ఫిడే ప్రపంచకప్: క్వార్టర్ ఫైనల్స్లో పోరాడి ఓడిన అర్జున్ ఎరిగైసి
ఫిడే వరల్డ్ కప్లో భారత్కు నిరాశ ఎదురైంది. క్వార్టర్ ఫైనల్స్లో భారత గ్రాండ్మాస్టర్ అర్జున్ ఎరిగైసి, చైనాకు చెందిన వెయ్ యీ చేతిలో ఓడిపోవడంతో ఈ టోర్నమెంట్లో భారత్ ప్రయాణం ముగిసింది. బుధవారం జరిగిన ర్యాపిడ్ టైబ్రేక్ గేమ్లలో అర్జున్ 1.5-2.5 తేడాతో ఓటమి పాలయ్యాడు.
ప్రపంచ కప్లో టాప్-3 స్థానాలు పొందిన ఆటగాళ్లకు మాత్రమే ప్రతిష్టాత్మకమైన 'కాండిడేట్స్ టోర్నమెంట్'లో ఆడే అవకాశం లభిస్తుంది. ఈ టోర్నమెంట్లో గెలిచిన వారే ప్రస్తుత ప్రపంచ ఛాంపియన్ డి. గుకేశ్కు సవాల్ విసిరే అవకాశం పొందుతారు. అర్జున్ ఓటమితో ఈసారి ప్రపంచ కప్ ద్వారా ఏ భారతీయ ఆటగాడు కూడా ఆ కాండిడేట్స్ కోటాను దక్కించుకోలేకపోయాడు. అందువల్ల ఈ ఏడాది అంతా బాగా ఆడిన ఆర్. ప్రజ్ఞానంద మాత్రమే ప్రపంచ ర్యాంకింగ్స్ ద్వారా కాండిడేట్స్ టోర్నమెంట్లో భారత్ నుంచి ఏకైక ప్రతినిధిగా నిలిచే అవకాశం ఉంది.
టైబ్రేక్ గేమ్లలో ఏం జరిగింది?
సోమవారం, మంగళవారం జరిగిన ఇద్దరి క్లాసికల్ గేమ్స్ (సాధారణ గేమ్స్) డ్రా కావడంతో, విజేతను తేల్చడానికి బుధవారం ర్యాపిడ్ టైబ్రేక్లు (తక్కువ సమయం ఉండే గేమ్స్) ఆడించారు.
మొదటి ర్యాపిడ్ గేమ్లో అర్జున్కు పరిస్థితులు ప్రతికూలంగా మారాయి. అతడు ఒక రూక్ను కోల్పోయి ఓడిపోయే స్థితిలో ఉన్నాడు. కానీ గొప్పగా పోరాడి, చివరికి చైనా ఆటగాడు చేసిన తప్పిదం వల్ల ఆ గేమ్ను డ్రా చేసుకోగలిగాడు. అయితే రెండో ర్యాపిడ్ గేమ్లో మాత్రం అర్జున్కు అదృష్టం కలిసి రాలేదు. వెయ్ యీ వ్యూహాత్మకంగా ఆడి, తన పావులను బలమైన స్థానాల్లో ఉంచాడు. ముఖ్యంగా తన బిషప్ను ఆరో ర్యాంక్లో ఉంచి అర్జున్కు సమస్యలు సృష్టించాడు. చివరకు 79 ఎత్తుల తర్వాత అర్జున్ చెక్మేట్ అయి ఓడిపోయాడు.
అర్జున్కు వరుస నిరాశ
అర్జున్ ఎరిగైసి క్వార్టర్ ఫైనల్స్లోనే నిష్క్రమించడం వరుసగా ఇది రెండోసారి. 2023 ఎడిషన్లో కూడా అర్జున్ సహచర ఆటగాడు ప్రజ్ఞానంద చేతిలో క్వార్టర్స్లోనే ఓడిపోయాడు.గతంలో 2024 కాండిడేట్స్ టోర్నమెంట్కు అర్హత సాధించే విషయంలో కూడా అర్జున్ చివరి అడుగులో విఫలమై నిరాశ పడ్డాడు. ఆ స్థానాన్ని గెలుచుకున్న గుకేశ్ తర్వాత కాండిడేట్స్ గెలిచి, ప్రపంచ ఛాంపియన్గా అవతరించిన సంగతి తెలిసిందే.
ఫిడే వరల్డ్ కప్లో భాగంగా బుధవారం జరిగిన మరికొన్ని గేమ్ ల విషయానికి వస్తే, ఆండ్రీ ఎసిపెంకో (రష్యా) అమెరికాకు చెందిన సామ్ షాంక్లాండ్ను 4-2 తేడాతో ఓడించి సెమీ-ఫైనల్స్కు చేరుకున్నాడు. జవోఖీర్ సిండారోవ్ (ఉజ్బెకిస్తాన్) కూడా విజయం సాధించి సెమీస్లోకి ప్రవేశించాడు. సెమీ ఫైనల్స్లో ఈసిపెంకో వర్సెస్ వెయ్ యీ, యాకుబ్బోయేవ్ వర్సెస్ సిండారోవ్ తలపడతారు.
ఈసారి భారత్ చరిత్రలోనే అత్యధికంగా 24 మంది ఆటగాళ్లతో (గుకేశ్, ప్రజ్ఞానంద వంటి ప్రముఖులు సహా) టోర్నమెంట్ ప్రారంభించింది. కానీ క్వార్టర్ ఫైనల్స్ వరకు చేరిన ఏకైక ఆటగాడు అర్జున్ ఎరిగైసే.