బ్రిటన్ మాజీ ప్రిన్స్ ఆండ్రూ మౌంట్బాటన్ అరెస్టు
బ్రిటన్ రాజకుటుంబంలో సంచలన పరిణామం చోటుచేసుకుంది. కింగ్ చార్లెస్ III సోదరుడు ఆండ్రూ మౌంట్బాటన్-విండ్సర్ను యూకే పోలీసులు గురువారం అరెస్ట్ చేశారు. ప్రభుత్వ పదవిలో ఉండి అధికార దుర్వినియోగానికి పాల్పడ్డారన్న ఆరోపణలపై ఈ చర్య తీసుకున్నట్లు అధికారులు వెల్లడించారు. అమెరికాకు చెందిన లైంగిక నేరగాడు జెఫ్రీ ఎప్స్టీన్తో ఆండ్రూకు ఉన్న సంబంధాలే ఈ అరెస్టుకు ప్రధాన కారణమయ్యాయి. విశేషమేమిటంటే, ఆండ్రూ తన 66వ పుట్టినరోజు జరుపుకుంటున్న రోజే కటకటాల పాలయ్యారు.
ఆండ్రూ నివాసాల్లో సోదాలు
థేమ్స్ వ్యాలీ పోలీసులు ఆండ్రూకు సంబంధించిన బెర్క్షైర్, నార్ఫోక్లోని నివాసాల్లో విస్తృతంగా సోదాలు నిర్వహిస్తున్నారు. నిబంధనల ప్రకారం పోలీసులు నిందితుడి పేరును అధికారికంగా ప్రకటించనప్పటికీ, అరెస్ట్ అయింది 66 ఏళ్ల ఆండ్రూనేనని బ్రిటన్ మీడియా స్పష్టం చేస్తోంది.
థేమ్స్ వ్యాలీ పోలీస్ అసిస్టెంట్ చీఫ్ కానిస్టేబుల్ ఒలివర్ రైట్ మాట్లాడుతూ.. “ఆరోపణలను సమగ్రంగా పరిశీలించిన తర్వాతే దర్యాప్తు ప్రారంభించాం. ఈ కేసులో పారదర్శకత, నిష్పాక్షికతకు అత్యంత ప్రాధాన్యం ఇస్తాం. ప్రజల్లో దీనిపై ఆసక్తి ఎక్కువగా ఉన్నందున, ఎప్పటికప్పుడు వివరాలు తెలియజేస్తాం” అని పేర్కొన్నారు.
చట్టానికి ఎవరూ అతీతులు కారు: యూకే ప్రధాని
ఈ వ్యవహారంపై యూకే ప్రధాని కియర్ స్టార్మర్ స్పందిస్తూ.. “దేశంలో ఎవరైనా సరే చట్టానికి లోబడి ఉండాల్సిందే. ఈ కేసుకు సంబంధించి సమాచారం ఉన్నవారు ఎవరైనా నిర్భయంగా ముందుకు రావాలి” అని పిలుపునిచ్చారు. మహిళలు, బాలికలపై జరిగే హింసకు సంబంధించి ఎంతటి వారినైనా విచారించాల్సిందేనని ఆయన తేల్చి చెప్పారు.
బకింగ్హామ్ ప్యాలెస్ స్పందన
అమెరికా కాంగ్రెస్ ఇటీవల విడుదల చేసిన ‘ఎప్స్టీన్ ఫైల్స్’ నేపథ్యంలో ఆండ్రూపై తీవ్ర ఒత్తిడి పెరిగింది. ఈ క్రమంలో బకింగ్హామ్ ప్యాలెస్ ఒక ప్రకటన విడుదల చేస్తూ.. ఆండ్రూ ప్రవర్తనపై వస్తున్న ఆరోపణల పట్ల రాజు తీవ్ర ఆందోళనతో ఉన్నారని, పోలీసు దర్యాప్తుకు తాము పూర్తి సహకారం అందిస్తామని స్పష్టం చేసింది. బాధితులకు రాజు, రాణి కెమిల్లా తమ సానుభూతిని వ్యక్తం చేశారు.
బాధితుల వెంటే మేముంటాం: విలియం దంపతులు
మరోవైపు ప్రిన్స్ విలియం, కేట్ మిడిల్టన్ కార్యాలయం (కెన్సింగ్టన్ ప్యాలెస్) కూడా స్పందించింది. తాజా పరిణామాల పట్ల యువరాజు దంపతులు తీవ్ర ఆందోళన చెందుతున్నారని, తమ ఆలోచనలు ఎప్పుడూ బాధితుల పక్షాన ఉంటాయని వారు ప్రకటించారు.
ఆండ్రూ అరెస్టుపై కింగ్ చార్లెస్ ఏమన్నారంటే?
బ్రిటన్ రాజు కింగ్ చార్లెస్ III తన సోదరుడు ఆండ్రూ మౌంట్బాటన్-విండ్సర్పై జరుగుతున్న పోలీసు విచారణ గురించి స్పందిస్తూ.. ఈ విషయంలో చట్టం తన పని తాను చేసుకుపోతుందని, ఎవరూ దానికి అతీతులు కారని స్పష్టం చేశారు
7 రాష్ట్రాల పోలీసుల సమన్వయం
ఈ కేసు తీవ్రత దృష్ట్యా లండన్ మెట్రోపాలిటన్ పోలీసులు, థేమ్స్ వ్యాలీ, నార్ఫోక్ సహా మొత్తం ఏడు రాష్ట్రాల పోలీస్ విభాగాలు సమన్వయంతో దర్యాప్తు చేస్తున్నాయి. ఎప్స్టీన్ డైరీలో ఉన్న వివరాల ఆధారంగా బ్రిటన్లో ఇంకెవరికైనా సంబంధాలు ఉన్నాయా అనే కోణంలోనూ ఆరా తీస్తున్నారు. రాజకుటుంబానికి చెందిన వ్యక్తి ఇలా పోలీసు కస్టడీలోకి వెళ్లడం బ్రిటన్ చరిత్రలో అత్యంత అరుదైన మరియు కీలకమైన ఘటనగా నిపుణులు అభిప్రాయపడుతున్నారు.
గత ఏడాదే రాజు చార్లెస్ ఆండ్రూకు ఉన్న 'ప్రిన్స్', 'డ్యూక్ ఆఫ్ యార్క్' వంటి రాజరిక బిరుదులను తొలగించిన విషయం తెలిసిందే. ఆండ్రూ తనపై వస్తున్న ఆరోపణలను తోసిపుచ్చుతున్నప్పటికీ, తాజా అరెస్ట్తో ఈ వివాదం కీలక మలుపు తిరిగింది. కేసు ప్రస్తుతం కోర్టు పరిధిలో ఉన్నందున, ప్రచురణల విషయంలో మీడియా సంయమనం పాటించాలని పోలీసులు హెచ్చరించారు.