ఫార్మా హబ్గా కర్నూలు
ఆంధ్రప్రదేశ్ను ఫార్మా తయారీ రంగంలో అగ్రగామిగా నిలిపే దిశగా ప్రభుత్వం వేగంగా అడుగులు వేస్తోంది. కర్నూలు జిల్లాలోని ఓర్వకల్ ప్రాంతం అతి తక్కువ సమయంలోనే రాష్ట్రంలో నూతన ఫార్మాస్యూటికల్స్ కేంద్రంగా ఆవిర్భవిస్తోందని రాష్ట్ర ప్రభుత్వం సోమవారం ప్రకటించింది. హైదరాబాద్కు చెందిన రెండు ప్రముఖ కంపెనీలు – విరుపాక్ష ఆర్గానిక్స్ లిమిటెడ్ మరియు సిగాచి ఇండస్ట్రీస్ లిమిటెడ్ – ఒర్వకల్లో తమ కార్యకలాపాలను విస్తరించేందుకు సిద్ధం కావడమే దీనికి ప్రధాన కారణమని పేర్కొంది.
100 ఎకరాల్లో విరుపాక్ష భారీ యూనిట్
ఆంధ్రప్రదేశ్ ఫార్మాస్యూటికల్ తయారీకి ప్రాధాన్యత కలిగిన గమ్యస్థానంగా తన స్థానాన్ని వేగంగా బలోపేతం చేసుకుంటోంది, అని ప్రభుత్వం అధికారిక పత్రికా ప్రకటనలో తెలిపింది. ఈ విస్తరణలో భాగంగా విరుపాక్ష ఆర్గానిక్స్ లిమిటెడ్కు ఓర్వకల్ నోడ్ పరిధిలోని ఐపీ గుట్టపాడు క్లస్టర్ లో 100 ఎకరాలకు పైగా భూమి కేటాయింపునకు ఆమోదం లభించింది.
ఈ సంస్థ ఇక్కడ యాక్టివ్ ఫార్మాస్యూటికల్ ఇంగ్రిడియంట్స్ (APIs) ఆర్గానిక్ కెమికల్స్ తయారీ యూనిట్ను స్థాపించనుంది. ఈ ప్రాజెక్టు కోసం విరుపాక్ష ఆర్గానిక్స్ రూ. 1,225 కోట్లు పెట్టుబడి పెట్టనుంది. ఈ భారీ పెట్టుబడి ద్వారా సుమారు 1,500 మందికి ప్రత్యక్షంగా ఉపాధి లభించనుంది అని ప్రభుత్వం తన ప్రకటనలో వెల్లడించింది. అంతేకాక లాజిస్టిక్స్, యుటిలిటీస్, అనుబంధ సేవల రంగాలలో పరోక్ష ఉపాధి అవకాశాలు కూడా గణనీయంగా ఏర్పడతాయని ప్రభుత్వం వివరించింది.
సిగాచి కీలక పాత్ర
అదేవిధంగా సిగాచి ఇండస్ట్రీస్ లిమిటెడ్ ఓర్వకల్లో తమ కార్యకలాపాలను విస్తరించనుంది. ఈ సంస్థ ప్రధానంగా మైక్రోక్రిస్టలైన్ సెల్యులోస్ (ఎంసీసీ) వంటి ఔషధ ఎక్సిపియంట్స్ను తయారుచేస్తుంది. ఈ కీలక పదార్థాలు ఫార్మాస్యూటికల్స్తో పాటు, ఆహార, న్యూట్రాస్యూటికల్స్ రంగాలకు కూడా ఉపయోగపడతాయి. సిగాచి ప్రవేశంతో ఫార్మా రంగం యొక్క సరఫరా వ్యవస్థ మరింత బలోపేతం కానుంది.
ఈ రెండు కంపెనీల విస్తరణ ప్రణాళికలు ఇటీవల విశాఖపట్నంలో జరిగిన ప్రతిష్ఠాత్మక సీఐఐ భాగస్వామ్య సమ్మిట్ లో ఒప్పందాలు కుదుర్చుకోవడం ద్వారా అధికారికంగా ఖరారయ్యాయి
తాజా పెట్టుబడులతో ఒర్వకల్ కేవలం ఒక పారిశ్రామిక నోడ్గా కాకుండా, రాబోయే 5–10 సంవత్సరాల్లో దక్షిణ భారతదేశ ఫార్మా మ్యాప్లో ప్రధాన హబ్గా ఎదుగుతుందని పరిశ్రమలు అంచనా వేస్తున్నాయి