ఫ్లోరిడా ఎయిర్పోర్టుకు ‘డొనాల్డ్ ట్రంప్’ పేరు
అమెరికాలోని ఫ్లోరిడా రాష్ట్రంలో గల పామ్ బీచ్ అంతర్జాతీయ విమానాశ్రయం పేరు త్వరలో మారనుంది. ఈ విమానాశ్రయానికి అమెరికా అధ్యక్షుడు డొనాల్డ్ ట్రంప్ పేరును ఖరారు చేస్తూ కీలక నిర్ణయం తీసుకున్నారు. ఇకపై దీనిని "ప్రెసిడెంట్ డొనాల్డ్ జె. ట్రంప్ ఇంటర్నేషనల్ ఎయిర్పోర్ట్"గా పిలవనున్నారు. ఈ చారిత్రాత్మక మార్పునకు సంబంధించిన వివరాలను ట్రంప్ కుమారుడు, ప్రముఖ వ్యాపారవేత్త ఎరిక్ ట్రంప్ సోమవారం అధికారికంగా వెల్లడించారు.
గవర్నర్ ఆమోదం.. చట్టసభ మద్దతు
పామ్ బీచ్ విమానాశ్రయం పేరు మార్పునకు సంబంధించిన బిల్లుపై ఫ్లోరిడా గవర్నర్ రాన్ డిసాంటిస్ సంతకం చేశారు. ఈ ప్రక్రియలో రాష్ట్ర ప్రతినిధి మెగ్ వీన్బెర్గర్, అటార్నీ జనరల్ జేమ్స్ ఉత్మీయర్ కీలక పాత్ర పోషించగా, ఫ్లోరిడా హౌస్ మెజారిటీ సభ్యులు దీనికి మద్దతు పలికారు. ఈ సందర్భంగా ఎరిక్ ట్రంప్ సామాజిక మాధ్యమం 'ఎక్స్' వేదికగా ఆనందం వ్యక్తం చేస్తూ.. ఈ మార్పులో తాను కూడా భాగస్వామ్యం వహించడం గర్వంగా ఉందని పేర్కొన్నారు. కొత్త పేరు జూలై 1వ తేదీ నుండి అధికారికంగా అమల్లోకి రానుంది.
ఎఫ్ఏఏ స్పష్టత
విమానాశ్రయం పేరు మార్పు అంశంపై ఫెడరల్ ఏవియేషన్ అడ్మినిస్ట్రేషన్ స్పందిస్తూ, ఇది పూర్తిగా స్థానిక నిర్ణయమని స్పష్టం చేసింది. పేరు మార్పు ప్రక్రియకు తాము ప్రత్యేకంగా అనుమతులు ఇవ్వాల్సిన అవసరం లేదని, అయితే విమానయాన మ్యాప్లు, డేటాబేస్లలో అడ్మినిస్ట్రేటివ్ మార్పులు చేయాల్సి ఉంటుందని పేర్కొంది. ఈ మేరకు నావిగేషన్ చార్టులను అప్డేట్ చేసే పనులను ప్రారంభించనున్నట్లు తెలిపింది.
ట్రేడ్మార్క్ దరఖాస్తు.. వాణిజ్య ప్రయోజనాలపై వివరణ
మరోవైపు ట్రంప్ ఫ్యామిలీ బిజినెస్ ఇప్పటికే ఈ విమానాశ్రయం పేరు మీద ట్రేడ్మార్క్ దరఖాస్తును దాఖలు చేసింది. ఇందులో భాగంగా లగేజీ బ్యాగులు, ఫ్లైట్ సూట్లు, సెక్యూరిటీ చెకింగ్ సమయంలో వాడే ప్లాస్టిక్ షూ ప్రొటెక్టర్ల వంటి వివిధ ట్రావెల్ వస్తువులపై ఈ పేరును ఉపయోగించే అవకాశం ఉంది. అయితే ఈ పేరు మార్పు ద్వారా ట్రంప్ కుటుంబం ఎలాంటి ఆర్థిక లాభాలను ఆశించడం లేదని ట్రంప్ ఆర్గనైజేషన్ స్పష్టం చేసింది. విమానాశ్రయం పేరు మార్పు వల్ల ట్రంప్ లేదా ఆయన కుటుంబ సభ్యులకు ఎలాంటి రాయల్టీలు గానీ, లైసెన్సింగ్ ఫీజులు గానీ అందవని ఫిబ్రవరిలోనే ఒక ప్రకటనలో స్పష్టతనిచ్చారు.