భారత్-అంగోలా ఆర్థిక బంధాల బలోపేతానికి విస్తృత అవకాశాలు: రాష్ట్రపతి ద్రౌపది ముర్ము

భారత రాష్ట్రపతి ద్రౌపది ముర్ము తన నాలుగు రోజుల అధికారిక అంగోలా పర్యటనలో భాగంగా సోమవారం ఆ దేశ పార్లమెంట్‌ను ఉద్దేశించి చారిత్రక ప్రసంగం చేశారు. అట్లాంటిక్ మహాసముద్రం వెంబడి ఉన్న, ఇంధన సంపన్న దేశమైన అంగోలాను సందర్శించిన మొదటి భారత రాష్ట్రపతిగా ఆమె నిలిచారు.

ఇరు దేశాల మధ్య వాణిజ్య, ఆర్థిక సహకారం ద్వైపాక్షిక సంబంధాలకు మూల స్తంభం వంటిదని రాష్ట్రపతి ద్రౌపది ముర్ము ఉద్ఘాటించారు. డిజిటల్ టెక్నాలజీ, రక్షణ, వ్యవసాయం, ఆహార శుద్ధి వంటి కీలక రంగాలలో అవకాశాలను అన్వేషించడం ద్వారా ఆర్థిక సంబంధాలను మరింత బలోపేతం చేసుకోవడానికి అపారమైన అవకాశాలు ఉన్నాయని ఆమె స్పష్టం చేశారు.

రాష్ట్రపతి ముర్ము తన ప్రసంగంలో ఇరు దేశాల భాగస్వామ్యాన్ని మరింత ముందుకు తీసుకెళ్లే అంశాలను ప్రస్తావించారు. డిజిటల్ రంగంలో భారతదేశం సాధించిన పురోగతిని అంగోలాకు బదిలీ చేయడం ద్వారా సహకారాన్ని పెంచే అవకాశం ఉందని, రక్షణ పరికరాల సరఫరా, శిక్షణ, భద్రతా అంశాలపై సహకరించుకోవడానికి అవకాశాలు విస్తృతంగా ఉన్నాయని పేర్కొన్నారు. వ్యవసాయం, ఆహార శుద్ధి రంగాలలో సాంకేతిక పరిజ్ఞానం పంచుకోవడం ద్వారా ఇరు దేశాల ఆర్థిక వ్యవస్థలకు ప్రయోజనం చేకూరుతుందని తెలిపారు.

రాష్ట్రపతి ముర్ము మాట్లాడుతూ, ఇరు దేశాల మధ్య ఇంధన రంగంలో ఉన్న సహకారం తమ ఆర్థిక బంధాలను నిరంతరం బలోపేతం చేస్తుందని తెలిపారు. మా ఆర్థిక సంబంధాలను మరింత బలోపేతం చేసుకోవడానికి ఈ అవకాశాలను సద్వినియోగం చేసుకోవడానికి మేము కట్టుబడి ఉన్నాము," అని ఆమె అంగోలా పార్లమెంట్ సభ్యులకు హామీ ఇచ్చారు.

రాష్ట్రపతి ముర్ము అంగోలా పార్లమెంట్‌లో 39 శాతం మంది మహిళా సభ్యులు ఉండటాన్ని ప్రశంసించారు. ఇది లింగ సమానత్వానికి, సమ్మిళిత పాలనకు తార్కాణం అని ఆమె పేర్కొన్నారు. అదే సమయంలో, భారతదేశం ఇటీవల పార్లమెంట్, రాష్ట్ర శాసనసభలలో మహిళలకు మూడో వంతు రిజర్వేషన్ కల్పిస్తూ చారిత్రక చట్టాన్ని ఆమోదించిన విషయాన్ని ఆమె సభ దృష్టికి తీసుకువచ్చారు.

భారత్- అంగోలా మధ్య సంబంధాలు కేవలం వాణిజ్యానికి మాత్రమే పరిమితం కాకుండా "పరస్పర గౌరవం, సమానత్వం, పరస్పర ప్రయోజనం" అనే బలమైన పునాదిపై ఆధారపడి ఉన్నాయని రాష్ట్రపతి ఉద్ఘాటించారు. ఈ సంబంధాలు రెండు దేశాల ప్రజలకు ఉమ్మడి ప్రయోజనాన్ని చేకూర్చే లక్ష్యంతో ముందుకు సాగుతున్నాయని ఆమె తెలిపారు.

భారత రాష్ట్రపతి ద్రౌపది ముర్ము పార్లమెంట్‌ను సందర్శించడానికి ముందు అంగోలా స్వాతంత్ర్య పోరాటంలో ప్రముఖ పాత్ర పోషించిన దేశ తొలి అధ్యక్షుడు డాక్టర్ ఆంటోనియో అగోస్టిన్హో నెటో స్మారక చిహ్నం వద్ద పుష్పాంజలి ఘటించి నివాళులర్పించారు. ఆమె లువాండా నగరంలోని నేషనల్ మ్యూజియం ఆఫ్ మిలిటరీ హిస్టరీని కూడా సందర్శించారు. రాష్ట్రపతి ద్రౌపది ముర్ము నాలుగు రోజుల అంగోలా పర్యటన తరువాత, నవంబర్ 11 నుండి 13 వరకు బోట్స్వానాలో కూడా పర్యటించనున్నారు.