బీజేపీలోకి చేరిన బీఆర్ఎస్ మాజీ కార్పొరేటర్ మేకల విజయలక్ష్మి

హైదరాబాద్‌లోని నాంపల్లి ప్రాంతంలోని తెలంగాణ బీజేపీ రాష్ట్ర కార్యాలయంలో ఆదివారం రాజకీయ పరిణామం చోటుచేసుకుంది. చేవెళ్ల పార్లమెంట్ పరిధిలోని మహేశ్వరం నియోజకవర్గానికి చెందిన ప్రముఖ బీఆర్ఎస్ నాయకులు, జిల్లెలగూడకు చెందిన బీఆర్ఎస్ మాజీ కార్పొరేటర్ మేకల విజయలక్ష్మి, రవీందర్ రెడ్డి తన అనుచరులతో కలిసి బీజేపీలో చేరారు. రాష్ట్ర బీజేపీ అధ్యక్షుడు ఎన్. రామచందర్ రావు, ఎంపీ కొండా విశ్వేశ్వర్ రెడ్డి సమక్షంలో ఆమెకు పార్టీ కండువా కప్పి అధికారికంగా ఆహ్వానించారు. ఈ కార్యక్రమంలో చేవెళ్ల పార్లమెంట్ పరిధిలోని మహేశ్వరం నియోజకవర్గం నుంచి బీజేపీ తరఫున పోటీ చేసిన నేత అండేలా శ్రీరాములు సహా పలువురు పార్టీ సీనియర్ నాయకులు కూడా పాల్గొన్నారు.

ప్రత్యేకించి మహిళా నేతలు పెద్ద సంఖ్యలో బీజేపీలో చేరడం, ప్ర‌ధాని మోదీ ‘మహిళా నేతృత్వంలోని అభివృద్ధి’ విజన్‌కు లభిస్తున్న మద్దతుకు నిదర్శనం అని రామచందర్ రావు పేర్కొన్నారు. మేకల విజయలక్ష్మి గతంలో బీఆర్‌ఎస్ పార్టీ తరఫున జిల్లెలగూడకు కార్పొరేటర్‌గా పనిచేశారు. ఇప్పుడు ఆమె బీజేపీలో చేరడం స్థానిక రాజకీయాల్లో ప్రాధాన్యత సంతరించుకుంది. ఆమెతో పాటు పలువురు కార్యకర్తలు కూడా బీజేపీలో చేరినట్లు పార్టీ నాయకులు తెలిపారు.