ప్రపంచ భద్రతకు వ్యూహాత్మక స్థిరత్వం అత్యవసరం: భారత్

ప్రస్తుతం ప్రపంచవ్యాప్తంగా దేశాల మధ్య పెరుగుతున్న ఉద్రిక్తతలు, ఆయుధాలను తగ్గించుకునే ఒప్పందాలు విఫలం కావడం వల్ల యుద్ధ భయం పెరుగుతోంది. ఈ క్లిష్ట పరిస్థితుల్లో దేశాల మధ్య 'వ్యూహాత్మక స్థిరత్వం' (అంటే అనవసరమైన ఆయుధ పోటీ లేకుండా ప్రశాంతమైన వాతావరణాన్ని) కాపాడటం చాలా ముఖ్యమని భారత్ స్పష్టం చేసింది. జెనీవాలో జరుగుతున్న 'నిరాయుధీకరణ సదస్సు'లో విదేశాంగ కార్యదర్శి విక్రమ్‌ మిస్రీ మాట్లాడుతూ, ప్రపంచ దేశాలన్నీ ఆయుధాల తయారీలో పోటీ పడటం ఆపి, శాంతియుతంగా ఉండాల్సిన బాధ్యత అందరిపై ఉందని గుర్తు చేశారు.

ఆయుధ నియంత్రణ ఒప్పందాల వైఫల్యం

ప్రస్తుత అంతర్జాతీయ భద్రతా పరిస్థితులు అత్యంత అనిశ్చితంగా ఉన్నాయని విక్రమ్‌ మిస్రీ ఆందోళన వ్యక్తం చేశారు. ముఖ్యంగా 'న్యూ స్టార్ట్' ఒప్పందం గడువు ముగియడం ప్రపంచ ఆయుధ నియంత్రణ ప్రయత్నాలకు పెద్ద ఎదురుదెబ్బ అని ఆయన పేర్కొన్నారు. పెరిగిన సైనిక వ్యయం, వేగంగా వస్తున్న సాంకేతిక మార్పులు అస్థిరతను పెంచుతున్నాయని, ఇలాంటి తరుణంలో దేశాలన్నీ సంయమనం పాటించాల్సిన అవసరం ఉందని ఆయన గుర్తు చేశారు.

నిరాయుధీకరణ విధానాలకే మద్దతు:

భారత్

అణు ఆయుధాలు కలిగిన బాధ్యతాయుతమైన దేశంగా, భారత్ తన అణు విధానానికి కట్టుబడి ఉంటుందని విదేశాంగ కార్యదర్శి విక్రమ్‌ మిస్రీ స్పష్టం చేశారు. తమ రక్షణ కోసం అవసరమైన మేరకు మాత్రమే అణు శక్తిని కలిగి ఉంటామని, అణు ఆయుధాలు లేని దేశాలపై ఎట్టి పరిస్థితుల్లోనూ వీటిని ప్రయోగించమని ఆయన పునరుద్ఘాటించారు. ముఖ్యంగా తాము ముందుగా ఎవరిపైనా అణు దాడి చేయబోమని భారత్ తీసుకున్న నిర్ణయాన్ని గుర్తు చేస్తూ, ప్రపంచ దేశాలన్నీ అంగీకరించే విధంగా పారదర్శకమైన నిరాయుధీకరణ విధానాలకే తమ మద్దతు ఉంటుందని ఆయన స్పష్టం చేశారు.

యుద్ధతంత్రంలో ఏఐ: మానవ నియంత్రణే కీలకం

సైనిక రంగంలో కృత్రిమ మేధ వినియోగంపై వస్తున్న విమర్శలు, సవాళ్లపై భారత్ తన వైఖరిని కుండబద్దలు కొట్టింది. ఏఐ వినియోగంలో మానవ తీర్పు, పర్యవేక్షణ అత్యంత కీలకమని మిస్రీ తేల్చిచెప్పారు. అంతర్జాతీయ మానవతా చట్టాలకు లోబడి, విశ్వసనీయత, భద్రత, పారదర్శకతతో కూడిన దేశీయ ఏఐ ఫ్రేమ్‌వర్క్‌ను భారత్ రూపొందించిందని ఆయన వెల్లడించారు. ముఖ్యంగా అణు ఆయుధాల విషయంలో నిర్ణయాధికారం పూర్తిగా మానవ నియంత్రణలోనే ఉంటుందని ఆయన భరోసా ఇచ్చారు. ఇటీవలే ఢిల్లీలో జరిగిన 'ఇండియా-ఏఐ ఇంపాక్ట్ సమ్మిట్-2026' ద్వారా గ్లోబల్ సౌత్ దేశాలకు ఏఐని అందుబాటులోకి తెచ్చేందుకు భారత్ చేస్తున్న కృషిని ఆయన గుర్తు చేశారు.

అంతరిక్షం.. సహకారానికి వేదిక కావాలి

అంతరిక్షాన్ని యుద్ధ క్షేత్రంగా మార్చకూడదని భారత్ బలంగా విశ్వసిస్తోందని విదేశాంగ కార్యదర్శి స్పష్టం చేశారు. అంతరిక్షంలో ఆయుధ పోటీని నిరోధించేలా చట్టబద్ధమైన ఒప్పందాలను రూపొందించాలని ఆయన డిమాండ్ చేశారు. ఇదే క్రమంలో గతేడాది డిసెంబర్‌లో జరిగిన జీవ ఆయుధాల నిషేధ ఒప్పందం స్వర్ణోత్సవ సదస్సును, ఐక్యరాజ్యసమితితో కలిసి చేపట్టిన సామర్థ్య నిర్మాణ కార్యక్రమాలను ఆయన ప్రస్తావించారు.

సమిష్టి భద్రతే లక్ష్యం

చివరగా 'కాన్ఫరెన్స్ ఆన్ డిసార్మ్‌మెంట్' అనేది ప్రపంచంలోనే అత్యంత కీలకమైన నిరాయుధీకరణ వేదిక అని మిస్రీ అభివర్ణించారు. సభ్యదేశాలన్నీ తమ రాజకీయ విభేదాలను పక్కన పెట్టి, సమిష్టి భద్రతా ప్రయోజనాల కోసం నిర్మాణాత్మక చర్చలు జరపాలని ఆయన పిలుపునిచ్చారు. ప్రపంచ శాంతిని కాపాడేందుకు రాజకీయ సంకల్పం ప్రదర్శించాలని సభ్య దేశాలకు ఆయన విజ్ఞప్తి చేశారు.