ఫిలిప్పీన్స్‌ను వణికించిన భారీ భూకంపం

ఫిలిప్పీన్స్‌లోని దక్షిణ ద్వీపమైన మిందానావో ప్రాంతాన్ని శుక్రవారం ఉదయం భారీ భూకంపం వణికించింది. నేషనల్ సెంటర్ ఫర్ సీస్మాలజీ ప్రకారం, ఈ శక్తివంతమైన భూకంపం రిక్టర్ స్కేలుపై 7.3 తీవ్రతతో నమోదైంది. దీని ఫలితంగా అధికారులు వెంటనే తీర ప్రాంతాలకు సునామీ హెచ్చరికలు జారీ చేసి, ప్రజలను సురక్షిత ప్రాంతాలకు తరలించాలని ఆదేశించారు. మనాయ్ పట్టణానికి తూర్పున సుమారు 62 కిలోమీటర్ల దూరంలో, 10 కిలోమీటర్ల లోతున భూకంప కేంద్రం ఉన్నట్లు ఫిలిప్పైన్ ఇన్‌స్టిట్యూట్ ఆఫ్ వోల్కనాలజీ అండ్ సీస్మాలజీ ప్రకటించింది.

ఫిలిప్పీన్స్ హెచ్చరిక

భూకంపం సంభవించినప్పుడు పసిఫిక్ తీరంలో దాదాపు ఒక మీటరు నుంచి మూడు మీటర్ల ఎత్తు వరకు అలలు ఎగసిపడే అవకాశం ఉందని ఫిలిప్పీన్స్ ప్రభుత్వం హెచ్చరించింది. మధ్య, దక్షిణ ఫిలిప్పీన్స్ తీర ప్రాంతాల ప్రజలు తక్షణమే ఎత్తైన ప్రదేశాలకు తరలివెళ్లాలని అధికారులు సూచించారు. హవాయిలోని పసిఫిక్ సునామీ హెచ్చరిక కేంద్రం, యూఎస్ సునామీ హెచ్చరికల కేంద్రం కూడా భూకంప కేంద్రానికి 300 కిలోమీటర్ల పరిధిలోని తీర ప్రాంతాలకు ప్రమాదకరమైన సునామీ అలలు తాకే ముప్పు ఉందని తెలిపాయి. పొరుగు దేశాలైన ఇండోనేషియా (ఉత్తర సులవేసి, పాపువా ప్రాంతాలు), పలౌ తీరాలలో కూడా సునామీ అలలు వచ్చే అవకాశం ఉందని హెచ్చరికలు జారీ అయ్యాయి.

భూ ప్రకంపనలు చాలా బలంగా ఉండడంతో ప్రజలు భయాందోళనలకు గురయ్యారు. దక్షిణ ఫిలిప్పీన్స్ ప్రావిన్స్ గవర్నర్ ఎడ్విన్ జుబాహిబ్ మాట్లాడుతూ, "కొన్ని భవనాలు దెబ్బతిన్నట్లు సమాచారం అందింది" అని తెలిపారు. భవనాలు కూలిపోతున్న దృశ్యాలు సోషల్ మీడియాలో వైరల్ అవుతున్నాయి. కాగా ఈ భూకంపం వల్ల ఇప్పటివరకు ఎలాంటి ప్రాణ, ఆస్తి నష్టం జరగలేదు. అయితే సహాయక చర్యలు మాత్రం కొనసాగుతున్నాయి.

రెండు వారాల్లో 2 భారీ భూకంపాలు

శుక్రవారం సంభవించిన 7.3 తీవ్రతతో కూడిన ఈ భూకంపం, కేవలం రెండు వారాల క్రితం దేశం ఉత్తర భాగంలో సంభవించిన 6.9 తీవ్రత గల భారీ భూకంపం తర్వాత రావడం ప్రజలను మరింత ఆందోళనకు గురిచేస్తోంది. గతంలో సంభవించిన 6.9 తీవ్రత గల భూకంపం సెబు ద్వీపంలోని బోగో నగరానికి సమీపంలో వచ్చి, చుట్టుపక్కల ప్రాంతాల్లో తీవ్ర విధ్వంసం సృష్టించింది. ఈ దుర్ఘటనలో 72 మంది వరకు ప్రాణాలు కోల్పోయారని, 200 మందికి పైగా గాయపడ్డారని ఐక్యరాజ్యసమితి రిలీఫ్ కోఆర్డినేషన్ ఆఫీస్ తెలిపింది. ఈ విపత్తు వల్ల 1,11,000 మందికి పైగా ప్రజలు ప్రభావితమయ్యారు.

భూకంపాలు ఎందుకు వస్తాయి?

భూమి లోపల ఉన్న టెక్టోనిక్ ప్లేట్ల కదలికల వల్ల భూకంపాలు వస్తాయి. ఈ ప్లేట్లు ఒకదానికొకటి ఢీకొన్నప్పుడు లేదా రాసుకున్నప్పుడు ఒత్తిడి పెరిగి హఠాత్తుగా శక్తి విడుదల అవుతుంది. ఈ శక్తి తరంగాల రూపంలో భూమి ఉపరితలంపై ప్రకంపనలు సృష్టించడాన్నే “భూకంపం” అంటారు.

అతిపెద్ద భూకంపాలు ఇవే!

ఇప్పటివరకు సంభవించిన అతిపెద్ద భూకంపం 1960 మే 22న చిలీలోని వాల్డివియాలో 9.5 తీవ్రత సంభవించిన భూకంపం. ఈ భూకంపం వల్ల భారీ సంఖ్యలో ప్రజలు మరణించారు, లక్షలాది మంది నిరాశ్రయులయ్యారు. 2004లో ఇండోనేషియాలోని సుమత్రా దీవుల్లో 9.1 తీవ్రతతో సంభవించిన భూకంపం వల్ల సుమారు 2,80,000 మందికి పైగా ప్రజలు మరణించారు. అలాగే హవాయి, జపాన్, ఫిలిప్పీన్స్ వంటి ఇతర దేశాలలో కూడా సునామీల వల్ల తీవ్ర ప్రాణ, ఆస్తి నష్టాలు జరిగాయి.

ఫిలిప్పీన్స్‌లో సంభవించిన పెద్ద భూకంపాలు: 1976లో 8.0 తీవ్రతతో సంభవించిన మిండనావో భూకంపం. ఈ భూకంపం వల్ల 5,000 మందికి పైగా ప్రజలు మరణించారు. 1990లో 7.8 తీవ్రతతో సంభవించిన లూజోన్ భూకంపం ధాటికి 1,600 మందికి పైగా ప్రజలు చనిపోయారు.