ఫోన్ ట్యాపింగ్ కేసు.. సిట్ విచారణకు బీఆర్ఎస్ ఎమ్మెల్సీ నవీన్ రావు

తెలంగాణలో సంచలనం సృష్టించిన ఫోన్ ట్యాపింగ్ కేసులో భాగంగా బీఆర్‌ఎస్ ఎమ్మెల్సీ నవీన్ రావు ఆదివారం ప్రత్యేక దర్యాప్తు బృందం (సిట్) ఎదుట విచారణకు హాజరయ్యారు. గత బీఆర్‌ఎస్ ప్రభుత్వ హయాంలో ఫోన్ ట్యాపింగ్ జరిగినట్లుగా ఆరోపణలు ఎదుర్కొంటున్న ఈ కేసులో హైదరాబాద్ పోలీసులు దర్యాప్తు చేస్తున్నారు. ఈ క్రమంలోనే నవీన్ రావును విచారణకు హాజరుకావాలంటూ సిట్ నోటీసులు జారీ చేసింది. ఆ నోటీసుల మేరకు ఆయన సిట్ కార్యాలయానికి వచ్చి అధికారుల ప్రశ్నలకు సమాధానాలు ఇచ్చినట్లు పోలీసులు తెలిపారు.

ఈ కేసులో ప్రధాన నిందితుడిగా ఉన్న మాజీ తెలంగాణ ఇంటెలిజెన్స్ చీఫ్‌ టీ. ప్రభాకర్ రావును ఇటీవల సిట్ విచారించిన సంగతి తెలిసిందే. మార్చి 2024 నుంచి ఇప్పటివరకు, తెలంగాణ స్పెషల్ ఇంటెలిజెన్స్ బ్యూరో (ఎస్‌ఐబీ)కు చెందిన సస్పెండ్ అయిన డీఎస్పీతో పాటు మరో ముగ్గురు పోలీసు అధికారులను హైదరాబాద్ పోలీసులు ఇప్పటికే అరెస్టు చేశారు. వీరు వివిధ ఎలక్ట్రానిక్ పరికరాల్లో ఉన్న ఇంటెలిజెన్స్ సమాచారాన్ని తొలగించడంతో పాటు అక్రమ ఫోన్ ట్యాపింగ్‌కు పాల్పడ్డారన్న ఆరోపణలు ఉన్నాయి. అనంతరం వారికి కోర్టు బెయిల్ మంజూరు చేసింది.

దర్యాప్తు అధికారులు వెల్లడించిన వివరాల ప్రకారం, ఈ నిందితులు ఎస్‌ఐబీ వనరులను రాజకీయ ప్రయోజనాల కోసం దుర్వినియోగం చేసిన కుట్రలో భాగమయ్యారని ఆరోపణలు ఉన్నాయి. వివిధ వర్గాలకు చెందిన పౌరులను అనధికారికంగా నిఘాలో పెట్టి, వారి ప్రొఫైళ్లను అక్రమంగా రూపొందించి, ఒక రాజకీయ పార్టీకి లబ్ధి చేకూర్చేలా ఆ సమాచారాన్ని ఉపయోగించారని పోలీసులు చెబుతున్నారు. ఈ ఫోన్ ట్యాపింగ్ వ్యవహారం రాష్ట్ర రాజకీయాల్లో తీవ్ర చర్చకు దారి తీస్తుండగా, సిట్ విచారణతో మరిన్ని కీలక అంశాలు వెలుగులోకి వచ్చే అవకాశముందని అధికారులు అంటున్నారు.