బీసీ రిజర్వేషన్లపై అక్టోబర్ 23న తెలంగాణ కేబినెట్ నిర్ణయం

తెలంగాణ ఉపముఖ్యమంత్రి మల్లు భట్టి విక్రమార్క శుక్రవారం రాష్ట్ర ప్రభుత్వం బీసీలకు 42 శాతం రిజర్వేషన్లను అమలు చేయాలన్న సంకల్పంతో ముందుకు సాగుతుందని, ఈ అంశాన్ని అక్టోబర్ 23న జరిగే కేబినెట్ సమావేశంలో చర్చించి తుది నిర్ణయం తీసుకుంటామని తెలిపారు.

సుప్రీంకోర్టు ఇటీవల హైకోర్టు ఇచ్చిన ఆదేశాలను కొనసాగిస్తూ, స్థానిక సంస్థల్లో బీసీలకు 42 శాతం రిజర్వేషన్ కల్పించే రాష్ట్ర ప్రభుత్వ జీఓపై నిలుపుదల విధించిన తీర్పును సవాలు చేస్తూ తెలంగాణ ప్రభుత్వం వేసిన పిటిషన్‌ను కొట్టివేసింది. ఈ నేపథ్యంలో భట్టి విక్రమార్క ప్రకటన చేశారు. కాంగ్రెస్ పార్టీ ప్రభుత్వం బీసీలకు 42 శాతం రిజర్వేషన్ కల్పించడంపై నిబద్ధతతో ఉంది. సుప్రీంకోర్టు తీర్పు ప్రతిని అందుకున్న వెంటనే, ఈ అంశాన్ని కేబినెట్ సమావేశంలో చర్చించి తగిన నిర్ణయం తీసుకుంటామ‌ని ఆయన ఒక ప్రకటనలో పేర్కొన్నారు.

భట్టి విక్రమార్క మాట్లాడుతూ, 2018 స్థానిక సంస్థల ఎన్నికల సమయంలో బీఆర్ఎస్ ప్రభుత్వం చట్టం ద్వారా మొత్తం రిజర్వేషన్లపై 50 శాతం పరిమితి విధించిందని, ఆ పరిమితిని ప్రస్తుత కాంగ్రెస్ ప్రభుత్వం రద్దు చేసిందని పేర్కొన్నారు. రాష్ట్ర ప్రభుత్వం ఇప్పటికే రిజర్వేషన్ల అమలుకు అవసరమైన అన్ని చర్యలను పూర్తి చేసిందని అందులో కేబినెట్ తీర్మానం, సర్వే నిర్వహణ, ప్రత్యేక కమిషన్ నియామకం, అసెంబ్లీ ఏకగ్రీవ ఆమోదం వంటి అంశాలు ఉన్నాయని ఆయన వివరించారు.

అయితే, ఈ బిల్లును కేంద్రం అనవసరంగా ఆలస్యం చేస్తోందని ఆయన ఆరోపించారు. బీసీ రిజర్వేషన్ బిల్లును అమలు చేయడంలో కేంద్రంలోని బీజేపీ ప్రభుత్వం అడ్డంకులు సృష్టిస్తోందన్నారు. ముఖ్యమంత్రి రేవంత్ రెడ్డి సహా అన్ని రాజకీయ పార్టీలు ఢిల్లీ వెళ్లి ఈ అంశంపై కేంద్ర నాయకత్వంతో చర్చించేందుకు సిద్ధంగా ఉన్నప్పటికీ, కేంద్రం ఇప్పటివరకు సమయం ఇవ్వలేదని భట్టి విక్రమార్క తెలిపారు. ప్రెసిడెంట్ ద్రౌపది ముర్ము, ప్రధాన మంత్రి నరేంద్ర మోదీతో సమావేశమై బిల్లుపై చర్చించేందుకు ఆల్ పార్టీ డెలిగేషన్‌కి అనుమతి ఇవ్వాలంటూ పలు మార్లు కేంద్రానికి లేఖలు రాసినప్పటికీ స్పందన రాలేదని ఆయన తెలిపారు.

భట్టి విక్రమార్క స్పష్టంచేసినట్లు, బీసీ రిజర్వేషన్ల అమలు కేవలం రాజకీయ వాగ్దానం కాకుండా, సామాజిక న్యాయం సాధనలో కీలకమైన అడుగుగా కాంగ్రెస్ ప్రభుత్వం దీన్ని భావిస్తోందన్నారు. ఈ అంశంపై తుది నిర్ణయం అక్టోబర్ 23న జరిగే తెలంగాణ కేబినెట్ సమావేశంలో తీసుకోనున్నారు.