బ్రెజిల్‌పై ట్రంప్ 50 శాతం సుంకాన్ని తిరస్కరించిన అమెరికా సెనేట్

అమెరికా అధ్యక్షుడు డొనాల్డ్ ట్రంప్ బ్రెజిల్ వస్తువులపై విధించిన 50 శాతం సుంకాన్ని (టారిఫ్) రద్దు చేస్తూ అమెరికా సెనేట్ ఒక కీలకమైన తీర్మానాన్ని ఆమోదించింది. ఈ ఓటింగ్‌లో తీర్మానానికి అనుకూలంగా 52 ఓట్లు రాగా, వ్యతిరేకంగా 48 ఓట్లు పడ్డాయి. ఈ సుంకాన్ని విధించడానికి ట్రంప్ ఉపయోగించిన 'జాతీయ అత్యవసర ప్రకటన'ను సెనేట్ పూర్తిగా తిరస్కరించడం విశేషం. ట్రంప్ వాణిజ్య విధానాలపై కాంగ్రెస్‌లో, ముఖ్యంగా ఆయన సొంత రిపబ్లికన్ పార్టీలోనే తీవ్ర వ్యతిరేకత పెరుగుతున్నట్లు ఈ ఓటు స్పష్టం చేస్తోందని పాలిటికో తెలిపింది.

రిపబ్లికన్ల తిరుగుబాటు

ట్రంప్ తీసుకున్న ఈ సుంకం నిర్ణయాన్ని వ్యతిరేకిస్తూ, డెమొక్రాట్‌లతో కలిసి ఓటు వేసిన ఐదుగురు రిపబ్లికన్ సెనేటర్లు ఈ పరిణామానికి కీలకంగా నిలిచారు. వారిలో మిచ్ మెక్‌కానెల్ (కెంటకీ), ర్యాండ్ పాల్ (కెంటకీ), థామ్ టిల్లిస్ (నార్త్ కరోలినా), సుసాన్ కాలిన్స్ (మైన్), లిసా ముర్కోవ్‌స్కీ (అలస్కా) ఉన్నారు. బ్రెజిల్, కెనడా వంటి దేశాలపై ట్రంప్ విధించిన సుంకాలను లక్ష్యంగా చేసుకుని అంచనా వేస్తున్న మూడు తీర్మానాలలో ఇది మొదటిది. అధ్యక్షుడి విధానాలు అమెరికన్ రైతులు, చిన్న వ్యాపారాలపై చూపుతున్న తీవ్ర ఆర్థిక ప్రభావంపై చట్టసభ సభ్యుల్లో నెలకొన్న ఆందోళనను ఈ ఓటు స్పష్టంగా ప్రతిబింబిస్తోంది.

అత్యవసర అధికార దుర్వినియోగంపై మండిపాటు

ఈ సుంకాల విధింపునకు ట్రంప్ జాతీయ అత్యవసర అధికారాన్ని ఉపయోగించడాన్ని సెనేటర్లు తీవ్రంగా విమర్శించారు. సెనేటర్ రాండ్ పాల్ ఈ నిర్ణయాన్ని తీవ్రంగా ఖండించారు. "అత్యవసర పరిస్థితులు అంటే యుద్ధం, కరువు, తుఫానుల వంటివి. ఒకరి సుంకాలు నచ్చకపోవడం అత్యవసర పరిస్థితి కాదు. ఇది అత్యవసర అధికారాన్ని దుర్వినియోగం చేయడమే. పన్నుల విషయంలో కాంగ్రెస్ తన పాత్రను అడ్డుకోవడమే అవుతుంది" అని ఆయన పేర్కొన్నారు.

డెమోక్రటిక్ సెనేటర్ రాన్ వైడెన్ (ఒరెగాన్) మాట్లాడుతూ, సుంకాలను విధించడం వల్ల అధిక ధరలు పెరిగాయని, తమ నియోజకవర్గాల ప్రజలు ఆర్థిక ఇబ్బందులను ఎదుర్కొంటున్నారని ఫిర్యాదు చేయడంతో చట్టసభ సభ్యుల్లో నిరాశ పెరుగుతోందన్నారు. “ఈ సుంకాలు నాశనం చేస్తున్నాయి అని రైతులు, వ్యాపారులు అంటున్నారు. కిరాణా దుకాణాలకు వెళ్లే ప్రతి ఒక్కరూ ఆగ్రహంతో ఉన్నారు" అని ఆయన వ్యాఖ్యానించారు.

సెనేటర్ టిమ్ కైన్ (వర్జీనియా) అత్యవసర అధికారాల వినియోగాన్ని ప్రమాదకరమైన ఆచారంగా అభివర్ణించారు. "అత్యవసర పరిస్థితి లేనప్పుడు అత్యవసరమని అబద్ధం చెప్పకండి. బ్రెజిల్ మాజీ అధ్యక్షుడిపై విచారణను అత్యవసరం కానప్పుడు, అది అత్యవసరం అని అబద్ధం చెప్పకండి. అబద్ధం చెప్పి ఒక సంవత్సరంలో కాఫీ ధరను 40 శాతం పెంచకండి. అబద్ధం చెప్పి మన పౌరులకు నష్టం కలిగించకండి" అని కైన్ తీవ్ర స్థాయిలో విమర్శించారు.

సుంకం విధింపునకు ట్రంప్ కారణాలు

ట్రంప్ గత జూలైలో బ్రెజిల్‌పై 50 శాతం సుంకాన్ని ప్రకటించడానికి ప్రధానంగా రెండు కారణాలు ఉన్నాయి. అందులో మొదటిది ట్రంప్‌ మాజీ మిత్రుడు, బ్రెజిల్ మాజీ అధ్యక్షుడు జైర్ బోల్సోనారో 2022 ఎన్నికల్లో ఓడిపోయిన తర్వాత, ఆయనపై బ్రెజిల్ ప్రభుత్వం దర్యాప్తులు, కేసులు ప్రారంభించింది. ట్రంప్ దీనిని “రాజకీయ ప్రతీకారం”గా పేర్కొంటూ, బోల్సోనారోకు మద్దతుగా నిలిచారు. అందుకే బ్రెజిల్‌పై శిక్షాత్మక చర్యగా 50 శాతం సుంకాలు విధించారు. రెండోది అమెరికన్ సోషల్ మీడియా సంస్థలను ప్రభావితం చేసే బ్రెజిల్ డిజిటల్ కంటెంట్ విధానాలు. ఈ కారణాన్ని చూపిస్తూ, బ్రెజిల్ విధానాలు “అమెరికా జాతీయ భద్రత, విదేశాంగ, ఆర్థిక ప్రయోజనాలకు అసాధారణ ముప్పు”గా పేర్కొని జాతీయ అత్యవసర పరిస్థితిని ప్రకటించారు.

తీర్మానం ప్రస్తుత పరిస్థితి

సెనేట్ ఈ తీర్మానాన్ని ఆమోదించినప్పటికీ, ఈ నిర్ణయం ప్రస్తుతానికి ప్రతీకాత్మకంగా మాత్రమే మిగిలిపోయింది. హౌస్ రిపబ్లికన్ నాయకులు ఈ సుంకాన్ని రద్దు చేసే ఓటును మార్చి వరకు వాయిదా వేశారు. ఇది తమ రాష్ట్రాలలోని రైతులు, వ్యాపారాల నుండి వచ్చే విమర్శల నుండి చట్టసభ సభ్యులను రక్షించడానికి తీసుకున్న చర్యగా భావిస్తున్నారు. కాబట్టి సెనేట్ తీర్మానం చట్టంగా మారాలంటే హౌస్ ఆఫ్ రిప్రజెంటేటివ్స్‌లో కూడా ఆమోదం పొందాలి.

అయితే, ట్రంప్ అత్యవసర ప్రకటన ద్వారా సుంకాలను విధించడం ద్వారా తన అధికారాన్ని అతిక్రమించారా లేదా అనే అంశంపై వచ్చే వారం అమెరికా సుప్రీంకోర్టు విచారణ చేపట్టనుంది. సుప్రీంకోర్టు ఇచ్చే తీర్పు ట్రంప్ వాణిజ్య విధానాల చట్టబద్ధతపై, అధ్యక్షుడి అత్యవసర అధికారాలపై భారీ ప్రభావాన్ని చూపనుంది.