బెంగాల్ ఓటర్ల జాబితాలో బీజేపీ 'అక్రమ' చొరబాటు : మమతా బెనర్జీ

పశ్చిమ బెంగాల్ అసెంబ్లీ ఎన్నికల ప్రచారం పీక్ స్టేజ్‌కు చేరుకున్న తరుణంలో, ముఖ్యమంత్రి, తృణమూల్ కాంగ్రెస్ అధినేత్రి మమతా బెనర్జీ బీజేపీపై తీవ్రస్థాయిలో విరుచుకుపడ్డారు. పశ్చిమ మేదినీపూర్‌లోని చంద్రకోనా గర్బేటాలో జరిగిన భారీ బహిరంగ సభల్లో ఆమె మాట్లాడుతూ, ఎన్నికల ఫలితాలను తమకు అనుకూలంగా మార్చుకోవడానికి బీజేపీ ఇతర రాష్ట్రాల నుండి 'అక్రమ ఓటర్లను' బెంగాల్ ఓటర్ల జాబితాలో చేర్చడానికి ప్రయత్నిస్తోందని ఆరోపించారు.

బీహార్, రాజస్థాన్, హర్యానా, ఉత్తరప్రదేశ్ వంటి రాష్ట్రాల నుండి నివాస ధృవీకరణలేని వ్యక్తులను ఓటర్లుగా చేర్చి, వారిని రైళ్ల ద్వారా అసన్సోల్, ఖరగ్‌పూర్ వంటి ప్రాంతాలకు తరలించి దొంగ ఓట్లు వేయించాలని బీజేపీ కుట్ర పన్నుతోందని ఆమె మండిపడ్డారు.

ఈ అక్రమ ఓటర్ల నమోదు ప్రక్రియపై మమతా బెనర్జీ గణాంకాలతో సహా వివరించారు. కేవలం ఒక్క రోజులోనే సుమారు 30,000 కొత్త ఓటరు దరఖాస్తులు (ఫామ్ 6) దాఖలయ్యాయని, ఈ విషయాన్ని గమనించిన అభిషేక్ బెనర్జీ తన ప్రచారాన్ని మధ్యలోనే ఆపి కోల్‌కతాలోని ఎన్నికల కమిషన్ (ఈసీ) కార్యాలయానికి వెళ్లాల్సి వచ్చిందని ఆమె తెలిపారు. బెంగాల్‌తో ఎలాంటి సంబంధం లేని వ్యక్తులను ఓటర్ల జాబితాలో చేర్చడం "చట్టవిరుద్ధం, రాజ్యాంగ విరుద్ధం, ప్రజాస్వామ్య విరుద్ధం" అని పేర్కొంటూ ఆమె కేంద్ర ఎన్నికల కమిషనర్ జ్ఞానేష్ కుమార్‌కు ఘాటుగా లేఖ రాశారు. ఈ కుట్రను బెంగాల్ ప్రజలు సహించబోరని, బీజేపీ ఇప్పటికే బీహార్, మహారాష్ట్రల్లో ఇటువంటి ఎత్తుగడలతో విజయం సాధించిందని, కానీ బెంగాల్‌లో ఆ పప్పులు ఉడకవని ఆమె హెచ్చరించారు.

ఎన్నికల కమిషన్ తీరుపై కూడా మమతా బెనర్జీ తీవ్ర అసహనం వ్యక్తం చేశారు. బీజేపీ కనుసన్నల్లో పనిచేస్తున్న ఈసీ, 'సర్' (సర్ అంటే సర్వనాశనం అని ఆమె అభివర్ణించారు) పేరుతో ఓటర్ల తొలగింపు ప్రక్రియ చేపట్టిందని, ఇందులో భాగంగా మహిళలు, మైనారిటీల పేర్లను భారీగా తొలగించారని ఆమె ఆరోపించారు.

సప్లిమెంటరీ జాబితాల నుండి 18 లక్షల పేర్లను తొలగించడం ద్వారా బీజేపీ, ప్రజల పౌరసత్వాన్ని, రాజ్యాంగ హక్కులను హరిస్తోందని ఆమె విమర్శించారు. తన న్యాయ పోరాటం వల్లే సుప్రీంకోర్టు జోక్యంతో 22 లక్షల పేర్లు తిరిగి జాబితాలో చేరాయని, లేకపోతే బీజేపీ బెంగాల్ నుండి ఏకంగా 5 కోట్ల పేర్లను తొలగించి ఉండేదని ఆమె సంచలన వ్యాఖ్యలు చేశారు.

రాష్ట్రంలోని 294 అసెంబ్లీ స్థానాల్లో అభ్యర్థులు ఎవరనేది పక్కన పెట్టి, తననే అభ్యర్థిగా భావించి ఓటు వేయాలని మమతా బెనర్జీ ఓటర్లకు విజ్ఞప్తి చేశారు.బీజీపీ అధికారంలోకి వస్తే బెంగాలీ ప్రజల ఆహారపు అలవాట్లపై ఆంక్షలు విధిస్తుందని, మాంసాహారం తినకుండా అడ్డుకుంటుందని ఆమె ఆందోళన వ్యక్తం చేశారు. ఇతర బీజేపీ పాలిత రాష్ట్రాల్లో ఇప్పటికే ఆహార స్వేచ్ఛను హరించారని, బెంగాల్ ప్రజలు జాగ్రత్తగా ఉండాలని సూచించారు. బెంగాల్ అస్తిత్వాన్ని కాపాడుకోవడానికి ప్రతి ఒక్కరూ టీఎంసీకి మద్దతు ఇవ్వాలని, రాష్ట్రంలో ఎట్టి పరిస్థితుల్లోనూ ఎన్ఆర్సి )ని అమలు చేయనివ్వబోమని, నిర్బంధ కేంద్రాలను ( అనుమతించబోమని ఆమె స్పష్టం చేశారు.

కేంద్రంలోని బీజేపీ ప్రభుత్వం అన్ని రాజ్యాంగ, చట్టబద్ధమైన సంస్థలను తమ పార్టీ కార్యాలయాలుగా మార్చేసిందని మమతా ఆరోపించారు. ఈ సంస్థల ద్వారా ప్రజలకు న్యాయం అందకుండా చేస్తోందని, ప్రజాస్వామ్యాన్ని అపహాస్యం చేస్తోందని మండిపడ్డారు. బెంగాల్ గడ్డపై బీజేపీ ని ఓడించి, తద్వారా ఢిల్లీలో కూడా మార్పు తీసుకురావడమే తమ లక్ష్యమని ఆమె ఉద్ఘాటించారు. "మేము బెంగాల్ గెలిచిన తర్వాత ఢిల్లీ వైపు అడుగులు వేస్తాం, రాజ్యాంగ సంస్థలను తిరిగి ప్రజల వశం చేస్తాం" అని ఆమె ధీమా వ్యక్తం చేశారు.

చివరగా, రాష్ట్రంలో శాంతిభద్రతల విషయంలో రాజీపడే ప్రసక్తే లేదని, బీజేపీ చేసే విభజన రాజకీయాలను ప్రజలు తిప్పికొట్టాలని ఆమె పిలుపునిచ్చారు. హిందూ, ముస్లిం, గిరిజన, షెడ్యూల్డ్ కులాల మహిళలు తమ ఓటు హక్కు కోసం ట్రిబ్యునళ్ల ముందు క్యూలో నిలబడటం తన మనసును కలిచివేసిందని ఆమె ఆవేదన వ్యక్తం చేశారు. బెంగాల్ సంస్కృతిని, ప్రజాస్వామ్యాన్ని కాపాడటానికి తాను చివరి వరకు పోరాడుతానని, బీజేపీ చేస్తున్న ఈ 'ఓటరు కుతంత్రాన్ని' ప్రజల సహకారంతో అడ్డుకుంటామని మమతా బెనర్జీ తన ప్రసంగాన్ని ముగించారు.