బీజేపీ కమిషన్ లా ఈసీ వ్యవహరిస్తోంది: సీఎం మమతా బెనర్జీ
పశ్చిమ బెంగాల్ ముఖ్యమంత్రి మమతా బెనర్జీ మంగళవారం మతువా సముదాయం ఉన్న బోంగావ్–ఠాకుర్నగర్ ప్రాంతంలో నిర్వహించిన సభలో సీఏఏ, ఎస్ఐఆర్, ఎన్నికల కమిషన్పై తీవ్ర ఆగ్రహం వ్యక్తం చేశారు. రాష్ట్రంలోని మతువా-మెజారిటీ ప్రాంతాలలోని ఓటర్లు పౌరసత్వం (సవరణ) చట్టం ప్రకారం తమను విదేశీయులుగా ప్రకటించుకుంటే వెంటనే ఓటర్ల జాబితా నుంచి తొలగించే అవకాశం ఉందని ఆమె అన్నారు. బెంగాల్లో నన్ను (రాజకీయంగా) లక్ష్యంగా చేసుకుని కొట్టడానికి ప్రయత్నిస్తే, దేశవ్యాప్తంగా మీ పునాదులను నేను కదిలిస్తాను. గాయపడిన పులి జీవించి ఉన్న పులి కంటే ప్రమాదకరమైనది అని బెనర్జీ హెచ్చరించారు. 2024 లోక్సభ ఎన్నికల్లో ఓటు వేసిన వారు నిజమైన ఓటర్లు. వారు లేకపోతే కేంద్రంలోని ప్రభుత్వానికి పరిపాలించే హక్కు లేదని ఆమె అన్నారు. సభ అనంతరం ఠాకుర్నగర్ వరకు 3 కిలోమీటర్ల ర్యాలీ నిర్వహించారు.
ఎస్ఐఆర్ పై సీఎం అభ్యంతరాలు
మానవ జీవితాలు చాలా విలువైనవని ముఖ్యమంత్రి అన్నారు. ఎస్ఐఆర్ భయంతో ఆత్మహత్య చేసుకోవద్దని ప్రజలకు విజ్ఞప్తి చేశారు. నిజమైన ఓటర్లను తొలగించే ప్రశ్నే ఉండదని హామీ ఇచ్చారు. ఓటర్ల సవరణ ప్రక్రియ చుట్టూ ఉన్న భయాందోళనలకు ఇప్పటికే 35-36 మరణించారని, వాటిలో ఆత్మహత్యలు కూడా ఉన్నాయని ఆమె పేర్కొన్నారు.ఎస్ఐఆర్ లో పనిచేస్తున్న 10 మంది బూత్ స్థాయి ఉద్యోగులు ఆసుపత్రిలో ఉన్నారని, ముగ్గురు మరణించారని తెలిపారు. ఈ మరణాలకు ఎవరు బాధ్యులు? అని ఆమె ఈసీ-బీజేపీలను ప్రశ్నించింది. ఎస్ఐఆర్ ప్రక్రియ అస్తవ్యస్తంగా ఉందని పేర్కొంటూ, ముసాయిదా జాబితాలు ఎన్నికల సంఘం, బిజెపి సృష్టించిన వినాశకరమైన పరిస్థితిని చూపిస్తాయని ఆమె నొక్కి చెప్పారు. ఎన్నికల సంఘం "బిజెపి కమిషన్"గా మారిపోయిందని విమర్శించారు. ఇది ఢిల్లీ నుండి వచ్చిన సూచనల ప్రకారం పనిచేస్తుందని, అది తారుమారు చేయడానికి ఒక సాధనంగా ఏఐని ఉపయోగిస్తుందని సిఎం ఆరోపించారు. ఎస్ఐఆర్ ను రెండు లేదా మూడు సంవత్సరాలు నిర్వహిస్తే దానికి మద్దతు ఇస్తానని టీఎంసీ అధినేత్రి మమత చెప్పారు. 2026 బెంగాల్ అసెంబ్లీ ఎన్నికలకు ముందు రెండు నెలల్లో బలవంతంగా ఎందుకు చేపడుతున్నారని ప్రశ్నించారు. బీహార్ ఎన్నికల ఫలితం ఎస్ఐఆర్ ఫలితమేనని ఆమె నొక్కి చెప్పారు. ప్రతిపక్షం అక్కడ బిజెపి ఆటను అంచనా వేయలేకపోయిందని వివరించారు.
తప్పుడు సర్టిఫికెట్లు ఇస్తున్నాయి
మతువా ఓటర్లకు బీజేపీ అనుబంధ వర్గాలు బంగ్లాదేశ్ పుట్టినట్టు చూపుతూ తప్పుడు సర్టిఫికెట్లు ఇస్తున్నాయి అని మమతా ఆరోపించారు. 2002 వరకు బంగ్లాదేశ్లో ఉన్నారని రాసిన సర్టిఫికెట్లు 2025 తేదీలతో ఇస్తున్నారు. ఇది మోసం అని అన్నారు. అక్రమ వలసదారులను గుర్తించడమే లక్ష్యం అయితే, బీజేపీ పాలిత రాష్ట్రాల్లో కూడా అదే ప్రక్రియ ఎందుకు జరుగుతోందని ఆమె ప్రశ్నించారు.
మతువా ఓటర్లపై రెండు పార్టీల దృష్టి
పదేళ్లుగా అమలు చేస్తున్న సంక్షేమ పథకాలు మతువా వర్గాన్ని టీఎంసీ వైపు నిలబెడుతున్నాయని తృణమూల్ వర్గాలు అంటున్నాయి. అదే సమయంలో 2019 నుంచి సీఏఏ–శరణార్థి హక్కుల అంశాన్ని బలంగా ప్రచారం చేస్తూ బీజేపీ ఈ ప్రాంతాన్ని తమవైపు తిప్పుకోవడానికి ప్రయత్నిస్తోంది. బిజెపి బోంగావ్ ఎంపీ శాంతను ఠాకూర్, టీఎంసీ మధ్య ఆరోపణలు–ప్రత్యారోపణలు కొనసాగుతున్నాయి. 2026 అసెంబ్లీ ఎన్నికల నేపథ్యంలో ఎస్ఐఆర్ ప్రక్రియ రెండు పార్టీల మధ్య మరింత రాజకీయ ఉద్రిక్తతకు దారితీస్తోంది.