ప్రారంభమైన జీహెచ్ఎంసీ మెగా శానిటేషన్ డ్రైవ్
హైదరాబాద్ నగరాన్ని మరింత శుభ్రంగా, ఆరోగ్యకరంగా తీర్చిదిద్దే దిశగా గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ) కీలక అడుగు వేసింది. ఇటీవల జరిగిన వార్డు పునర్విభజన (డెలిమిటేషన్) అనంతరం నగరవ్యాప్తంగా పరిశుభ్రతను బలోపేతం చేయాలనే లక్ష్యంతో జీహెచ్ఎంసీ ప్రత్యేక మెగా శానిటేషన్ డ్రైవ్ను విజయవంతంగా ప్రారంభించింది.
ఈ ప్రత్యేక డ్రైవ్ నగరంలోని మొత్తం 300 వార్డులను కవర్ చేస్తూ విస్తృత స్థాయిలో అమలు చేయబడుతోంది.ఈ భారీ స్థాయి పరిశుభ్రత కార్యక్రమం ప్రధానంగా సంవత్సరాలుగా పేరుకుపోయిన లెగసీ చెత్త తొలగింపు, చెత్త పేరుకుపోయే సున్నిత ప్రాంతాల నిర్మూలన, పారిశుధ్య లోపాల నివారణ, నగర పరిశుభ్రత ప్రమాణాల మెరుగుదల లక్ష్యంగా కొనసాగుతోంది. ఫీల్డ్ స్థాయిలో స్పష్టమైన, కొలిచే విధమైన ఫలితాలు సాధించాలనే ఉద్దేశంతో అధికారులకు ఆదేశాలు జారీ చేశారు.
ఈ ప్రత్యేక శానిటేషన్ డ్రైవ్ను జీహెచ్ఎంసీ జోనల్ కమిషనర్లు, డిప్యూటీ కమిషనర్లు నేరుగా పర్యవేక్షిస్తున్నారు. తమ పరిధిలోని ప్రాంతాల్లో వారు ప్రత్యక్షంగా పర్యటనలు నిర్వహిస్తూ పనులు సకాలంలో జరుగుతున్నాయా లేదా అనే విషయాన్ని పరిశీలిస్తున్నారు. ప్రతి వార్డులో 100 శాతం కవరేజ్ ఉండేలా చర్యలు తీసుకుంటూ, శాఖల మధ్య సమన్వయం, అవసరమైన మానవ వనరులు, యంత్రాంగాన్ని సమర్థంగా వినియోగించడంపై ప్రత్యేక దృష్టి పెట్టారు. జీహెచ్ఎంసీ కమిషనర్ ఆర్.వి. కర్ణన్ మార్గదర్శకత్వంలో ఈ కార్యక్రమం అమలవుతోంది. కాగితాలపైనే కాకుండా ప్రజలకు ప్రత్యక్షంగా కనిపించే విధంగా మార్పులు రావాలన్నదే కమిషనర్ ఆదేశంగా అధికారులు చెబుతున్నారు. నగర పరిశుభ్రతలో గుణాత్మక మార్పు తీసుకురావడమే ఈ డ్రైవ్ ప్రధాన ఉద్దేశం.
ఈ ప్రత్యేక శానిటేషన్ డ్రైవ్లో భాగంగా పలు కీలక పనులు చేపట్టారు. నగరవ్యాప్తంగా లెగసీ చెత్త తొలగింపు, చెత్త సున్నిత ప్రాంతాల శుభ్రత, ప్రధాన రహదారులు, అంతర్గత రోడ్లు, ఫుట్పాత్లు శుభ్రం చేయడం, పార్కులు, సరస్సులు, నాలాల శుభ్రత పనులు నిర్వహిస్తున్నారు. అదేవిధంగా నిర్మాణ, కూల్చివేత వ్యర్థాలను తొలగించి నగర సౌందర్యాన్ని మెరుగుపరుస్తున్నారు. ప్రజా ప్రదేశాల చుట్టూ పరిశుభ్రతతో పాటు అందాన్ని పెంచేలా చర్యలు చేపడుతున్నారు. అంతేకాకుండా ఈ కార్యక్రమంలో పౌరుల భాగస్వామ్యానికి కూడా పెద్దపీట వేస్తున్నారు. పరిశుభ్రతపై ప్రజల్లో అవగాహన పెంపొందించి, దీర్ఘకాలిక ప్రవర్తనా మార్పు తీసుకురావాలనే లక్ష్యంతో ప్రచార కార్యక్రమాలు నిర్వహిస్తున్నారు.
ఈ సుదీర్ఘమైన ఫీల్డ్ స్థాయి శానిటేషన్ డ్రైవ్ ద్వారా హైదరాబాద్ నగర పరిశుభ్రతలో మార్పు తీసుకురావడంతో పాటు, స్వచ్ఛమైన, నివసించడానికి అనుకూలమైన, స్థిరమైన నగరంగా హైదరాబాద్ను తీర్చిదిద్దాలని జీహెచ్ఎంసీ లక్ష్యంగా పెట్టుకుంది.