భద్రత అనుమతుల తర్వాతే దేశంలో శాటిలైట్ ఇంటర్నెట్ సేవలు: టెలికాం మంత్రి సింధియా

దేశంలో శాటిలైట్ కమ్యూనికేషన్ (శాట్‌కామ్) సేవలు భద్రతా అనుమతులు పూర్తైన తర్వాతే ప్రారంభమవుతాయని కేంద్ర టెలికాం మంత్రి జ్యోతిరాదిత్య సింధియా స్పష్టం చేశారు. ఎలాన్ మస్క్‌కు చెందిన స్టార్‌లింక్‌తో పాటు వన్‌వెబ్, రిలయన్స్ జియో వంటి సంస్థలు ప్రభుత్వ భద్రతా నిబంధనలను పాటించిన తర్వాతే స్పెక్ట్రం కేటాయింపులు జరుగుతాయని ఆయన తెలిపారు.

భద్రతే మొదటి ప్రాధాన్యత

ఓ జాతీయ వార్తాసంస్థకు ఇచ్చిన ఇంటర్వ్యూలో సింధియా మాట్లాడుతూ, శాట్‌కామ్ సేవలకు సంబంధించిన రెండు ప్రధాన అంశాలు పరిష్కరించాల్సి ఉందన్నారు. ఒకటి భద్రతా సంస్థలు విధించిన నిబంధనలు, రెండోది స్పెక్ట్రం ధరల నిర్ణయం. అంతర్జాతీయ గేట్‌వేలు, డేటా భారత్‌లోనే ఉండేలా చూడడం వంటి భద్రతా అంశాలను కంపెనీలు తప్పనిసరిగా అమలు చేయాల్సి ఉంటుందని చెప్పారు.

శాటిలైట్ సేవల సామర్థ్యాన్ని నిరూపించడానికి ఇప్పటికే తాత్కాలిక స్పెక్ట్రాన్ని కొన్ని సంస్థలకు కేటాయించినట్లు సింధియా వెల్లడించారు. ఈ ప్రక్రియ కొనసాగుతోందని, భద్రతా ప్రమాణాలకు అనుగుణంగా ఉన్నాయని నిర్ధారించిన తర్వాత పూర్తి స్థాయిలో స్పెక్ట్రం కేటాయింపులు జరుగుతాయని తెలిపారు.

శాట్‌కామ్ స్పెక్ట్రం ధరల విషయంలో టెలికాం రెగ్యులేటరీ అథారిటీ ఆఫ్ ఇండియా (ట్రాయ్), టెలికాం శాఖ మధ్య కొన్ని అభిప్రాయ భేదాలు ఉన్నాయని సింధియా చెప్పారు. ఈ అంశంపై డిజిటల్ కమ్యూనికేషన్ కమిషన్ తుది నిర్ణయం తీసుకుంటుందని, అవసరమైతే కేబినెట్ అనుమతి కూడా తీసుకుంటామని తెలిపారు.

వొడాఫోన్ ఐడియా భవితవ్యం ఏమిటి?

మరోవైపు వొడాఫోన్ ఐడియా (వీఐ) కోరుతున్న ఆర్థిక సాయంపై స్పందించిన మంత్రి సింధియా, ఈ అంశం ప్రస్తుతం పరిశీలనలో ఉందని, దీనిపై ఇంకా ఎలాంటి తుది నిర్ణయం తీసుకోలేదని స్పష్టం చేశారు. ఇప్పటివరకు కంపెనీకి ప్రభుత్వం ఎలాంటి నేరుగా రాయితీలు ఇవ్వలేదని ఆయన తెలిపారు. అయితే, కంపెనీ ప్రభుత్వానికి చెల్లించాల్సిన సుమారు రూ. 37,000 కోట్ల బకాయిలను వాటాలుగా (ఈక్విటీ) మార్చడం వల్ల, ప్రస్తుతం వొడాఫోన్ ఐడియాలో కేంద్ర ప్రభుత్వానికి 49 శాతం వాటా ఉందని ఆయన వివరించారు. అంటే కంపెనీకి నగదు రూపంలో సాయం చేయకుండా, బకాయిలకు బదులుగా కంపెనీలో భాగస్వామ్యం తీసుకున్నట్లు చెప్పారు.

వొడాఫోన్ ఐడియా భవిష్యత్తు గురించి మాట్లాడుతూ, రాబోయే రోజుల్లో ఆ కంపెనీపై భారీగా ఆర్థిక భారం ఉందని మంత్రి పేర్కొన్నారు. 2026 మార్చి నాటికి కంపెనీ సుమారు రూ. 18,000 కోట్లు చెల్లించాల్సి ఉంటుందని, ఆ తర్వాత కూడా వచ్చే ఆరేళ్ల పాటు ప్రతి సంవత్సరం ఇదే స్థాయిలో బకాయిలు ఉంటాయని ఆయన వివరించారు. కంపెనీ మనుగడ సాగించాలంటే ఈ ఆర్థిక సవాళ్లను అధిగమించడం ఎంతో కీలకమని ఆయన అభిప్రాయపడ్డారు.

తక్కువ ధరకే సేవలు అందాలంటే..

భారత మార్కెట్లో కేవలం రెండు కంపెనీల (జియో, ఎయిర్‌టెల్) ఆధిపత్యం ఉండకూడదని ప్రభుత్వం భావిస్తోంది. వొడాఫోన్ ఐడియా, బీఎస్ఎన్ఎల్ వంటి సంస్థలు కూడా బలంగా ఉండాలని, అప్పుడే వినియోగదారులకు తక్కువ ధరకే సేవలు అందుతాయని కేంద్ర మంత్రి సింధియా అభిప్రాయపడ్డారు. ప్రస్తుతం వొడాఫోన్ ఐడియాకు 21 కోట్ల మంది, బీఎస్ఎన్ఎల్‌కు 10 కోట్ల మంది కస్టమర్లు ఉన్నారని, నాలుగు కంపెనీలతో కూడిన ఆరోగ్యకరమైన పోటీ ఉండాలని ప్రభుత్వం కోరుకుంటోందని ఆయన తెలిపారు.

శాటిలైట్ ఇంటర్నెట్ అంటే ఏమిటి?

మొబైల్ టవర్లు, కేబుల్స్‌తో పనిలేకుండా, అంతరిక్షంలోని ఉపగ్రహాల ద్వారా నేరుగా ఇంటర్నెట్ అందించే సాంకేతికతే శాటిలైట్ ఇంటర్నెట్ . దీనివల్ల అడవులు, కొండ ప్రాంతాలు, మారుమూల గ్రామాల్లో కూడా నగరాల తరహాలో హై-స్పీడ్ నెట్ అందుబాటులోకి వస్తుంది. ముఖ్యంగా వరదలు, తుఫాన్ల వంటి విపత్తుల సమయంలో టవర్లు పడిపోయినా ఈ సేవలు నిరంతరం పని చేస్తాయి. ఇది గ్రామీణ ప్రాంతాల్లో విద్య, వైద్యం, రక్షణ రంగానికి ఎంతో కీలకం. అయితే సాధారణ ఇంటర్నెట్‌తో పోలిస్తే దీని ఖర్చు కొంత ఎక్కువగా ఉండవచ్చు, వాతావరణ మార్పుల వల్ల సిగ్నల్‌లో అంతరాయం కలిగే అవకాశం ఉంటుంది.