బీజాపూర్లో ఎదురుకాల్పులు
ఛత్తీస్గఢ్లోని బీజాపూర్ జిల్లాలో బుధవారం జరిగిన ఎన్కౌంటర్లో 12 మంది నక్సలైట్లు, రాష్ట్ర పోలీసుల బలగాల్లోని ప్రత్యేక యూనిట్ అయిన డిస్ట్రిక్ట్ రిజర్వ్ గార్డ్ (డీఆర్జీ)కి చెందిన ముగ్గురు జవాన్లు మరణించారని అధికారులు తెలిపారు. ఈ కాల్పుల్లో మరో ఇద్దరు డీఆర్జీ జవాన్లు గాయపడ్డారు. ప్రస్తుతం ఆ ప్రాంతంలో నక్సల్ వ్యతిరేక ఆపరేషన్ కొనసాగుతోందని వారు పేర్కొన్నారు. బీజాపూర్-దంతేవాడ జిల్లాల సరిహద్దులోని అడవి ప్రాంతంలో భద్రతా బలగాల ఉమ్మడి బృందం నక్సల్ వ్యతిరేక ఆపరేషన్ నిర్వహిస్తుండగా ఈ కాల్పులు చోటుచేసుకున్నాయని బస్తర్ రేంజ్ ఐజీ సుందర్రాజ్ పట్లింగం తెలిపారు.
ఆయుధాలు స్వాధీనం
ఈ ఆపరేషన్లో దంతేవాడ, బీజాపూర్ డీఆర్జీ బలగాలు, రాష్ట్ర పోలీసుల స్పెషల్ టాస్క్ ఫోర్స్ (ఎస్టీఎఫ్), సీఆర్పీఎఫ్ ఎలైట్ యూనిట్ కోబ్రా (కమాండో బెటాలియన్ ఫర్ రిసోల్యూట్ యాక్షన్) బలగాలు పాల్గొన్నాయి. ఎన్కౌంటర్ స్థలంలో ఇప్పటివరకు 12 మంది నక్సలైట్ల మృతదేహాలు స్వాధీనం చేసుకున్నామని, వారి గుర్తింపు ఇంకా నిర్ధారించాల్సి ఉందని సీనియర్ ఐపీఎస్ అధికారి తెలిపారు. అలాగే సింగిల్ లోడింగ్ రైఫిల్స్ (ఎస్ఎల్ఆర్), ఇన్సాస్ రైఫిల్స్, 303 రైఫిల్స్ మినహా ఇతర ఆయుధాలు, మందుగుండు సామగ్రి కూడా స్వాధీనం చేసుకున్నట్లు ఆయన పేర్కొన్నారు. బీజాపూర్ డీఆర్జీకి చెందిన హెడ్ కానిస్టేబుల్ మోనూ వడాడి, కానిస్టేబుల్ డుకారు గొండే, జవాన్ రమేష్ సోధి ఈ ఎన్కౌంటర్లో వీరమరణం పొందారు. మరో ఇద్దరు డీఆర్జీ సిబ్బంది గాయపడ్డారని ఐజీ తెలిపారు.
కొనసాగుతున్న ఆపరేషన్
గాయపడిన జవాన్లకు తక్షణమే ప్రథమ చికిత్స అందించామని, ప్రస్తుతం వారు ప్రమాదం నుంచి బయటపడినట్లు ఆయన చెప్పారు. మెరుగైన చికిత్స కోసం అవసరమైన ఏర్పాట్లు చేస్తున్నట్లు తెలిపారు. పశ్చిమ బస్తర్ డివిజన్లోని ఈ ఎన్కౌంటర్ స్థలానికి రియిన్ఫోర్స్మెంట్ బృందాలను పంపించామని, అక్కడ సెర్చ్ ఆపరేషన్ కొనసాగుతోందని బీజాపూర్ ఎస్పీ జితేంద్ర యాదవ్ తెలిపారు. ఈ ఘటనతో ఈ ఏడాది ఛత్తీస్గఢ్లో ఎన్కౌంటర్లలో హతమైన నక్సలైట్ల సంఖ్య 275కి చేరింది. వీరిలో 246 మంది బీజాపూర్, దంతేవాడతో సహా ఏడు జిల్లాలను కలిగి ఉన్న బస్తర్ డివిజన్లో 27 మంది రాయపూర్ డివిజన్లోని గరియాబంద్ జిల్లాలో, ఇంకా ఇద్దరు దుర్గ్ డివిజన్లోని మొహ్లా-మాన్పూర్-అంబాగఢ్ చౌకీ జిల్లాలో హతమయ్యారు. 2026 మార్చి 31లోగా దేశంలో లెఫ్ట్ భావజాల తీవ్రవాదాన్ని పూర్తిగా నిర్మూలించాలని కేంద్ర ప్రభుత్వం గడువు నిర్ణయించిన విషయం తెలిసిందే.
2025 వ సంవత్సరం జరిగిన ఎదురు కాల్పుల్లో ఇప్పటి వరకు (డిసెంబర్ 3) ఛత్తీస్గఢ్లో జరిగిన నక్సల్ ఎన్కౌంటర్లు, ఐఈడీ దాడులు, ఇతర ఘటనలలో సుమారు 45 మంది భద్రతా సిబ్బంది (పోలీసు జవాన్లు, డీఆర్జీ, సీఆర్పీఎఫ్ సిబ్బంది) మరణించారు.