భారత నౌకాదళంలోకి అణు జలాంతర్గామి 'ఐఎన్ఎస్ అరిదమన్’
భారత నావికాదళ అమ్ములపొదిలో మరో శక్తివంతమైన అస్త్రం చేరింది. స్వదేశీ పరిజ్ఞానంతో నిర్మితమైన అరిహంత్ శ్రేణికి చెందిన మూడో అణు విద్యుత్ జలాంతర్గామి 'ఐఎన్ఎస్ అరిదమన్'ను రక్షణ మంత్రి రాజ్నాథ్ సింగ్ అధికారికంగా నౌకాదళంలోకి చేర్చారు. విశాఖలోని షిప్ బిల్డింగ్ సెంటర్లో నిర్మితమైన ఈ జలాంతర్గామి రాకతో భారత నౌకాదళం మరింత శక్తివంతంగా మారిందని ఆయన కొనియాడారు. హిందూ మహాసముద్రం, ఇండో-పసిఫిక్ ప్రాంతాల్లో మారుతున్న భద్రతా సమీకరణాల దృష్ట్యా ఈ చేరిక అత్యంత ప్రాధాన్యత సంతరించుకుంది.
'తారాగిరి' జలప్రవేశం
అరిదమన్తో పాటు ప్రాజెక్ట్ 17ఏలో భాగంగా నిర్మించిన నాలుగో శక్తివంతమైన యుద్ధనౌక 'తారాగిరి'ని కూడా రక్షణ మంత్రి నౌకాదళంలోకి ప్రవేశపెట్టారు. దాదాపు 6,670 టన్నుల బరువున్న ఈ ఫ్రిగేట్ 'మేక్ ఇన్ ఇండియా' స్ఫూర్తికి నిలువుటద్దమని రాజ్నాథ్ సింగ్ పేర్కొన్నారు. ముంబయిలోని మజగాన్ డాక్ షిప్ బిల్డర్స్ లిమిటెడ్ నిర్మించిన ఈ నౌక, పాత డిజైన్ల కంటే మెరుగైన సాంకేతికతను కలిగి ఉంది. శత్రువుల రాడార్లకు చిక్కకుండా ప్రయాణించే 'స్టెల్త్' సాంకేతికత దీని ప్రత్యేకత.
స్వదేశీ పరిజ్ఞానం
తారాగిరి యుద్ధనౌకలో దాదాపు 75 శాతానికి పైగా స్వదేశీ పరికరాలనే వినియోగించడం విశేషం. దీని తయారీలో దేశవ్యాప్తంగా ఉన్న సుమారు 200లకు పైగా సూక్ష్మ, చిన్న, మధ్యతరహా పరిశ్రమలు భాగస్వామ్యమయ్యాయి. దీనివల్ల వేల సంఖ్యలో భారతీయులకు ఉపాధి లభించిందని, ఇది 'ఆత్మనిర్భర్ భారత్' లక్ష్య సాధనలో కీలకమని అధికారులు తెలిపారు. ఈ నౌక హై-స్పీడ్, హై-ఎండ్యూరెన్స్ సామర్థ్యంతో సముద్రంలో సుదీర్ఘకాలం పాటు విధులు నిర్వహించగలదు.
అత్యాధునిక ఆయుధ సంపత్తి
తారాగిరి కేవలం నౌక మాత్రమే కాదు, అది సముద్రంపై కదిలే ఒక ఆయుధాగారం. ఇందులో సూపర్సోనిక్ ఉపరితలం-ఉపరితలం క్షిపణులు, మధ్య శ్రేణి ఉపరితలం-గాలిలోకి ప్రయోగించే క్షిపణులు, జలాంతర్గాములను వేటాడే అత్యాధునిక ఏఎస్డబ్ల్యూ సూట్ ఉన్నాయి. వీటన్నింటినీ సమన్వయం చేసేందుకు 'కాంబ్యాట్ మేనేజ్మెంట్ సిస్టమ్'ను అమర్చారు. దీనివల్ల శత్రువుల నుంచి ముప్పు పొంచి ఉన్నప్పుడు క్షణంలోనే స్పందించి ఎదురుదాడి చేసే అవకాశం లభిస్తుంది.
సముద్ర దౌత్యం.. మానవతా సాయం
యుద్ధ సమయాల్లోనే కాకుండా, ప్రకృతి విపత్తులు సంభవించినప్పుడు మానవతా సాయం అందించేందుకు కూడా తారాగిరిని ప్రత్యేకంగా రూపొందించారు. ఆధునిక దౌత్య సంబంధాల్లో భాగంగా ఇతర దేశాలకు అవసరమైనప్పుడు తక్షణమే స్పందించేలా దీని మిషన్ ప్రొఫైల్ను రూపొందించారు. భారతీయులే రూపకల్పన చేసి, భారతీయులే నిర్మించి, భారతీయులే నడిపే ఈ నౌకలు 'వికసిత్ భారత్' రక్షణకు ఇనుప కవచాలుగా నిలుస్తాయని రక్షణ మంత్రి ధీమా వ్యక్తం చేశారు.