‘భారత్ ట్యాక్సీ’ యాప్ను ప్రారంభించిన కేంద్ర మంత్రి అమిత్ షా
దేశవ్యాప్తంగా రవాణా రంగంలో విప్లవాత్మక మార్పులకు నాంది పలుకుతూ, భారత్లోనే తొలి సహకార రంగ రైడ్ హెయిలింగ్ ప్లాట్ఫామ్ ‘భారత్ ట్యాక్సీ’ని కేంద్ర హోం, సహకార శాఖ మంత్రి అమిత్ షా గురువారం ఢిల్లీలోని విజ్ఞాన్ భవన్లో ప్రారంభించారు. ప్రధాని నరేంద్ర మోడీ ‘సహకార్ సే సమృద్ధి’ విజన్ స్ఫూర్తితో రూపొందిన ఈ యాప్, ప్రైవేటు సంస్థల దోపిడీ నుంచి ట్యాక్సీ డ్రైవర్లకు (సారథులకు) విముక్తి కలిగించడమే కాకుండా వారిని యజమానులుగా మారుస్తుందని మంత్రి పేర్కొన్నారు.
అసలేంటి ఈ ‘భారత్ ట్యాక్సీ’ యాప్?
భారత్ ట్యాక్సీ అనేది కేవలం ఒక మొబైల్ యాప్ మాత్రమే కాదు, ఇది డ్రైవర్లే యజమానులుగా ఉండే ఒక సహకార (కోఆపరేటివ్) వేదిక. ఓలా, ఉబర్ వంటి ప్రైవేట్ కంపెనీలు లాభాల కోసం పనిచేస్తే, భారత్ ట్యాక్సీ డ్రైవర్ల శ్రేయస్సు కోసం పనిచేస్తుంది. మల్టీ-స్టేట్ కోఆపరేటివ్ సొసైటీస్ యాక్ట్-2002 కింద నమోదైన ఈ వ్యవస్థలో ‘సారథే యజమాని’ (సారథి హి మాలిక్) అనే సూత్రం అమలవుతుంది. అంటే, ఈ ప్లాట్ఫామ్ ద్వారా వచ్చే లాభాలు కంపెనీ ఖాతాలోకి కాకుండా, నేరుగా డ్రైవర్లకే చెందుతాయి.
ఈ యాప్ ఎందుకు ముఖ్యం?
ప్రస్తుతం మార్కెట్లో ఉన్న ప్రైవేట్ ట్యాక్సీ అగ్రిగేటర్లు డ్రైవర్ల నుంచి 25-30 శాతం వరకు భారీ కమిషన్లు వసూలు చేస్తున్నాయి. దీనివల్ల డ్రైవర్లు కష్టపడినా వారికి తగిన ఆదాయం మిగలడం లేదు. ఈ సమస్యకు పరిష్కారంగా భారత్ ట్యాక్సీ ‘జీరో కమిషన్’ నమూనాను తీసుకొచ్చింది. డ్రైవర్ల నుంచి ఎటువంటి కమిషన్ తీసుకోకపోవడమే కాకుండా, వారికి ఆరోగ్య బీమా, ప్రమాద బీమా, పదవీ విరమణ పొదుపు వంటి సామాజిక భద్రతా సౌకర్యాలను కల్పిస్తోంది. విదేశీ పెట్టుబడులతో నడిచే సంస్థలకు ఇది పూర్తి స్వదేశీ ప్రత్యామ్నాయం.
ప్రయాణికులకు కలిగే లాభాలేంటి?
భారత్ ట్యాక్సీ వల్ల డ్రైవర్లకే కాకుండా ప్రయాణికులకు కూడా అనేక ప్రయోజనాలు ఉన్నాయి. ముఖ్యంగా వినియోగదారులను వేధించే ‘సర్జ్ ప్రైసింగ్’ (రద్దీ సమయంలో ధరలు పెంచడం) ఇందులో ఉండదు. వర్షం పడినా, పండుగ రద్దీ ఉన్నా ముందే నిర్ణయించిన న్యాయమైన ధరలకే ప్రయాణించవచ్చు. డ్రైవర్లు సహకార సంఘ సభ్యులు కావడం వల్ల భద్రత ఎక్కువగా ఉంటుంది. అత్యవసర సమయాల్లో వేగంగా స్పందించే ఎమర్జెన్సీ సపోర్ట్ సిస్టమ్, ఢిల్లీలోని ఏడు కీలక ప్రాంతాల్లో ప్రత్యేక సహాయ కేంద్రాలను కూడా ఏర్పాటు చేశారు.
మహిళా రక్షణకు పెద్దపీట
మహిళా ప్రయాణికుల భద్రత కోసం ఈ ప్లాట్ఫామ్లో ‘సారథి దీదీ’ అనే వినూత్న కార్యక్రమాన్ని ప్రవేశపెట్టారు. మహిళా డ్రైవర్లను ప్రోత్సహించేందుకు ‘బైక్ దీదీ’ వంటి పథకాలను అమలు చేస్తున్నారు. ఇప్పటికే 150 మందికి పైగా మహిళా డ్రైవర్లు ఈ వ్యవస్థలో చేరారు. ధృవీకరించిన రైడ్ డేటా, వేగవంతమైన సహాయక చర్యల ద్వారా మహిళా ప్రయాణికులకు భరోసా కల్పిస్తున్నారు.
ఇప్పటికే రికార్డు స్థాయిలో రైడ్లు
గతేడాది జూన్ 6న సాఫ్ట్ లాంచ్ (ప్రయోగాత్మక ప్రారంభం) అయినప్పటి నుంచి ఈ యాప్ అనూహ్య వృద్ధిని సాధించింది. ఇప్పటికే 4 లక్షల మంది డ్రైవర్లు, 10 లక్షల మంది యూజర్లు ఇందులో రిజిస్టర్ అయ్యారు. ఢిల్లీ-ఎన్సీఆర్, గుజరాత్ ప్రాంతాల్లో రోజుకు 10 వేలకు పైగా రైడ్లు విజయవంతంగా పూర్తవుతున్నాయి. ఇప్పటివరకు దాదాపు రూ. 10 కోట్లను నేరుగా డ్రైవర్లకే పంపిణీ చేయడం విశేషం.
ఓలా, ఉబర్ వర్సెస్ భారత్ ట్యాక్సీ: తేడాలివే!
ప్రైవేట్ యాప్లతో పోలిస్తే భారత్ ట్యాక్సీ పూర్తి భిన్నమైనది. ఓలా, ఉబర్లలో లాభం కంపెనీకి వెళ్తే, భారత్ ట్యాక్సీలో డ్రైవర్కే దక్కుతుంది. ప్రైవేట్ యాప్లలో ధరలు మారుతూ (సర్జ్) ఉంటే, ఇందులో ధరలు స్థిరంగా ఉంటాయి. ప్రైవేట్ సంస్థలు డ్రైవర్లపై అనేక ఆంక్షలు విధిస్తాయి, కానీ భారత్ ట్యాక్సీలో డ్రైవర్లు ఇతర యాప్లలో కూడా పనిచేసుకునే స్వేచ్ఛను కలిగి ఉంటారు.
ముందున్న లక్ష్యాలు
రాబోయే రెండేళ్లలో దేశంలోని అన్ని రాష్ట్రాలు, ప్రధాన నగరాలకు ఈ సేవలను విస్తరించాలని ప్రభుత్వం లక్ష్యంగా పెట్టుకుంది. ప్రతి రాష్ట్రంలో డ్రైవర్ సహాయ కేంద్రాలను ఏర్పాటు చేయడమే కాకుండా, జాతీయ డిజిటల్ పబ్లిక్ ఇన్ఫ్రాస్ట్రక్చర్తో దీన్ని అనుసంధానం చేయనున్నారు. కశ్మీర్ నుంచి కన్యాకుమారి వరకు ప్రయాణికులకు నాణ్యమైన సేవలు, డ్రైవర్లకు ఆర్థిక భరోసా కల్పించేలా ఈ వ్యవస్థను మరింత బలోపేతం చేస్తామని అమిత్ షా స్పష్టం చేశారు.