బ్రిటన్, కెనడా పౌరులకు చైనా వీసా రహిత ప్రవేశం

పర్యాటక రంగాన్ని బలోపేతం చేయడంతో పాటు అంతర్జాతీయ వ్యాపార సంబంధాలను మెరుగుపరుచుకోవడమే లక్ష్యంగా చైనా ప్రభుత్వం కీలక నిర్ణయం తీసుకుంది. బ్రిటన్, కెనడా పౌరులకు తమ దేశంలోకి వీసా లేకుండానే ప్రవేశించేందుకు అనుమతి ఇచ్చింది. ఈ కొత్త నిబంధన నేటి (ఫిబ్రవరి 17) నుంచి అమల్లోకి రానుంది. తాజా నిర్ణయంతో చైనాలోకి వీసా లేకుండా ప్రవేశించగలిగే దేశాల సంఖ్య 79కి చేరింది.

30 రోజుల పాటు బసకు అవకాశం

గత రెండేళ్లుగా చైనా తన దేశంలోకి వచ్చే విదేశీయులకు వీసా నిబంధనలను భారీగా సడలిస్తోంది. కొత్త నిబంధనల ప్రకారం.. పర్యాటకులు, వ్యాపారవేత్తలు లేదా బంధువులను చూడటానికి వచ్చేవారు వీసా లేకుండానే నేరుగా చైనా వెళ్లి 30 రోజుల పాటు అక్కడ ఉండవచ్చు. సాధారణంగా చైనా వీసా తీసుకోవడం చాలా కష్టంతో కూడుకున్న పని, కానీ ఇప్పుడు ఆ అవసరం లేకపోవడంతో పర్యాటకులకు, పారిశ్రామికవేత్తలకు పెద్ద ఉపశమనం లభించినట్లయింది. దీనివల్ల సమయం ఆదా అవ్వడమే కాకుండా ప్రయాణం కూడా చాలా సులభతరం అవుతుంది.

రాజకీయ సమీకరణాల ప్రభావం

బ్రిటన్ ప్రధాని కీర్ స్టార్మర్, కెనడా ప్రధాని మార్క్ కార్నీలు గత నెలలో చైనాలో పర్యటించారు. ఇటీవలి కాలంలో బీజింగ్‌తో దెబ్బతిన్న సంబంధాలను మెరుగుపరుచుకునేందుకు ఈ కొత్త నేతలు ప్రయత్నిస్తున్నారు. ఈ నేపథ్యంలోనే చైనా ప్రభుత్వం ఆయా దేశాలకు వీసా రహిత వెసులుబాటు కల్పించడం విశేషం. ప్రస్తుతం ఐరోపాలోని మెజారిటీ దేశాలతో పాటు లాటిన్ అమెరికా, ఆగ్నేయాసియా, మధ్యప్రాచ్యంలోని కొన్ని దేశాలకు చైనా ఈ సౌకర్యాన్ని కల్పిస్తోంది.

ట్రాన్సిట్ ప్రయాణికులకు 10 రోజుల గడువు

మరోవైపు అమెరికా, ఇండోనేషియా వంటి కొన్ని దేశాల పౌరులకు చైనా 'ట్రాన్సిట్ వీసా' వెసులుబాటును మాత్రమే ఇస్తోంది. దీని ప్రకారం.. ఇతర దేశాలకు వెళ్లే క్రమంలో చైనా మీదుగా ప్రయాణించే వారు అక్కడ 10 రోజుల పాటు ఉండవచ్చు. అయితే వారి వద్ద చైనా నుంచి వేరే దేశానికి వెళ్లే విమాన టిక్కెట్లు తప్పనిసరిగా ఉండాలి. చాలా దేశాలకు ఇస్తున్న ఈ వీసా రహిత ప్రవేశ గడువు ఈ ఏడాది చివరితో ముగియనున్నప్పటికీ, గతంలో లాగే ప్రభుత్వం దీనిని పొడిగించే అవకాశం ఉందని విశ్లేషకులు భావిస్తున్నారు.