ఫెన్సింగ్తో భారత్కు కీర్తి - ఇటీవల ఈ క్రీడకు ప్రాచుర్యం పెరిగింది
యువత ఫెన్సింగ్లో రాణించి దేశానికి కీర్తి ప్రతిష్టలు తెస్తారని ఉత్తరాఖండ్ ముఖ్యమంత్రి పుష్కర్ సింగ్ ధామి పేర్కొన్నారు. హల్ద్వానీలోని ఇందిరా గాంధీ అంతర్జాతీయ క్రీడా స్టేడియంలో గల మనస్కంద్ హాల్లో 'ఏషియన్ కేడెట్ కప్ ఇండియా - 2025'ని ప్రారంభించారు. ఫెన్సింగ్ అసోసియేషన్ ఆఫ్ ఇండియా నిర్వహించిన ఈ కార్యక్రమంలో పుష్కర్ సింగ్ ధామి పాల్గొని ప్రసంగించారు.
"ఇతర క్రీడలతో పోలిస్తే ఫెన్సింగ్కు అంత ప్రోత్సాహం లభించలేదు, కానీ ఇటీవలి కాలంలో దీని ప్రాచుర్యం వేగంగా పెరిగింది. యువతలో ఫెన్సింగ్ పట్ల ఆసక్తి పెరిగింది. నేడు మన యువత జాతీయ స్థాయిలో మాత్రమే కాకుండా అంతర్జాతీయ వేదికలపైనా దేశానికి కీర్తి తెస్తున్నారు. షూటింగ్, ఆర్చరీ, జావెలిన్ త్రో వంటి క్రీడలలో ప్రపంచవ్యాప్తంగా భారత పతాకం ఎగురుతున్నట్లే, భవిష్యత్తులో మన యువత ఫెన్సింగ్లో కూడా రాణించి మన దేశానికి కీర్తి తెస్తారని నేను నమ్ముతున్నాను. వారు ఒక కొత్త రికార్డును నెలకొల్పుతారు" అని అన్నారు. క్రీడాకారులందరికీ శుభాకాంక్షలు తెలియజేస్తూ, క్రమశిక్షణ, కఠోర శ్రమ, సానుకూల దృక్పథంతో ఆటగాళ్లు క్రీడలలో కొత్త శిఖరాలను చేరుకోవడమే కాకుండా సమాజానికి ఒక ఆదర్శంగా నిలుస్తారని ముఖ్యమంత్రి అన్నారు.
ఉత్తరాఖండ్ను ఉత్తమంగా తీర్చి దిద్దుతాం ప్రతి రంగంలోనూ ఉత్తరాఖండ్ను ఉత్తమ రాష్ట్రంగా తీర్చిదిద్దాలనే ప్రభుత్వ నిబద్ధతకు వారి సహకారం తోడ్పడుతుందని ఆయన చెప్పారు. క్రీడలను ప్రోత్సహించడానికి రాష్ట్ర ప్రభుత్వం నిరంతరం కృషి చేస్తుందని హామీ ఇచ్చారు. అలాగే, మొక్కలు నాటడం, నీటి సంరక్షణ, పరిశుభ్రత వంటి కార్యక్రమాలలో పాల్గొని పర్యావరణ పరిరక్షణకు కృషి చేయాలని, సమాజంలో దీనిపై అవగాహన కల్పించాలని ఆటగాళ్లను కోరారు. యువత మాదక ద్రవ్యాల బారిన పడకుండా ఉండాలని ఆయన కోరారు. ఒక ఫిట్గా ఉన్న వ్యక్తి మాదకద్రవ్య రహిత జీవితం గురించి చెప్పినప్పుడు ఆ సందేశం ప్రతి యువకుడికి చేరుతుందని, అది వారిలో స్ఫూర్తిని నింపుతుందని ఆయన అన్నారు.
యువతను ప్రోత్సహిస్తున్నాం రాష్ట్రంలో యువతను ప్రోత్సహిస్తున్నామని ముఖ్యమంత్రి పేర్కొన్నారు. వారి ప్రతిభను వెలికితీసేందుకు ముఖ్యమంత్రి క్రీడా అభివృద్ధి నిధి, ముఖ్యమంత్రి ఆటగాళ్ల ప్రోత్సాహక పథకం, ముఖ్యమంత్రి వర్ధమాన క్రీడాకారుల పథకం, క్రీడా కిట్ పథకం వంటివి అమలు చేస్తున్నామని ముఖ్యమంత్రి ధామి వెల్లడించారు. ఉత్తరాఖండ్ ఖేల్ రత్న, హిమాలయ ఖేల్ రత్న వంటి ప్రతిష్ఠాత్మక అవార్డులు అందజేసి క్రీడాకారులను ప్రోత్సహిస్తున్నామన్నారు. ప్రభుత్వ సర్వీసులలో 4 శాతం క్రీడా కోటా ఇవ్వడం ద్వారా క్రీడాకారులకు గుర్తింపు ఇస్తున్నామన్నారు. జాతీయ క్రీడా దినోత్సవం సందర్భంగా, అత్యుత్తమ క్రీడాకారులకు ఒక్కొక్కరికి ₹50 లక్షలు కూడా బహుమతిగా అందజేస్తున్నట్టు తెలిపారు. మొత్తం క్రీడాభివృద్ధిని ప్రోత్సహించడానికి కొత్త క్రీడా విధానాన్ని అమలు చేస్తున్నామన్నారు. దాని ప్రకారం జాతీయ, అంతర్జాతీయ స్థాయిలో పతకాలు సాధించిన వారికి "అవుట్-ఆఫ్-టర్న్" పద్ధతి ద్వారా ప్రభుత్వ ఉద్యోగాలు కల్పిస్తున్నారని ఆయన తెలిపారు.
క్రీడాభివృద్ధికి మౌలిక వసతులు రాష్ట్రంలో క్రీడాభివృద్ధి కోసం అనేక మౌలిక వసతులు కల్పిస్తున్నట్టు ముఖ్యమంత్రి వివరించారు. పంత్నగర్ విమానాశ్రయం విస్తరణ పనులు జరుగుతున్నాయని, సందర్శకులు, పర్యాటకులు, క్రీడాకారుల కోసం కొత్త రైళ్ల ప్రవేశపెట్టడం కోసం కేంద్ర రైల్వే మంత్రితో చర్చలు జరుపుతున్నామన్నారు. హల్ద్వానీలో ఉత్తరాఖండ్ మొట్టమొదటి క్రీడా విశ్వవిద్యాలయం, మహిళా క్రీడా కళాశాలను స్థాపించడానికి ప్రభుత్వం కట్టుబడి ఉందని పునరుద్ఘాటించారు. ఇది క్రీడా విద్యలో రాష్ట్రానికి ఒక ప్రత్యేక గుర్తింపును తీసుకొస్తుందన్నారు. క్రీడా కార్యకలాపాలు పెరగడం వల్ల స్థానిక వ్యాపారాలు, పర్యాటకరంగం కూడా అభివృద్ధి చెందుతుందన్నారు.
అథ్లెట్ల విజయాలపై ప్రశంసలు ఉత్తరాఖండ్ అథ్లెట్ల విజయాలను ప్రశంసించారు. జాతీయ క్రీడలలో వారు 103 పతకాలను గెలుచుకుని, తొలిసారిగా 7వ ర్యాంకును సాధించారని ముఖ్యమంత్రి గుర్తు చేసుకున్నారు. ‘ప్రపంచ స్థాయి క్రీడా మౌలిక సదుపాయాల కోసం రాష్ట్రం ₹517 కోట్లు పెట్టుబడి పెట్టింది. ఇది జాతీయ క్రీడా కార్యక్రమాలకు మాత్రమే కాకుండా అంతర్జాతీయ క్రీడా ఈవెంట్లకు కూడా ఉత్తరాఖండ్ను ఒక ప్రముఖ వేదికగా మార్చింది. దీనికి ఏషియన్ కేడెట్ కప్ ఒక చక్కని ఉదాహరణ. రాష్ట్రంలోని ఎనిమిది ప్రధాన నగరాలలో 23 క్రీడా అకాడమీలను ఏర్పాటు చేయాలనే క్రీడా వారసత్వ ప్రణాళికను ప్రవేశపెడుతున్నాం’ అని ముఖ్యమంత్రి వెల్లడించారు.
కేంద్రసహకారంతో ముందుకు సాగుతున్నాం కేంద్ర ప్రభుత్వం తీసుకొచ్చిన ఖేలో ఇండియా, ఫిట్ ఇండియా వంటి కార్యక్రమాలు రాష్ట్ర క్రీడాభివృద్ధికి ఎంతో తోడ్పడ్డాయని తెలిపారు. భారతదేశ క్రీడా ఉనికిని ప్రపంచ స్థాయిలో పెంచాయన్నారు. ఫెన్సింగ్ క్రీడ ఇతర క్రీడల కంటే చాలా ఆలస్యంగా భారతదేశంలో గుర్తింపు పొందిందన్నారు. మొదట్లో దీనికి మద్దతు లభించలేదని, కానీ ఇటీవలి సంవత్సరాలలో దీని ప్రాచుర్యం వేగంగా పెరిగిందన్నారు.
అర్జున అవార్డు గ్రహీత భవానీ దేవి కామన్వెల్త్, ఆసియా క్రీడలలో సాధించిన విజయాలు ఫెన్సింగ్ను కొనసాగించడానికి యువతకు స్ఫూర్తినిచ్చాయని సీఎం పేర్కొన్నారు. ఇప్పుడు ఆటగాళ్లు జాతీయ, అంతర్జాతీయ స్థాయిలో రాణిస్తున్నారన్నారు. షూటింగ్, ఆర్చరీ, జావెలిన్ త్రోలో భారతదేశం ప్రపంచవ్యాప్తంగా తన ముద్ర వేసినట్లే, ఫెన్సింగ్ కూడా త్వరలో అలాంటి కీర్తిని తెస్తుందని ఆయన విశ్వాసం వ్యక్తం చేశారు. ఫెన్సింగ్ మూలాలు ప్రాచీన భారతదేశంలో ఉన్నాయని చెప్పారు. అక్కడ యుద్ధ కళలను వేదాలతో పాటు విద్యలో ఒక అంతర్భాగంగా భావించేవారని అభిప్రాయపడ్డారు. యువతకు కత్తిసాము, విలువిద్య, పోరాట నైపుణ్యాలలో శిక్షణ ఇచ్చేవారని చెప్పుకొచ్చారు. భారతదేశంలో తొలి అంతర్జాతీయ ఫెన్సింగ్ పోటీకి ఉత్తరాఖండ్ను ఎంపిక చేయడం గర్వంగా ఉందన్నారు.
ముఖ్యమంత్రికి ఘన స్వాగతం అంతకుముందు, ముఖ్యమంత్రికి ఫెన్సింగ్ అసోసియేషన్ ఆఫ్ ఇండియా సెక్రటరీ జనరల్ రాజీవ్ మెహతా ఘన స్వాగతం పలికారు. ఈ కార్యక్రమం గురించి వివరాలను ఆయన పంచుకున్నారు. ఆసియన్ ఫెన్సింగ్ కాన్ఫెడరేషన్ ఆధ్వర్యంలో జరుగుతున్న ఐదు రోజుల ఈ పోటీ సెప్టెంబర్ 23 వరకు కొనసాగుతుందని తెలిపారు. బాలురు, బాలికల విభాగాలలో భారతదేశం నుండి 150 మందితో సహా 250 మందికి పైగా అథ్లెట్లు పాల్గొంటున్నట్టు వెల్లడించారు. ఈ పోటీలో తజికిస్తాన్, సిరియా, మలేషియా, శ్రీలంక, థాయ్లాండ్, ఇండోనేషియా వంటి దేశాల నుండి కూడా ఆటగాళ్లు పోటీ పడుతున్నారు.