భారత్లో పెరిగిన చిరుతల జోరు: బోట్స్వానా నుండి కునోకు చేరిన 9 కొత్త అతిథులు!
భారత ప్రభుత్వ ప్రతిష్టాత్మక 'చీతా పునరుద్ధరణ ప్రాజెక్టు'లో మరో కీలక ఘట్టం ఆవిష్కృతమైంది. శనివారం నాడు ఆఫ్రికా ఖండంలోని బోట్స్వానా నుండి 9 చీతాలు (6 ఆడ, 3 మగ) మధ్యప్రదేశ్లోని కునో నేషనల్ పార్క్కు చేరుకున్నాయి. వీటి రాకతో భారతదేశంలో మొత్తం చీతాల సంఖ్య 48కి చేరుకుంది. కేంద్ర అటవీ శాఖ మంత్రి భూపేందర్ యాదవ్ స్వయంగా ఈ చీతాలను క్వారంటైన్ ఎన్క్లోజర్లోకి విడుదల చేసి, ఈ కార్యక్రమాన్ని పర్యవేక్షించారు.
వాయుసేన సాయంతో సుదీర్ఘ ప్రయాణం
ఈ చీతాలను బోట్స్వానా నుండి భారత వాయుసేనకు చెందిన ప్రత్యేక విమానంలో ముందుగా గ్వాలియర్కు తరలించారు. అక్కడి నుండి వాయుసేన హెలికాప్టర్ల ద్వారా కునో నేషనల్ పార్క్కు చేరవేశారు. 2022 సెప్టెంబర్లో నమీబియా నుండి, 2023 ఫిబ్రవరిలో దక్షిణాఫ్రికా నుండి చీతాలను తీసుకురావడంలో కీలక పాత్ర పోషించిన ఐఏఎఫ్ ఇప్పుడు మూడవ విడతలో కూడా తన సహాయాన్ని అందించింది. నాలుగు సంవత్సరాల చీతా జనాభా పునరుద్ధరణ ప్రణాళికలో భాగంగా, ఇది ఆఫ్రికా నుంచి వచ్చిన మూడో విడత చీతాల బృందమని అధికారులు తెలిపారు.
ప్రాజెక్ట్ చీతా డైరెక్టర్ ఉత్తమ్ శర్మ మాట్లాడుతూ, “మరిన్ని చీతాలు రావడం వల్ల ఈ పునరావాస కార్యక్రమం మరింత బలపడుతుంది. కేంద్ర ప్రభుత్వ సహకారంతో త్వరలోనే చీతాల సంఖ్యను 50కి పెంచాలని లక్ష్యంగా పెట్టుకున్నాం” అని చెప్పారు. దీనికోసం కేంద్ర, రాష్ట్ర ప్రభుత్వాలు సమన్వయంతో పనిచేస్తున్నాయన్నారు.ప్రస్తుతం మూడు చీతాలను గాంధీ సాగర్ వన్యప్రాణి సంరక్షణ కేంద్రానికి తరలించగా, 36 చీతాలు కునోలోనే ఉన్నాయని తెలిపారు. వ్యాధులు ప్రబలితే మొత్తం జనాభా అంతరించిపోయే ప్రమాదం ఉన్నందున, అన్ని చీతాలను ఒకే చోట ఉంచకూడదని అధికారులు నిర్ణయించారు.
కునోలో సంతానోత్పత్తి విజయం
గడిచిన రెండేళ్లలో కునో నేషనల్ పార్క్ చీతాల సంతానోత్పత్తికి అనువైన కేంద్రంగా మారింది. 2023 నుండి ఇప్పటివరకు ఇక్కడ మొత్తం 39 పిల్లలు జన్మించగా, అందులో 27 సురక్షితంగా ఉన్నాయి. ఈ ఏడాది ఫిబ్రవరి 7 నుండి 18 మధ్యకాలంలోనే తొమ్మిది పిల్లలు జన్మించడం విశేషం. జ్వాల, ఆశా, గామిని, వీర వంటి చీతాలు ఇక్కడ విజయవంతంగా పిల్లలకు జన్మనివ్వడం ద్వారా ఈ ప్రాజెక్టు విజయవంతమవుతోందని నిరూపించాయి.
సుమారు 70 ఏళ్ల క్రితం భారతదేశంలో అంతరించిపోయిన ప్రపంచంలోనే అత్యంత వేగవంతమైన జంతువు 'చీతా'ను తిరిగి ప్రవేశపెట్టడం పర్యావరణ సమతుల్యతకు ఎంతో ముఖ్యం. ప్రస్తుతం బోట్స్వానా నుండి వచ్చిన కొత్త చీతాలు కూడా ఇక్కడి వాతావరణానికి అలవాటు పడి, జనాభా పెరుగుదలకు దోహదపడతాయని అధికారులు ఆశిస్తున్నారు. గతంలో కొన్ని మరణాలు సంభవించినప్పటికీ, ప్రస్తుతం ఉన్న మనుగడ రేటు అటవీ శాఖ అధికారుల్లో కొత్త ఉత్సాహాన్ని నింపుతోంది.