచీ, లాహోర్ అనే రెండు 'ఫ్లైట్ ఇన్ఫర్మేషన్ రీజియన్స్ (ఎఫ్ఐఆర్)' పరిధిలోకి వచ్చే అన్ని మార్గాల్లోనూ ఈ ఆంక్షలు వర్తిస్తాయని అధికారులు పేర్కొన్నారు. గతేడాది పహల్గామ్లో జరిగిన ఉగ్రదాడిలో 26 మంది ప్రాణాలు కోల్పోయిన తర్వాత ఇరు దేశాల మధ్య తీవ్ర ఉద్రిక్తతలు చోటుచేసుకున్నాయి. ఈ క్రమంలోనే భద్రతా కారణాల దృష్ట్యా ఇరు దేశాలు పరస్పరం తమ గగనతలాన్ని మూసివేసుకున్నాయి. తాజా పొడిగింపుతో భారత విమానాలు అంతర్జాతీయ ప్రయాణాల కోసం సుదీర్ఘ మార్గాలను ఎంచుకోవాల్సిన పరిస్థితి ఏర్పడింది.