భారత్ సహా 16 దేశాలపై అమెరికా 'ట్రేడ్' అస్త్రం!
అంతర్జాతీయ వాణిజ్య రంగంలో అగ్రరాజ్యం అమెరికా మరోసారి తన పట్టు బిగిస్తోంది. భారత్ సహా 16 ప్రధాన ఆర్థిక వ్యవస్థల తయారీ రంగ విధానాలపై సమగ్ర విచారణకు అమెరికా వాణిజ్య ప్రతినిధి (యూఎస్టీఆర్) కార్యాలయం ఆదేశాలు జారీ చేసింది. ఆయా దేశాల్లో అవసరానికి మించి జరుగుతున్న ఉత్పత్తి, మార్కెట్ డిమాండ్తో సంబంధం లేకుండా అనుసరిస్తున్న పారిశ్రామిక విధానాలు అంతర్జాతీయ వాణిజ్యాన్ని దెబ్బతీస్తున్నాయని వాషింగ్టన్ భావిస్తోంది.
సెక్షన్ 301 కింద విచారణ
అమెరికా వాణిజ్య చట్టం-1974లోని అత్యంత శక్తిమంతమైన 'సెక్షన్ 301' కింద ఈ విచారణ చేపట్టనున్నట్లు వైట్ హౌస్ ప్రతినిధి జేమీసన్ గ్రీర్ ప్రకటించారు. కొన్ని దేశాలు తమ దేశీయ, అంతర్జాతీయ అవసరాల కంటే భారీగా ఉత్పత్తి సామర్థ్యాన్ని పెంచుకున్నాయని, ఇది ఇతర దేశాల మార్కెట్లను ప్రభావితం చేస్తోందని ఆయన ఆందోళన వ్యక్తం చేశారు.
లక్ష్యంగా ఉన్న దేశాలు
అమెరికా ప్రధానంగా 16 ఆర్థిక వ్యవస్థల తీరుపై నిఘా పెట్టింది. ఇందులో భారత్తో పాటు చైనా, ఐరోపా సమాఖ్య, జపాన్, దక్షిణ కొరియా, వియత్నాం, మెక్సికో, తైవాన్, సింగపూర్ వంటి దేశాలు ఉన్నాయి. వీటితో పాటు స్విట్జర్లాండ్, నార్వే, ఇండోనేషియా, మలేషియా, కాంబోడియా, థాయ్లాండ్, బంగ్లాదేశ్లు కూడా అమెరికా విచారణ పరిధిలోకి వస్తాయి. ఈ దేశాలన్నీ తమ మార్కెట్ పరిధిని దాటి అదనపు ఉత్పత్తిని సృష్టిస్తున్నాయని అమెరికా భావిస్తోంది.
ప్రధాన కారణాలు.. పరిణామాలు
ముఖ్యంగా ఈ దేశాలు తమ తయారీ రంగాలకు భారీగా ప్రభుత్వ రాయితీలు (సబ్సిడీలు) ఇవ్వడం, తక్కువ వడ్డీకే రుణాలు అందించడం వంటివి చేస్తున్నాయని అమెరికా గురిపెట్టింది. అలాగే కార్మిక, పర్యావరణ నిబంధనలను సడలించడం ద్వారా తక్కువ ధరకే వస్తువులను తయారు చేస్తూ ప్రపంచ మార్కెట్లో ఇతర దేశాలకు పోటీ లేకుండా చేస్తున్నాయని ఆరోపించింది. ఒకవేళ ఈ విచారణలో అక్రమాలు జరిగినట్లు తేలితే, ఆయా దేశాల నుంచి వచ్చే వస్తువులపై అమెరికా భారీగా దిగుమతి సుంకాలు (పన్నులు) వేసే అవకాశం ఉంది.
విచారణ ప్రక్రియ.. కీలక గడువులు
అమెరికా ఈ విచారణ ప్రక్రియను మూడు దశల్లో పూర్తి చేయాలని నిర్ణయించింది. దీని కోసం మార్చి 17 నుంచి ఒక ఆన్లైన్ పోర్టల్ను అందుబాటులోకి తెస్తుంది. దీని ద్వారా ప్రజలు లేదా సంస్థలు తమ అభిప్రాయాలను, అభ్యర్థనలను లిఖితపూర్వకంగా తెలియజేయవచ్చు. ఇలాంటి ఫిర్యాదులు లేదా విన్నపాలు పంపడానికి ఏప్రిల్ 15వ తేదీని ఆఖరి గడువుగా నిర్ణయించారు. మే 5వ తేదీ నుంచి బహిరంగ విచారణలు (పబ్లిక్ హియరింగ్స్) మొదలవుతాయి. ఈ దశలో సంబంధిత దేశాల ప్రతినిధులతో అమెరికా అధికారులు ముఖాముఖి చర్చలు జరిపి పూర్తి వివరాలు సేకరిస్తారు.
ఈ విచారణలన్నీ పూర్తయ్యాక, అధికారులు ఒక సమగ్ర నివేదికను తయారు చేసి అధ్యక్షుడు డొనాల్డ్ ట్రంప్కు సమర్పిస్తారు. ఒకవేళ విచారణలో ఇతర దేశాలు అక్రమ పద్ధతులు పాటిస్తున్నాయని నిర్ధారణ అయితే, అమెరికా కఠిన చర్యలు తీసుకుంటుంది. ఆయా దేశాల నుంచి అమెరికాకు వచ్చే వస్తువులపై భారీగా పన్నులు (దిగుమతి సుంకాలు) వేయడం లేదా ఇతర సేవలపై ఆంక్షలు విధించడం వంటి నిర్ణయాలు తీసుకునే అవకాశం ఉంది. ఇది జరిగితే సదరు దేశాల వ్యాపారాలపై తీవ్ర ప్రభావం పడుతుంది.
గత అనుభవాలే నిదర్శనం
ట్రంప్ మొదటి విడత పదవీ కాలంలో చైనాపై ఇదే తరహాలో సెక్షన్ 301 విచారణ జరిపి భారీగా సుంకాలు విధించిన విషయాన్ని గ్రీర్ గుర్తుచేశారు. ఈసారి కూడా కేవలం సుంకాలకే పరిమితం కాకుండా, ఎగుమతి నియంత్రణలు, పెట్టుబడుల స్క్రీనింగ్ వంటి చర్యలు కూడా ఉండవచ్చని సంకేతాలిచ్చారు.
వెట్టిచాకిరిపై మరో విచారణ!
మరోవైపు బలవంతపు శ్రమ లేదా వెట్టిచాకిరితో తయారైన వస్తువులను దిగుమతి చేసుకునే దేశాలపై కూడా వేరొక సెక్షన్ 301 విచారణ ప్రారంభించనున్నట్లు అమెరికా ప్రకటించింది. దీనికి సంబంధించిన విచారణ కూడా అతి త్వరలో మొదలయ్యే అవకాశం ఉంది. సుమారు వందేళ్లుగా అమెరికా చట్టాల్లో వెట్టిచాకిరి ఉత్పత్తులపై నిషేధం ఉన్నప్పటికీ, దానిని మరింత కఠినంగా అమలు చేసేందుకే ఈ నిర్ణయం తీసుకున్నట్లు సమాచారం.