ఫిబ్రవరి 7న మలేషియాకు ప్రధాని మోడీ

భారత ప్రధాన మంత్రి నరేంద్ర మోడీ ఈ నెల 7, 8 తేదీల్లో మలేషియాలో అధికారికంగా పర్యటించనున్నారు. మలేషియా ప్రధాని దాటో సెరీ అన్వర్ ఇబ్రహీం ఆహ్వానం మేరకు ఆయన కౌలాలంపూర్‌ వెళ్లనున్నట్లు విదేశాంగ మంత్రిత్వ శాఖ వెల్లడించింది. ప్రధాని హోదాలో మోడీకి ఇది మూడో మలేషియా పర్యటన కాగా.. 2024 ఆగస్టులో ఇరు దేశాల సంబంధాలను ‘సమగ్ర వ్యూహాత్మక భాగస్వామ్యం’ స్థాయికి పెంచిన తర్వాత ఆయన అక్కడ పర్యటించడం ఇదే తొలిసారి.

ద్వైపాక్షిక చర్చలు.. సిఈఓల ఫోరం

రాజధాని కౌలాలంపూర్‌లో ప్రధాని మోడీ, అన్వర్ ఇబ్రహీంలు ద్వైపాక్షిక అంశాలపై సమగ్రంగా చర్చించనున్నారు. ఈ పర్యటనలో భాగంగానే 10వ 'భారత్-మలేషియా సిఈఓ ఫోరం' జరగనుంది. వాణిజ్యం, పెట్టుబడులు, రక్షణ, భద్రత, సముద్ర తీర రక్షణ వంటి కీలక అంశాలతో పాటు డిజిటల్ టెక్నాలజీ, ఇంధనం, ఆరోగ్యం, విద్యా రంగాల్లో పరస్పర సహకారంపై ఇరువురు నేతలు సమీక్షించనున్నారు. భారత్ అనుసరిస్తున్న 'యాక్ట్ ఈస్ట్' విధానంలో మలేషియా అత్యంత కీలకమైన భాగస్వామిగా ఉంది.

ప్రవాస భారతీయులతో భేటీ

మలేషియాలో నివసిస్తున్న సుమారు 29 లక్షల మంది భారతీయ మూలాలున్న వ్యక్తులతో ప్రధాని మోడీ ప్రత్యేకంగా భేటీ కానున్నారు. ప్రపంచంలోనే మూడో అతిపెద్ద భారతీయ ప్రవాస సమాజం ఇక్కడ ఉండటం విశేషం. చారిత్రక, సాంస్కృతిక సంబంధాలతో పెనవేసుకుపోయిన రెండు దేశాల బంధాన్ని ఈ పర్యటన మరింత దృఢపరుస్తుందని భారత విదేశాంగ శాఖ తన ప్రకటనలో పేర్కొంది.

భవిష్యత్తు ప్రయోజనాలే లక్ష్యంగా..

భారత్-మలేషియా మధ్య ఆర్థిక బంధాన్ని మరింత బలోపేతం చేయడమే ఈ పర్యటన ప్రధాన ఉద్దేశం. పర్యాటక రంగం, సాంస్కృతిక సంబంధాల పెంపుతో పాటు భవిష్యత్తులో రెండు దేశాలకు మేలు చేకూర్చే కొత్త మార్గాలను అన్వేషించేందుకు ఈ భేటీ ఒక గొప్ప అవకాశమని నిపుణులు భావిస్తున్నారు. ఈ పర్యటన ముగిశాక మరిన్ని కీలక ఒప్పందాలు వెలువడే అవకాశం ఉంది.