భారత్-సీషెల్స్ స్నేహ బంధం: 175 మిలియన్ డాలర్ల ఆర్థిక సాయం

హిందూ మహాసముద్ర ప్రాంతంలో కీలక భాగస్వామి అయిన సీషెల్స్‌తో భారత్ తన స్నేహ బంధాన్ని మరో స్థాయికి తీసుకెళ్లింది. ఆ దేశ అభివృద్ధికి అండగా నిలిచేందుకు 175 మిలియన్ డాలర్ల (సుమారు రూ.1,500 కోట్లకు పైగా) ప్రత్యేక ఆర్థిక ప్యాకేజీని భారత్ సోమవారం ప్రకటించింది. భారత పర్యటనలో ఉన్న సీషెల్స్ అధ్యక్షుడు ప్యాట్రిక్ హెర్మినీతో ప్రధానమంత్రి నరేంద్ర మోడీ సోమవారం న్యూఢిల్లీలోని హైదరాబాద్ హౌస్‌లో విస్తృత స్థాయి చర్చలు జరిపారు. అనంతరం ఇరువురు నేతలు సంయుక్తంగా మీడియా సమావేశంలో మాట్లాడారు.

సీషెల్స్ అవసరాలే మా ప్రాధాన్యం: ప్రధాని మోడీ

అభివృద్ధిలో భాగస్వామ్యమే భారత్-సీషెల్స్ సంబంధాలకు బలమైన పునాది అని ప్రధాని మోడీ స్పష్టం చేశారు. "మా ప్రయత్నాలన్నీ సీషెల్స్ ప్రాధాన్యతలు, అవసరాలపైనే ఆధారపడి ఉన్నాయి. ఈ దిశగా ముందడుగు వేస్తూ 175 మిలియన్ డాలర్ల ఆర్థిక ప్యాకేజీని ప్రకటిస్తున్నాం. సామాజిక గృహనిర్మాణం, ఈ-మొబిలిటీ, వృత్తి విద్యా శిక్షణ, ఆరోగ్యం, రక్షణ, సముద్ర భద్రత వంటి కీలక రంగాల్లోని ప్రాజెక్టులకు ఈ నిధులు తోడ్పడతాయి" అని మోడీ వివరించారు. ఈ ప్యాకేజీ వల్ల సీషెల్స్ యువతకు కొత్త ఉపాధి, నైపుణ్య శిక్షణ అవకాశాలు లభిస్తాయని ఆయన ఆశాభావం వ్యక్తం చేశారు.

భౌగోళిక బంధమే కాదు.. చారిత్రక నమ్మకం

భారత్-సీషెల్స్ కేవలం దౌత్యపరంగానే కాకుండా హిందూ మహాసముద్రం ద్వారా ముడిపడి ఉన్నాయని ప్రధాని పేర్కొన్నారు. "మనం కేవలం భౌగోళికంగానే కాదు.. చరిత్ర, నమ్మకం, ఉమ్మడి భవిష్యత్తు విజన్‌తో అనుసంధానమై ఉన్నాం. భారత్ చేపట్టిన 'మహాసాగర్' విజన్‌లో సీషెల్స్ ఒక అంతర్భాగం" అని మోడీ వ్యాఖ్యానించారు. ఇరు దేశాల మధ్య వాణిజ్యం పెరిగిందని, సంస్కృతులు మిళితమయ్యాయని, తద్వారా సంబంధాలు మరింత దృఢంగా మారాయని ఆయన గుర్తుచేశారు.

ప్రజల మధ్య బంధమే గొప్ప బలం

భారత్-సీషెల్స్ సంబంధాలకు అక్కడి భారత సంతతే గొప్ప బలమని ప్రధాని కొనియాడారు. సీషెల్స్ సామాజిక, ఆర్థిక జీవనంలో భారతీయ సమాజం పోషిస్తున్న పాత్ర ప్రశంసనీయమని, వారు తరతరాలుగా రెండు దేశాల మధ్య స్నేహ వారధిలా నిలుస్తున్నారని తెలిపారు. ఇరు దేశాల మధ్య దౌత్య సంబంధాలు 50 ఏళ్లు పూర్తి చేసుకున్న తరుణంలో అధ్యక్షుడు ప్యాట్రిక్ పర్యటన జరగడం పట్ల మోడీ హర్షం వ్యక్తం చేశారు.

ప్రధాని మోడీకి ఆహ్వానం

భారత్, సీషెల్స్ మధ్య దౌత్య సంబంధాలు కుదిరి 50 ఏళ్లు పూర్తవుతున్న సందర్భంగా, సీషెల్స్ స్వాతంత్ర్య దినోత్సవ వేడుకలకు ప్రధాని మోడీని ముఖ్య అతిథిగా ఆ దేశ అధ్యక్షుడు ప్యాట్రిక్ హెర్మినీ ఆహ్వానించారు. హిందూ మహాసముద్రంలో భద్రత, స్థిరత్వం మా ఉమ్మడి బాధ్యతని ఇరువురు నేతలు స్పష్టం చేశారు. ఐటీఈసీ కార్యక్రమం ద్వారా భారత్ అందిస్తున్న సహకారాన్ని ప్యాట్రిక్ కొనియాడారు.

రాజ్‌ఘాట్‌లో నివాళులు

భారత పర్యటనలో భాగంగా అధ్యక్షుడు ప్యాట్రిక్ హెర్మినీ అంతకుముందు రాజ్‌ఘాట్‌ను సందర్శించి మహాత్మా గాంధీకి ఘనంగా నివాళులర్పించారు. గాంధీజీ ఆశయాలు, సిద్ధాంతాలు భారత్-సీషెల్స్ భాగస్వామ్యానికి మార్గదర్శకంగా నిలుస్తాయని విదేశీ వ్యవహారాల మంత్రిత్వ శాఖ పేర్కొంది. 2025 అక్టోబర్‌లో అధ్యక్షుడిగా బాధ్యతలు చేపట్టిన తర్వాత ప్యాట్రిక్ భారత్‌కు రావడం ఇదే తొలిసారి. ఫిబ్రవరి 5న భారత పర్యటనకు వచ్చిన ఆయన చెన్నై, ముంబై పర్యటనలు ముగించుకుని ఢిల్లీ చేరుకున్నారు. ఫిబ్రవరి 10వ తేదీ వరకు హెర్మినీ భారత్‌లో పర్యటించనున్నారు.