భారత్-ఈయూ మధ్య చారిత్రక వాణిజ్య ఒప్పందం

భారత్-యూరోపియన్ యూనియన్ (ఈయూ) మధ్య సుదీర్ఘ కాలంగా పెండింగ్‌లో ఉన్న స్వేచ్ఛా వాణిజ్య ఒప్పందం (ఎఫ్‌టీఏ) ఎట్టకేలకు కొలిక్కి వచ్చింది. దాదాపు 18 ఏళ్ల నిరీక్షణకు తెరదించుతూ.. భారత్, ఈయూల మధ్య ఈ చారిత్రక ఒప్పందం ఖరారైనట్లు ప్రధాని నరేంద్ర మోడీ మంగళవారం అధికారికంగా ప్రకటించారు. 140 కోట్ల మంది భారతీయులతో పాటు కోట్లాది మంది యూరోపియన్లకు సరికొత్త ఆర్థిక అవకాశాలు కల్పించే ఈ ఒప్పందాన్ని ఆయన 'మదర్ ఆఫ్ ఆల్ డీల్స్’గా అభివర్ణించారు.

దశాబ్దాల నిరీక్షణకు తెర

భారత్, యూరోపియన్ యూనియన్ (ఈయూ) మధ్య జరిగిన ఈ చారిత్రాత్మక వాణిజ్య ఒప్పందం దాదాపు 18 ఏళ్ల సుదీర్ఘ నిరీక్షణకు దక్కిన విజయం. నిజానికి ఈ చర్చలు 2007లోనే మొదలయ్యాయి. కానీ, వస్తువులపై పన్నులు, ఇతర నిబంధనల విషయంలో రెండు పక్షాల మధ్య ఏకాభిప్రాయం కుదరకపోవడంతో 2013లో ఇవి పూర్తిగా ఆగిపోయాయి.

అయితే, ఇటీవల మారుతున్న అంతర్జాతీయ పరిస్థితులు ఈ చర్చలకు మళ్లీ ప్రాణం పోశాయి. ముఖ్యంగా వస్తువుల తయారీ, సరఫరా కోసం కేవలం చైనాపైనే ఆధారపడటం మంచిది కాదని ప్రపంచ దేశాలు గుర్తించాయి. చైనాకు బదులుగా భారత్ వంటి నమ్మకమైన దేశాలను ప్రత్యామ్నాయ సరఫరా కేంద్రంగా ఎంచుకోవాలని యూరోపియన్ యూనియన్ నిర్ణయించుకుంది. ఈ వ్యూహంతోనే 2022లో మళ్లీ మొదలైన చర్చలు.. పరస్పర సహకారంతో జనవరి 2026లో ఒక కొలిక్కి వచ్చి, ఈ చారిత్రక ఒప్పందం ఖరారైంది.

ఆర్థిక వృద్ధికి 'మహా' ఊతం

ప్రపంచ జీడీపీలో 25 శాతం వాటా కలిగిన రెండు అతిపెద్ద ఆర్థిక వ్యవస్థలు ఇప్పుడు విశ్వసనీయ వాణిజ్య భాగస్వాములుగా మారాయి. ఈ ఒప్పందం ఫలితంగా భారత్ నుంచి యూరప్‌కు ఎగుమతి అయ్యే 99 శాతం వస్తువులపై సుంకాలు (పన్నులు) పూర్తిగా రద్దవుతాయి. దీనివల్ల సుమారు రూ.6.41 లక్షల కోట్ల విలువైన ఎగుమతులు భారీగా పెరిగే అవకాశం ఉంది. బ్రిటన్, ఎఫ్టా దేశాలతో ఇప్పటికే కుదుర్చుకున్న ఒప్పందాలకు ఈ చారిత్రక డీల్ తోడవ్వడంతో.. అంతర్జాతీయ సరఫరా వ్యవస్థలో భారతదేశం అత్యంత శక్తివంతమైన కేంద్రంగా అవతరించనుంది.

వస్త్ర, రత్న రంగాలకు మహర్దశ

ఈ ఒప్పందం ముఖ్యంగా శ్రమశక్తిపై ఆధారపడే రంగాలకు వరంగా మారనుంది. వస్త్రాలు (టెక్స్‌టైల్స్), రత్నాలు-ఆభరణాలు, తోలు ఉత్పత్తులు, పాదరక్షలు, సముద్ర ఉత్పత్తులకు యూరప్ దేశాల్లో జీరో డ్యూటీ (సున్నా పన్ను)తో ప్రవేశం లభిస్తుంది. దీనివల్ల దేశీయంగా తయారీ రంగం ఊపందుకోవడమే కాకుండా, మహిళా కళాకారులు, చేనేత కార్మికులు, చిన్న తరహా పరిశ్రమలకు అంతర్జాతీయ గుర్తింపు, ఆదాయం లభిస్తాయి.

మేక్ ఇన్ ఇండియాకు 'ఆటో' బూస్ట్

వాహన రంగంలో ఈ ఒప్పందం సరికొత్త విప్లవం తీసుకురానుంది. యూరప్ దేశాలకు చెందిన అత్యాధునిక కార్లు భారత మార్కెట్లోకి అందుబాటులోకి రావడమే కాకుండా, 'మేక్ ఇన్ ఇండియా' కింద దేశీయంగా తయారైన వాహనాలు యూరప్ వీధుల్లో పరుగులు తీయడానికి మార్గం సుగమమైంది. కోటా ఆధారిత సరళీకరణ ద్వారా ఇరు ప్రాంతాల వాహన తయారీదారులు లబ్ధి పొందనున్నారు.

రైతుల ప్రయోజనాలకు రక్షణ

వ్యవసాయ రంగంలో భారత ప్రభుత్వం అత్యంత చాకచక్యంగా వ్యవహరించింది. టీ, కాఫీ, సుగంధ ద్రవ్యాలు, పండ్లు, కూరగాయల ఎగుమతులకు యూరప్ మార్కెట్లను చేజిక్కించుకుంటూనే.. దేశీయ పాడి పరిశ్రమ (డైరీ), తృణధాన్యాలు, కోళ్ల పరిశ్రమ వంటి సున్నితమైన రంగాలకు పూర్తి రక్షణ కల్పించింది. యూరప్ ఉత్పత్తుల వల్ల దేశీయ రైతులకు ఎటువంటి నష్టం కలగకుండా పటిష్టమైన చర్యలు తీసుకుంది.

ఐటీ, సేవా రంగాలకు సువర్ణావకాశం

భారత సేవా రంగం ఈ ఒప్పందంతో కొత్త పుంతలు తొక్కనుంది. ఐటీ, ఇంజనీరింగ్, విద్య, పర్యాటకం వంటి 144 రంగాలలో భారత నిపుణులకు యూరప్‌లో సులభతర ప్రవేశం లభించనుంది. ఐటీ నిపుణులతో పాటు వారి కుటుంబ సభ్యులకు కూడా ప్రవేశం, ఉద్యోగ హక్కులు కల్పించేలా 'మొబిలిటీ ఫ్రేమ్‌వర్క్' కింద వెసులుబాటు కల్పించారు. ఇది చదువుకున్న యువతకు విదేశాల్లో ఉద్యోగ సాధనకు సువర్ణావకాశం.

సాంకేతికత.. భవిష్యత్తుపై దృష్టి

వాణిజ్యంతో పాటు సాంకేతిక రంగంలోనూ ఈయూతో బంధం బలపడింది. ఆర్టిఫిషియల్ ఇంటెలిజెన్స్, సెమీకండక్టర్లు, క్లీన్ ఎనర్జీ వంటి భవిష్యత్ సాంకేతికతల్లో రెండు దేశాలు కలిసి పనిచేయనున్నాయి. పర్యావరణ మార్పులకు అనుగుణంగా 'కార్బన్ నిబంధనల'పై అవగాహన కుదుర్చుకోవడంతో పాటు, రక్షణ రంగ సరఫరా గొలుసులను ఏకీకృతం చేయాలని నిర్ణయించారు.

'వికసిత భారత్' దిశగా అడుగు

కేంద్ర మంత్రి పీయూష్ గోయల్ చెప్పినట్లు, ఇది కేవలం వ్యాపార ఒప్పందం మాత్రమే కాదు, భారత భవిష్యత్తును మార్చే వ్యూహాత్మక భాగస్వామ్యం. ఇప్పటికే ఆస్ట్రేలియా, యూఏఈ, యూకే వంటి దేశాలతో వాణిజ్య ఒప్పందాలు చేసుకున్న భారత్, ఇప్పుడు ఈయూతో జతకట్టడం ద్వారా 2047 నాటికి 'వికసిత భారత్' లక్ష్యాన్ని చేరుకోవడానికి బలమైన పునాది వేసింది.