ప్రారంభమైన కొత్త పాలన : హైదరాబాద్లో ఇక మూడు మున్సిపల్ కార్పొరేషన్లు
తెలంగాణ ప్రభుత్వం హైదరాబాద్ మహా నగరాభివృద్ధి పరిపాలనా సౌలభ్యం కోసం చారిత్రాత్మక నిర్ణయం తీసుకుంది. గ్రేటర్ హైదరాబాద్ మున్సిపల్ కార్పొరేషన్ని మూడు స్వతంత్ర మున్సిపల్ కార్పొరేషన్లుగా విభజిస్తూ ప్రభుత్వం బుధవారం అధికారిక ఉత్తర్వులు జారీ చేసింది. దీని ప్రకారం, ప్రస్తుతం ఉన్న జీహెచ్ఎంసీతో పాటు కొత్తగా సైబరాబాద్ మున్సిపల్ కార్పొరేషన్, మల్కాజిగిరి మున్సిపల్ కార్పొరేషన్లు ఉనికిలోకి వచ్చాయి. పెరిగిపోతున్న జనాభా అవసరాలకు అనుగుణంగా వికేంద్రీకృత పట్టణ పాలనను బలోపేతం చేయడమే ఈ మార్పు ప్రధాన ఉద్దేశమని ప్రభుత్వం పేర్కొంది.
జయేష్ రంజన్ బాధ్యతల స్వీకరణ
ఈ మూడు మున్సిపల్ కార్పొరేషన్లకు స్పెషల్ ఆఫీసర్గా ప్రభుత్వ ప్రత్యేక ప్రధాన కార్యదర్శి జయేష్ రంజన్ (ఐఏఎస్)నియమితులయ్యారు. బుధవారం ఉదయం ఆయన అధికారికంగా బాధ్యతలు స్వీకరించారు. ఎన్నికైన పాలకవర్గాలు లేని ప్రస్తుత తరుణంలో, ఈ మూడు సంస్థల పరిపాలనను ఆయన పర్యవేక్షించనున్నారు. ఐటీ, పరిశ్రమలు పట్టణాభివృద్ధి శాఖల్లో అపార అనుభవం ఉన్న జయేష్ రంజన్ నియామకం, నగరాన్ని అంతర్జాతీయ ప్రమాణాలతో తీర్చిదిద్దడానికి దోహదపడుతుందని నిపుణులు భావిస్తున్నారు.
కొత్త కార్పొరేషన్ల పరిధి, విభజన
నగరాన్ని భౌగోళికంగా, పరిపాలనా పరంగా శాస్త్రీయంగా విభజించారు.
జీహెచ్ఎంసీ
పాత నగరం, మధ్య హైదరాబాద్ ప్రాంతాలను కలుపుతూ 6 జోన్లు (ఖైరతాబాద్, సికింద్రాబాద్, చార్మినార్, గోల్కొండ, శంషాబాద్, రాజేంద్రనగర్), 30 సర్కిళ్లు 150 వార్డులతో కొనసాగుతుంది.
సైబరాబాద్ కార్పొరేషన్
వెస్ట్ జోన్ ఐటీ కారిడార్ను కేంద్రీకృతం చేస్తూ శేరిలింగంపల్లి, కూకట్పల్లి, కుత్బుల్లాపూర్ జోన్లతో (16 సర్కిళ్లు, 76 వార్డులు) ఏర్పాటైంది.
మల్కాజిగిరి కార్పొరేషన్:
తూర్పు, ఉత్తర హైదరాబాద్లోని మల్కాజిగిరి, ఉప్పల్, ఎల్బీ నగర్ జోన్లతో (14 సర్కిళ్లు, 74 వార్డులు) రూపుదిద్దుకుంది.
కమిషనర్ల నియామకం - కార్యాలయాల ఏర్పాటు
విభజన అనంతరం ముగ్గురు ఐఏఎస్ అధికారులను కమిషనర్లుగా ప్రభుత్వం నియమించింది. జీహెచ్ఎంసీ కమిషనర్గా ఆర్.వి. కర్ణన్ కొనసాగుతుండగా, సైబరాబాద్ కమిషనర్గా జి. శ్రీజన, మల్కాజిగిరి కమిషనర్గా వినయ్ కృష్ణారెడ్డి బాధ్యతలు చేపట్టారు. జీహెచ్ఎంసీ కార్యాలయం ట్యాంక్ బండ్ వద్దే కొనసాగుతుండగా, సైబరాబాద్ కార్యాలయం మాదాపూర్లోని నాక్ భవనం నుండి, మల్కాజిగిరి కార్యాలయం తార్నాకలోని హెచ్ఎండీఏ భవనం నుండి తాత్కాలికంగా పనిచేయనున్నాయి.
పాలనా సౌలభ్యం - పౌర సేవలు
గత ఏడాది 27 శివారు మున్సిపాలిటీలను జీహెచ్ఎంసీలో విలీనం చేయడంతో నగరం విస్తీర్ణం 650 చదరపు కిలోమీటర్ల నుండి 2,053 చదరపు కిలోమీటర్లకు పెరిగింది. ఇంత పెద్ద ప్రాంతాన్ని ఒకే సంస్థ కింద నిర్వహించడం కష్టతరంగా మారడంతో ఈ 'ట్రిఫర్కేషన్' నిర్ణయం తీసుకున్నారు. దీనివల్ల పారిశుధ్యం, రోడ్ల నిర్వహణ, నీటి సరఫరా అనుమతుల ప్రక్రియ వంటి పౌర సేవలు వేగవంతంగా అందుతాయని, వార్డు స్థాయిలో జవాబుదారీతనం పెరుగుతుందని ప్రభుత్వం ఆశిస్తోంది.
రాజకీయ, భవిష్యత్తు పరిణామాలు
ప్రస్తుత జీహెచ్ఎంసీ పాలకవర్గం గడువు ముగియడంతో, ఈ విభజన ప్రక్రియ అత్యంత కీలకంగా మారింది. రాబోయే ఏప్రిల్ లేదా మే నెలల్లో ఈ మూడు కార్పొరేషన్లకు విడివిడిగా ఎన్నికలు నిర్వహించే అవకాశం ఉంది. కొత్తగా ఏర్పడిన కార్పొరేషన్ల వల్ల స్థానిక రాజకీయ సమీకరణలు మారడమే కాకుండా, నిధుల కేటాయింపు, మౌలిక సదుపాయాల కల్పనలో ఆయా ప్రాంతాలకు ప్రత్యేక ప్రాధాన్యత లభించనుంది. మొత్తానికి ఈ పునర్వ్యవస్థీకరణ హైదరాబాద్ను 'మెగా సిటీ'గా మార్చే దిశగా వేసిన కీలక అడుగు.